-
- በስመ፡ እግዚአብሔር፡ ሕያው፡ ዘይሤልስ፡ በአካላት፨
- ወይትወሐድ፡ በመለኮት፨
- ጊዜ፡ ኣነብብ፡ ማርቆስ፡ ሰላመ፡ መልክእከ፡ ለለ፡ ዕለት፨
- ላዕሌየ፡ ፈኑ፡ መንፈሰ፡ ጸጋ፡ ከመ፡ ወረደ፡ ትካት፨
- ላዕለ፡ ሐዋርያት፡ ኄራን፡ ወ፸፡ አርድእት፨
-
- ሰላም፡ ለፅንሰትከ፡ በነቢብ፡ ወበፈክሮ፨
- ምስለ፡ ልደትከ፡ በአኅብሮ፨
- ከመ፡ ታጽንዕ፡ ማርቆስ፡ ለዘርአ፡ ያዕቆብ፡ መንበሮ፨
- ተናገር፡ ጽድቀ፡ ውስተ፡ ልቡ፡ ወአስምዕ፡ ነገሮ፨
- ዕቀብ፡ ሕይወቶ፡ ወአግርር፡ ፀሮ፨
-
- ሰላም፡ ለዝክረ፡ ስምከ፡ ዘሰመዮ፡ እግዚእ፨
- በብሂለ፡ መዓር፡ ወጸቃውዕ፨
- ደምረኒ፡ ማርቆስ፡ ምስለ፡ ቅዱሳን፡ አርዳዕ፨
- በከመ፡ ደመርኮ፡ ለአንያኖስ፡ ብፁዕ፨
- ድኅረ፡ ተሠጥቀ፡ አጽባዕቱ፡ በዘይሰፈ፡ መርፍዕ፨
- እስከነ፡ ተሠይመ፡ እምድኅሬከ፡ በመንበር፡ ካልእ፨
-
- ሰላም፡ ለፍልሰተ፡ ሥጋከ፡ በይባቤ፡ ወበመዝሙር፨
- ውስተ፡ ቤተ፡ ድንግል፡ ማርያም፡ ወማኅደረ፡ ወልዳ፡ ፍቁር፨
- ማርቆስ፡ ፍትሐኒ፡ ገሀነማዊ፡ ማዕሠር፨
- መርዓዊ፡ ሰማያዊ፡ አመ፡ ያመጽእ፡ በድኅር፨
- ከመ፡ እትቀበሎ፡ ምስሌከ፡ በክብር፨
-
- ፈጸምኩ፡ አነ፡ ዘመልክእከ፡ ሰላመ፨
- በኍልቈ፡ ሠላሳ፡ ወስድስ፡ ከመ፡ ውስተ፡ መጽሐፍ፡ ተኀትመ፨
- ማርቆስ፡ ኢታንትግ፡ ቅድመ፡ መንበረ፡ አብ፡ ቀዊመ፨
- ኢይርአዩ፡ ደቂቅከ፡ በዓለም፡ ሕማመ፨
- ወምድርኒ፡ ትሠቀይ፡ ዝናመ፨
-
- ስብሐት፡ ለአብ፡ ወለወልድ፡ አእኵቶ፨
- ወለመንፈስ፡ ቅዱስ፡ ስብሐት፡ ዘከፈለኒ፡ ረድኤቶ፨
- ለሐዋርያሁ፡ ማርቆስ፡ እስከ፡ እፌጽም፡ ማሕሌቶ፨
- እስመ፡ ውእቱ፡ ይብል፡ እሁቦ፡ ለዘጸለየ፡ ጸሎቶ፨
- ወዘተወክፎ፡ ለጻድቅ፡ ይነሥእ፡ ዕሤቶ፨