Details
-
- ሰላም፡ ለዝክረ፡ ስምከ፡ ዘትርጓሜሁ፡ ጠቢብ፨
- ዐቃቤ፡ ሥራይ፡ ሉቃስ፡ መድኅነ፡ አሕዛብ፡ ወሕዝብ፨
- ሕሙማነ፡ ነፍስ፡ ትፌውስ፡ በሥራይከ፡ ዕጹብ፨
- ወዝሥራይ፡ ሃይማኖቱ፡ ውስተ፡ አንቀጸ፡ አፍ፡ ቅሩብ፨
- ከመ፡ እምብእሲት፡ ተወልደ፡ ከመ፡ ንህብ፡ እምንህብ፨
-
- ሰላም፡ ለፍልሰተ፡ ሥጋከ፡ ምሳሌ፡ ፀአትከ፡ አፍኣ፨
- እምነ፡ መቃብር፡ ሕያወ፡ ከመ፡ ለሙታን፡ ተሠርዐ፨
- በተስፋ፡ ትንሣኤ፡ ሉቃስ፡ ተቀሠፍከ፡ በበአርብዓ፨
- ወየኀዩ፡ እንበይነ፡ ዝንቱ፡ በከመ፡ ነጸረ፡ ዘርዐ፨
- መንገለ፡ ከዊን፡ መሬታዊ፡ ሥጋከ፡ ዘገብአ፨
-
- ኀበ፡ ተርኅወ፡ ገነት፡ በከመ፡ አተውከ፡ እአቱ፨
- ነባቤ፡ ሰላመከ፡ ሉቃስ፡ ምክዕቢተ፡ ዐሥር፡ ምስለ፡ ሰመንቱ፨
- እስመ፡ እንዘ፡ ይብል፡ አዘዘ፡ አምላክ፡ ውስተ፡ ኦሪቱ፨
- ኢይትርፍ፡ ድኅረ፡ ጻመወ፡ ለዘጻመወ፡ ዕሤቱ፨
- ወለዘተዐሰበ፡ ዐስበ፡ ኢይቢት፡ በቤቱ፨
- ተረፈ፡ መልክእ፡
-
- ሰላም፡ ለከ፡ ሠናየ፡ ተግባር፡ ሉቃስ፡ ማእከለ፡ ገዳም፡ ይቡስ፨
- ተከልከ፡ አንተ፡ ምግባራተ፡ ነፍስ፨
- ወአልሐቀከ፡ መንፈስ፡ ቅዱስ፨
-
- ሰላም፡ ለክሙ፡ ይባርከነ፡ ክርስቶስ፡ ወሉቃስ፡ ውስተ፡ ቤትነ፡ እትዉ፨
- በዘሞተ፡ ቃል፡ ከመ፡ ታሕይዉ፨
- ወጌጋያቲነ፡ እንዘ፡ ትትዐደዉ፨
- ማእከሌነ፡ መምህራን፡ ኀልው፨