Subjects
Angelic
ራጉኤል፡
Rāguʾel
Raguel
Raguel
Malkəʾ
-
- እዌጥን፡ አንሰ፡ ዝክረ፡ መልክኣቲከ፡ በአስተሐምሞ፨
- አኮ፡ ንስቲተ፡ ለወድሶ፡ ዳእሙ፡ ለፈጽሞ፨
- ራጉኤል፡ መልአክ፡ ቅቡአ፡ ቅዳሴ፡ አበሞ፨
- አስተበቍዐከ፡ ተሀበኒ፡ መና፡ ሰማያት፡ ለጥዕሞ፨
- ከመ፡ ዘይስእል፡ ወልድ፡ አቡሁ፡ ወእሞ፨
-
- ሰላም፡ ለሥዕርተ፡ ርእስከ፡ ወለድማሐ፡ ርእስከ፡ ምስካዩ፨
- ወለገጽከ፡ ዘይሤኒ፡ እምውሉደ፡ ሰብእ፡ ሥነ፡ ላህዩ፨
- ወለቀራንብቲከ፡ ዓዲ፡ ንዋመ፡ ሐኬት፡ ኢይትሜነዩ፨
- አጋንንት፡ ኪያየ፡ ከመ፡ ኢይስክዩ፨
- ራጉኤል፡ አድኅነኒ፡ ኀቤከ፡ አወዩ፨
-
- ሰላም፡ ለአፃብዒከ፡ ወለአጽፋረ፡ እግርከ፡ በአኅብሮ፨
- ወለቆምከ፡ እደ፡ ሰብእ፡ እንተ፡ ኢገብሮ፨
- ለመልክእከ፡ ሰላም፡ እግዚአብሔር፡ ዘሣረሮ፨
- ራጉኤል፡ ምልአኒ፡ መንፈሰ፡ ጥበብ፡ ወአእምሮ፨
- ገብርከ፡ ለጽማዌ፡ ኢይኩን፡ ማኅደሮ፨
-
- እምንእስየ፡ እመ፡ ኀሠሥኩ፡ ወሐተትኩ፡ ቀዲሙ፨
- ኢረከብኩ፡ ዘከማከ፡ እምዘውገ፡ መላእክት፡ ኵሎሙ፨
- ለረዲአ፡ ዐርኩ፡ ከመ፡ ኪያከ፡ ይጻሙ፨
- ራጉኤል፡ ሶበ፡ ጸዋዕኩ፡ ስመ፡ ዚአከ፡ ለለ፡ ጌሠሙ፨
- ራጉኤል፡ ቅረበኒ፡ በኢጐንድዮ፡ ራጉኤል፡ ናዝዘኒ፡ ለአምላክ፡ በስሙ፨