Details
-
- ናሁ፡ ወጠንኩ፡ ሰላመ፡ መልክእከ፡ ጥዑም፨
- በኀይለ፡ ኢየሱስ፡ ክርስቶስ፡ ሠዋቄ፡ ደራሲ፡ ድኩም፨
- ዞሲማስ፡ ሐዋርያ፡ ዐርከ፡ ማቴዎስ፡ አዳም፨
- አመ፡ ሖርከ፡ ዮርዳኖሰ፡ ገዳመ፡ ብሕትዋን፡ በጾም፨
- ተዳደቀ፡ ምስሌሃ፡ ለግብጻዊት፡ ማርያም፨
-
- ሰላም፡ ለዝክረ፡ ስምከ፡ እንተ፡ ተለዐለ፡ ዕበዩ፨
- እምገድለ፡ ቅዱሳን፡ አበው፡ ዘሥጋሆሙ፡ አንደዩ፨
- ገብረ፡ መንፈስ፡ ቅዱስ፡ ዞሲማስ፡ ለለ፡ ስመከ፡ ሰመዩ፨
- አብኦሙ፡ ብሔረ፡ ጻድቃን፡ ወምድረ፡ ብፁዓን፡ ዘጐዩ፨
- እምነ፡ ኀጢአት፡ ነምር፡ ዘሕሡም፡ ራእዩ፨
-
- ሰላም፡ ለትንሣኤከ፡ ሥጋከ፡ አመ፡ ይከውን፡ ሐተታ፨
- በየማነ፡ አምላክ፡ ዘይቀውም፡ ምስለ፡ ነፍሰ፡ ጻድቃን፡ ጣቢታ፨
- ዲዲሞስ፡ ዞሲማስ፡ ስሙየ፡ ዘቶማስ፡ መንታ፨
- ነፍስነ፡ ግብጻዊት፡ ከመ፡ ኢትንበር፡ ባሕቲታ፨
- በመንግሥተ፡ ሰማይ፡ ምስሌከ፡ አስተዛውግ፡ ሕይወታ፨
-
- ህየንተ፡ አርብዓ፡ ዓመት፡ በዊአከ፡ ቀኖና፨
- ወበይነ፡ ብሔረ፡ ብፁዓን፡ ዘጾምከ፡ ወአምጻእከ፡ ዜና፨
- ድርሳነ፡ መልክእከ፡ ሐለይኩ፡ ኊልቈ፡ አርብዓ፡ ይኩና፨
- ተወከፍ፡ ጸሎትየ፡ ወማኅሌትየ፡ ዕሪና፨
- ከመ፡ ተወክፈ፡ ፈጣሪከ፡ ጸሎታ፡ ለሐና፨