Subjects
Righteous
ዮናስ፡
Yonās
Yonās
Yonās
Malkəʾ
-
- በስመ፡ ሥሉስ፡ ቅዱስ፡ ዘበተዋሕዶ፡ ኅቡረ፨
- ዓለማተ፡ ኵሎ፡ እንተ፡ በቅጽበት፡ ሣረረ፨
- ጸግወኒ፡ ዮናስ፡ ዘውዳሴከ፡ ምንሃረ፨
- ልሳነ፡ መልአክ፡ እሳታዊ፡ ከመ፡ ኪያኪ፡ መሀረ፨
- ንጽሐ፡ ኅሊና፡ ወገድል፡ ወዓዲ፡ መዝሙረ፨
-
- በስመ፡ ሥሉስ፡ ዋሕድ፡ አኃዜ፡ ኵሉ፡ ባሕቲቱ፨
- ዘእምኀበ፡ አልቦ፡ አቀመ፡ ሥዕለ፡ ሰሌዳ፡ ሰብዓቱ፨
- አርእየኒ፡ ዮናስ፡ ለክብርከ፡ ሥነ፡ ማኅቶቱ፨
- ወሥቅየኒ፡ ማየ፡ ልቡና፡ እምፈለገ፡ ብርሃን፡ አርባዕቱ፨
- ወጸጋ፡ ዚአከ፡ ሀበኒ፡ በከንቱ፨
-
- በስመ፡ ሥሉስ፡ ቅዱስ፡ ዋሕድ፡ ዘመንፈሰ፡ ሕይወት፡ ነፍሐ፨
- በትእዛዘ፡ ቃሉ፡ ግሩም፡ እንተ፡ ተከለ፡ ገሀሀ፨
- በአድያመ፡ ጽልመት፡ ዮናስ፡ ዘተመስልከ፡ ጽባሐ፨
- ከመ፡ እንግር፡ በበ፡ ምንታዌ፡ ተአምሪከ፡ ብዙኀ፨
- ውስተ፡ ልበ፡ ዕንቡዝ፡ ወልድከ፡ አዋኪ፡ ፍሥሓ፨
-
- ሰላም፡ ለዝክረ፡ ስምከ፡ ብዕለ፡ ጸጋ፡ አምላክ፡ ልዑል፨
- እንተ፡ በዲቤሁ፡ ወረደ፡ በኈልቈ፡ ሠለስቱ፡ ፊደል፨
- ዘበመነፈስ፡ ቅዱስ፡ ዮናስ፡ ሥርግወ፡ አክናፍ፡ ቀሊል፨
- ነዓ፡ ነዓ፡ እምደብረ፡ ሣህል፡ ደወል፨
- ወነዓ፡ እምሕፃዛእትከ፡ ሀገረ፡ መስቀል፨
-
- ሰላም፡ ለዐጽፍከ፡ ጸዳለ፡ ትሩፋት፡ ዘሰፈፎ፨
- ወግማኔ፡ ርስሐት፡ ዘኢለከፎ፨
- አብአኒ፡ ዮናስ፡ በቤተ፡ ትፍሥሕትከ፡ ለተሳትፎ፨
- ለሥጋየ፡ ወልደ፡ መሬት፡ አመ፡ ወርኀ፡ ወርዙት፡ ኀለፎ፨
- ወአመ፡ ለገዪስ፡ እዴሎ፡ እምዓለም፡ ግልፎ፨
-
- ኅዳጠ፡ ጸሪቀ፡ ዘእምኅኩከ፡ ለእንግዳ፨
- እመዝገበ፡ ኀጥእት፡ ልብየ፡ ቅጽረ፡ ተፅናሳት፡ ዘየዐውዳ፨
- ረሲየከ፡ ዘንተ፡ መባአ፡ ነዳይት፡ ዕቤርተ፡ ኤልዳ፨
- ሀበኒ፡ ዮናስ፡ ቡራኬከ፡ ለጠለ፡ ሰማያት፡ እምድዳ፨
- ከመ፡ ወሀቦ፡ ያዕቆብ፡ ለወልዱ፡ ይሁዳ፨