Details
-
- ኦአብ፡ በእንቲአነ፡ ልብከ፡ ዘፈቀደ፨
- እምጽርሐ፡ አርያም፡ ወሪደ፨
- ምሥጢረ፡ ኪዳንከ፡ ክርስቶስ፡ ከመ፡ ለአበው፡ ተግህደ፨
- ኢያውርዱኒ፡ ውስተ፡ ሐቅለ፡ ጻማ፡ እለ፡ የሐውሩ፡ ዐውደ፨
- ህየንተ፡ ኅብስት፡ ወወይን፡ ይሴሰዩ፡ ነደ፨
-
- ኦበእንቲአነ፡ ዘተፈኖከ፡ ውስተ፡ ምድረ፡ ሥጋ፡ ግዙፍ፨
- እምዘወለደከ፡ አብ፡ እንበለ፡ ድካም፡ ወሐፍ፨
- ኖላዊነ፡ ኢየሱስ፡ ክርስቶስ፡ ገባሬ፡ መላእክት፡ አእላፍ፨
- ፈንዎሙ፡ ለመላእክት፡ ይጸልሉኒ፡ በክንፍ፨
- ወለአፅራርየ፡ ክሳዶሙ፡ ይምትሩ፡ በሰይፍ፨
-
- ኦበእንቲአነ፡ ዘአኀዙከ፡ በሌሊት፨
- ወአሠሩከ፡ ድኅሪተ፡ ከመ፡ ሠራቂ፡ ወፈያት፨
- ኖላዊነ፡ ክርስቶስ፡ መኰንነ፡ ኵሉ፡ ፍጥረት፨
- እስሮሙ፡ ለአፅራርየ፡ በሐብለ፡ መከራ፡ ጽንዕት፨
- ወለእድዋንየ፡ አጽድፎሙ፡ በሕማም፡ ወሞት፨
-
- ኦበእንቲአነ፡ ዘአልበሱከ፡ ከለሜዳ፡ ዘለይ፨
- ወተሣለቁ፡ ላዕሌከ፡ መምህራነ፡ ኦሪት፡ ብሉይ፨
- ኅብስተ፡ አርያም፡ ክርስቶስ፡ ዘኢተሐልቅ፡ ሲሳይ፨
- ይገድፉከ፡ ወይገድኩ፡ ብከ፡ ሕሊናሆሙ፡ ለለ፡ ይሠርቅ፡ ፀሓይ፨
- ኵሉ፡ ባዕል፡ ወኵሉ፡ ነዳይ፨
-
- ኦበእንቲአነ፡ ዘተቀነውከ፡ በቅንዋት፡ ዘኀጺን፨
- በፍትሐ፡ ቀያፋ፡ ወሐና፡ ሕዝበ፡ ይስኮር፡ ወዳን፨
- ኖላዊነ፡ ክርስቶስ፡ ዘለለም፡ ብርሃን፨
- ነፍስየ፡ እሥር፡ በነፍስከ፡ ከመ፡ ኢትኩን፡ ለደይን፨
- እስመ፡ ዘእንበሌከ፡ አልብየ፡ ድኂን፨
-
- ኦበእንቲአነ፡ ዘአስተዩከ፡ ሐሞተ፡ መሪር፡ ወከርቤ፨
- ቀትረ፡ ዕለተ፡ ዐርብ፡ ጸማዕኩ፡ አመ፡ በቃልከ፡ ትቤ፨
- ዋሕደ፡ ባሕርይ፡ ክርስቶስ፡ ወልደ፡ ማርያም፡ ዘኢሩካቤ፨
- አስትዮሙ፡ ለአፅራርየ፡ እለ፡ አብዝኁ፡ ይባቤ፨
- ጽዋዐ፡ መቅሠፍት፡ መሪረ፡ ኀዘን፡ ዘምሉእ፡ ምንዳቤ፨
-
- ኦበእንቲአነ፡ ዘአውረዱከ፡ እምዲበ፡ መስቀል፡ ዘቆመ፨
- ወቅንዋቲከ፡ መልሑ፡ እለ፡ ተሤረያ፡ ደመ፨
- ኖላዊነ፡ ክርስቶስ፡ ዘወሀብኮሙ፡ ሰላመ፨
- አውርዶሙ፡ ለአፅራርየ፡ ዕመቀ፡ ደዌ፡ መሥጥመ፨
- ወግበር፡ መክፈልቶሙ፡ መቅሠፍተ፡ አብዝኆ፡ ጽኑዐ፡ ሕማመ፨
-
- ኦበእንቲአነ፡ ዘገነዙከ፡ በሰንዱናት፡ ዘምስለ፡ ክልኤቱ፡ አፈው፨
- ከመ፡ ሕገ፡ አበው፡ ቀደምት፡ ዕሙራነ፡ ዜና፡ ከዋው፨
- ኖልዊነ፡ ክርስቶስ፡ ምስካየ፡ ግፉዓን፡ አኃው፨
- ግፍዖሙ፡ እንበለ፡ ዕድሜ፡ ለገፋዕያን፡ ዕደው፨
- ወያጽድቅ፡ ግፉዓነ፡ ስምከ፡ ሕያው፨
-
- ሰላም፡ ሰላም፡ ለኵሎን፡ መልክእከ፨
- አምሳለ፡ መልክኡ፡ ለአቡከ፨
- ኢየሱስ፡ ክርስቶስ፡ ሕማማተ፡ መስቀል፡ ዘጾርከ፨
- ኅብዐኒ፡ እምገጸ፡ ሞት፡ በእንተ፡ ማርያም፡ እምከ፨
- አማኑኤል፡ አምላኪየ፡ ኢይጽናዕ፡ ልብከ፨