Details
-
- እግዚአብሔር፡ አብ፡ ለአብርሃም፡ ዘተናገሮ፨
- ወእግዚአብሔር፡ ወልድ፡ ምሳሌ፡ ጥብሐተ፡ ይስሐቅ፡ በተአስሮ፨
- ወእግዚአብሔር፡ መንፈስ፡ ለኅሬ፡ ምዕራገ፡ ሰዋስው፡ ዘአመሮ፨
- ልሳነ፡ ጥበብ፡ ሀበኒ፡ ወዘውዳሴሁ፡ ፈክሮ፨
- ለድምያኖስ፡ አቡየ፡ ዘሲና፡ ማኅደሮ፨
-
- ሰላም፡ ለዝክረ፡ ስምከ፡ ዘተበፅዐ፡ ወተወደሰ፨
- ጊዜ፡ በካህን፡ ተቀደሰ፨
- ድምያኖስ፡ ገባራዊ፡ ዘእክለ፡ ጸሎት፡ ሐረሰ፨
- ከመ፡ ቃለ፡ ዳዊት፡ ኣይድዐ፡ በዘረከበ፡ ሞገሰ፨
- ፍጥር፡ ሊተ፡ እግዚኦ፡ ርቱዐ፡ መንፈሰ፨
-
- ሰላም፡ ለፍልሰተ፡ ሥጋከ፡ እም፡ ዴዴ፡ ነጋሢ፡ ፍጹመ፨
- እንዘ፡ ይከርዩ፡ ቀበረ፡ ብርሃነ፡ ሰማይ፡ ቆመ፨
- ወወፅአ፡ ዓዲ፡ እም፡ ውስተ፡ ሥጋከ፡ ጼና፡ መዐዛ፡ አዳመ፨
- አልቦ፡ ዘነከዮ፡ ከመ፡ ዘይእዜ፡ ተኀትመ፨
- ወነሥእዎ፡ ደቂቅከ፡ ጊዜ፡ ሰብእ፡ ኖመ፨
-
- ናሁ፡ ፈጸምኩ፡ ወበድርየኒ፡ ሠለጥኩ፨
- እንዘ፡ እነግር፡ ክብረከ፡ ወትሕትናከ፡ ዜኖኩ፨
- ድምያኖስ፡ አቡየ፡ ተወኪፈከ፡ ዘአቅረብኩ፨
- ንስቲተ፡ ለዐስብየ፡ እስመ፡ እመዝገብከ፡ ኀሠሥኩ፨
- ከመ፡ ትድሉ፡ ሊተ፡ ወኢታትርፍ፡ እስኩ፨
-
- አሐዱ፡ ግኁሥ፡ ገዳመ፡ ሐበላ፡ ዘነበረ፨
- እምድኅረ፡ ሞትከ፡ ድምያኖስ፡ ወሥጋከ፡ ተቀብረ፨
- በዘርእየከ፡ ይቤሎሙ፡ ለደቂቅከ፡ ቀትረ፨
- ኢይምሰልክሙ፡ ዘሞተ፡ አቡክሙ፡ ባሕቱ፡ ተሰወረ፨
- ወበቅድመ፡ እግዚእ፡ ቀዊሞ፡ ዐይንየ፡ ነጸረ፨