Notes
The exact identification of this Yoḥannəs is elusive. The subject is evidently a monk from the lineage of Takla Hāymānot, apparently the child of parents Gabra Masqal and Walatta Māryām and associated with monks ʾƎndrəyās and Mātewos.
Malkəʾ
-
- ናሁ፡ ወጠንኩ፡ ከመ፡ እንግር፡ ጽድቆ፨
- ለመልክእከ፡ በገዳም፡ ዝርወተ፡ ኅሊና፡ በአስተላጽቆ፨
- ብሩረ፡ ምግባር፡ ዮሐንስ፡ ወርቀ፡ ሃይማኖት፡ ፍሕቆ፨
- ያጥብዖ፡ ለልሳንየ፡ ወለልብየ፡ ያጽሕቆ፨
- መንፈሰ፡ ረድኤትከ፡ ይምጻእ፡ ሰማየ፡ ሰጢቆ፨
-
- ሰላም፡ ለፅንሰትከ፡ ወለልደትከ፡ ቅዱስ፨
- በብስራተ፡ መልአክ፡ ለባሲ፡ አርአያ፡ አብሳዲ፡ ቀሲስ፨
- ዮሐንስ፡ ወልድ፡ ዕሤተ፡ ፍሬሃ፡ ለሀርሥ፨
- ይትፌሥሑ፡ በትዕግሥትከ፡ ወበጻማከ፡ ውዱስ፨
- አብርሃም፡ ምኩር፡ ወኢዮብ፡ ዕጉሥ፨
-
- ሰላም፡ ለዝክረ፡ ስምከ፡ ዘያስተፌሥሖን፡ ለአልባብ፨
- እምወይን፡ ከራሚ፡ ወእምስትል፡ ጥዑም፡ ሐሊብ፨
- ዮሐንስ፡ ንጹሕ፡ ማኅፈድ፡ ቀዋሚት፡ ጥበብ፨
- አኅድረኒ፡ ታሕተ፡ ገቦከ፡ በዕለተ፡ ምንዳቤ፡ ወጻሕብ፨
- አመ፡ ይወፅኡ፡ አፍአ፡ ሐምስቱ፡ አክላብ፨
-
- ሰላም፡ ለርእስከ፡ እስከ፡ ይትመሰው፡ ናላሁ፨
- ጻማ፡ ቆብዕ፡ ክቡድ፡ እንተ፡ ነበረ፡ ላዕሌሁ፨
- ልሳነ፡ ዕፍረት፡ ዮሐንስ፡ ወጳውሎስ፡ አምሳሊሁ፨
- እሴብሕ፡ አኰቴተከ፡ ወእዌድስ፡ ናሁ፨
- አናቅጸ፡ ቃል፡ ኵሎ፡ ላዕሌየ፡ አርኁ፨
-
- ሰላም፡ ለመላትሒከ፡ በተጸፍኦ፡ እለ፡ ሐማ፨
- ህየንተ፡ ጽፍአቱ፡ እምገብር፡ ለክርስቶስ፡ ንጉሠ፡ ራማ፨
- ዮሐንስ፡ ሥርግው፡ በትርሲተ፡ ሞገስ፡ ወግርማ፨
- ስደኒ፡ ወአዕርገኒ፡ ለአጥርዮ፡ ገድል፡ ወጻማ፨
- ደብረ፡ ጽሙናከ፡ አስቄጥስ፡ ስማ፨
-
- ሰላም፡ ለዘባንከ፡ ሰረገላ፡ ትዕግሥት፡ ወትሕትና፨
- ዮሐንስ፡ ባሕርይ፡ ለባሕረ፡ ጥበብ፡ እምሕፅና፨
- እስመ፡ ወለደ፡ ኪያከ፡ መስተፍሥሔ፡ አልባብ፡ ወኅሊና፨
- በክረምት፡ ወበሐጋይ፡ ዘኢይሴውሮ፡ ደመና፨
- ተክለ፡ ሃይማኖት፡ ፀሓይ፡ ለዓለም፡ ብርሃና፨
-
- ሰላም፡ ለአእዳዊከ፡ እለ፡ ረከባ፡ ክሂለ፨
- አመ፡ ረከበከ፡ መልአክ፡ እንዘ፡ ታንቀዐዱ፡ ላዕለ፨
- ዮሐንስ፡ ዕሩቅ፡ በእንቲአከ፡ ተብህለ፨
- አንኀ፡ ጸጋ፡ ወአስተባዝኀ፡ ብዕለ፨
- እምነ፡ አቡሁ፡ እንድርያስ፡ ነሢኦ፡ መስቀለ፨
-
- ሰላም፡ እብል፡ ለሕንብርትከ፡ አሐዱ፨
- እንተ፡ የኀድር፡ ክቡበ፡ ለከርሥከ፡ ማእከለ፡ ዐውዱ፨
- ወለተ፡ ማርያም፡ ሰሊከ፡ ወገብረ፡ መስቀል፡ ጽጌ፡ ናርዱ፨
- በጾም፡ ወበጸሎት፡ አመ፡ ቤተ፡ አምላክ፡ ተፀምዱ፨
- መዐዛ፡ ዮሐንስ፡ ኪያከ፡ ወለዱ፨
-
- አምኃ፡ ሰላም፡ አቅረብኩ፡ ለመልክእከ፡ ኵላ፨
- እስመ፡ ቦ፡ ላዕሌሃ፡ ሞገሰ፡ ክርስቶስ፡ ንጉሠ፡ ተድላ፨
- ዮሐንስ፡ ምዑዝ፡ እምጼና፡ ቀናንሞስ፡ ወጽጌ፡ ደንጐላ፨
- ለቃለ፡ አፉየ፡ መንገለ፡ ሰማይ፡ አልዕላ፨
- ወበልበ፡ ኵሎሙ፡ ሰብእ፡ ተሀሉ፡ ተስዒላ፨
-
- ለነዳያነዝ፡ ዓለም፡ እስከ፡ መዛግብቶሙ፡ መልአ፨
- እክለ፡ ሃይማኖት፡ በቋዒ፡ እስመ፡ ብክሙ፡ ተሠርዐ፨
- አመተ፡ ተድላ፡ ዮሐንስ፡ ወማቴዎስ፡ ወርኀ፡ ፍግዐ፨
- ስሙዓቲክሙ፡ እስከ፡ አጽናፈ፡ ምድር፡ ወፅአ፨
- ወጽድቅክሙ፡ በሰማይ፡ ጸንዐ፨