Subject
Malkəʾ
-
- እምኀበ፡ እግዚአብሔር፡ ሥሉስ፡ እንዘ፡ እኅሥሥ፡ ጥበበ፨
- ውዳሴ፡ መልክእከ፡ እጽሐፍ፡ ዘመነ፡ እብሬትየ፡ ቀርበ፨
- መክብበ፡ ሰማዕታት፡ እስጢፋኖስ፡ ዘኂሩትከ፡ ተዘግበ፨
- መጽሐፈ፡ ጽድቅከ፡ ሶበ፡ ካህነ፡ ወንጌል፡ አንበበ፨
- ቀዳሜ፡ ሰማዕት፡ እስጢፋኖስ፡ በሰማይ፡ የበበ፨
-
- ናሁ፡ ወጠንኩ፡ በዘይረትዕ፡ ኅሊና፨
- ወበዘይሤኒ፡ ልብ፡ ምስለ፡ ፍቅር፡ ወትሕትና፨
- ጻማ፡ ገድልከ፡ እዜኑ፡ ወሥቃያቲከ፡ በጥይቅና፨
- ሴስየኒ፡ እስጢፋኖስ፡ አምሳለ፡ ሐሊብ፡ ወመና፨
- እስከ፡ ማሕሌት፡ ወሰላም፡ ዘይመልእ፡ ልቡና፨
-
- ሰላም፡ ለዝክረ፡ ስምከ፡ በኍልቈ፡ ፊደላት፡ ሳድስ፨
- ዘተጸውዐ፡ ቀዳሚ፡ በመንፈስ፡ ቅዱስ፨
- ፍጡነ፡ ረድኤት፡ እስጢፋኖስ፡ ወፈጻሜ፡ ኵሉ፡ ማሠሥ፨
- ለክቡር፡ ዝክረ፡ ስምከ፡ እንተ፡ የዐውደ፡ ሞገስ፨
- ይሰግድ፡ ሰማይ፡ ወትገኒ፡ የብስ፨
-
- ሰላም፡ ለአዕይንቲከ፡ ዘኢነጸሩ፡ ወኢርእዩ፨
- መጽሐፈ፡ ሊቃውንት፡ ኅቡረ፡ እለ፡ ነፍሳተ፡ አድወዩ፨
- እስጢፋኖስ፡ ኵኑን፡ ለእሳት፡ በዋዕዩ፨
- ሕጽበኒ፡ እምርስሐትየ፡ ወነፍሰ፡ ዚአየ፡ አሕዩ፨
- ለአዕይንቲከ፡ ዘተከዕወ፡ በደሙ፡ ወማዩ፨
-
- ሰላም፡ ለአእዛኒከ፡ እለ፡ አበዩ፡ ይሰምዑ፨
- ምክረ፡ ረሲዓን፡ ሰብእ፡ በይነ፡ ፍቅረ፡ ንጉሥ፡ ዘጠብዑ፨
- እስጢፋኖስ፡ አሐዱ፡ ለእግዚአብሔር፡ እምአባግዑ፨
- ዘመጦከ፡ በእንተ፡ ስሙ፡ ሥጋ፡ ዘኢከ፡ ይሱዑ፨
- ወበአእዛኒከ፡ ሐፂነ፡ ይልክዑ፨
-
- ሰላም፡ ለሕፅንከ፡ ዘተወክፈ፡ በኢፍልጣን፨
- ኵነኔ፡ ንጉሥ፡ አሐዱ፡ ወፃዕረ፡ ሐራሁ፡ አብዳን፨
- እስጢፋኖስ፡ እሞት፡ ወእምነ፡ ኵሉ፡ ሐዘን፨
- በረደኤት፡ ዘተውህበከ፡ ወበዘዚአከ፡ ሕፅን፨
- ኀብአኒ፡ ከመ፡ ወልድ፡ ወንኡስ፡ ሕፃን፨
-
- ሰላም፡ ለኵርናዕከ፡ ዘተፃብአ፡ በሕቁ፨
- ሰይፈ፡ ሃይማኖት፡ ጸዋሮ፡ ለንጉሥ፡ ምስለ፡ ደቂቁ፨
- እስጢፋኖስ፡ ፍጹመ፡ ሶበ፡ ኀቤከ፡ አስቆቁ፨
- እንዘ፡ ይንብር፡ ለሕሊናየ፡ አቅመ፡ መፍቅዱ፡ ወጻሕቁ፨
- ኃይለ፡ ኵርናዕከ፡ ይዕቀበኒ፡ በሣህሉ፡ ወጽድቁ፨
-
- እንበይነ፡ ዘአቅረብኩ፡ ለከ፡ ማሕሌተ፡ ከናፍር፡ ውዳደ፨
- በፍቅደ፡ መልክእከ፡ ኵሉ፡ እንበለ፡ አጽርዕ፡ አሐደ፨
- እስጢፋኖስ፡ ስመከ፡ ሶበ፡ እጼውዕ፡ ገሀደ፨
- ዘየአክለኒ፡ ወይበቍዐኒ፡ ፈድፉደ፨
- ምዝጋና፡ በረከት፡ ጸግወኒ፡ ሰፊሐከ፡ እደ፨