Details
-
- ክሥት፡ ሊተ፡ እግዚአብሔር፡ አምላኪየ፨
- በእንተ፡ ሩፋኤል፡ መልአክ፡ ወበእንተ፡ ማርያም፡ እምየ፨
- ከመ፡ እንግር፡ ሕቀ፡ ቅዳሴ፡ ማትያስ፡ አቡየ፨
- አእባነ፡ ዘአስተናበብከ፡ በከመ፡ ቃለ፡ ሰብእ፡ ሠናየ፨
- ወለአድገ፡ በለዓም፡ አንተ፡ ከሠትከ፡ ምስጢረ፡ ዐቢየ፨
-
- ሰላም፡ ለዝክረ፡ ስምከ፡ ጸጋ፡ ወሀብት፡ ዘአምላክ፨
- ወለሥዕርትከ፡ ሰላም፡ ማእከለ፡ ቆብዕ፡ ዘሦክ፨
- መልከ፡ ጼዴቅ፡ ማትያስ፡ መምህረ፡ አብርሃም፡ ዐርክ፨
- ተወከፍ፡ ዐሥራተነ፡ ማኅሌተ፡ ጽባሕ፡ ወሠርክ፨
- እስመ፡ ይትቃወመነ፡ ለነ፡ ቀናኢ፡ መልአክ፨
-
- ሰላም፡ ለአፉከ፡ ዘነበበ፡ ጥንቁቀ፨
- ወይጸልእ፡ ሥላቀ፨
- ማትያስ፡ ካልኡ፡ ለማትያስ፡ ዘዓዲቀ፨
- ሀበነ፡ ፍቅረ፡ ወሰላመ፡ ወወስከነ፡ ጽድቀ፨
- እስመ፡ ፍቅር፡ ጠፍአ፡ ወሰላም፡ ሐልቀ፨
-
- ሰላም፡ ለትንሣኤከ፡ አመ፡ ይመጽእ፡ ክርስቶስ፨
- ለኅልፈተ፡ ዛቲ፡ ዓለም፡ ወለአምጽኦ፡ ዓለም፡ ሐዳስ፨
- ለዘርአ፡ ሠናይ፡ ማትያስ፡ በዓለ፡ መዓር፡ ቅዱስ፨
- ዘአንሣእከ፡ ሎቱ፡ እንተ፡ ሞተ፡ እኅወ፡ ሥጋ፡ ወነፍስ፨
- አንሥአነ፡ ለነ፡ እምሀኬት፡ ድቃስ፨
-
- ሰላም፡ ለቆብዕከ፡ ወለአስኬማከ፡ ጸኑዕ፨
- ውሒዞ፡ ዘመጽአ፡ እም፡ ኤዎስጣቴዎስ፡ ነቅዕ፨
- ተረፈ፡ እንጦኒ፡ ማትያስ፡ ተወካፌ፡ ብዙኅ፡ ግፍዕ፨
- ወዐረገ፡ ሰማያተ፡ ለነጽሮ፡ ብርሃን፡ ኅቡእ፨
- ኀበ፡ ሀለዉ፡ ቅዱሳን፡ አርባዕ፨
-
- ይትባረክ፡ እግዚአብሔር፡ ዘአፈጸመነ፡ ዘንተ፨
- ድርሳነ፡ መልክእ፡ ዘማትያስ፡ አርብዐ፡ ወስድስተ፨
- ወተአምሪሁ፡ ዘኮነ፡ ሠለስተ፡ ዐሠርተ፨
- አስምዐነ፡ እግዚኦ፡ ዘሕፃናት፡ ማኅሌተ፨
- ዘብዝኀ፡ ጣዕሙ፡ ያጠልል፡ አዕፅምተ፨
- ተረፈ፡ መልክእ፡
-
- እምድኅረ፡ ነበረ፡ ዓመተ፡ ትርኵ፡ በድባርዋ፨
- ለገዳምከ፡ ብርህት፡ መጺኦ፡ ፄወዋ፨
- ዐሠርተ፡ ወክልኤተ፡ መነኮሳተ፡ ቀቲሎ፡ በበድዋ፨
- ትቤሎ፡ ማትያስ፡ ህየንተ፡ ደሞሙ፡ ነዋ፨
- እዘርወከ፡ ከመ፡ ጢስ፡ ዘፌዋ፨