Subjects
Martyr
ፊቅጦር፡
Fiqṭor
Victor
Victor
Malkəʾ
-
- ናሁ፡ አንሰ፡ ቅድመ፡ ውዳሴከ፡ ሀልው፨
- ከመ፡ ዕንዚራ፡ ርሱይ፡ ወከመ፡ መሰንቆ፡ ድልው፨
- ፊቅጦር፡ ሰንቁ፡ ላዕሌየ፡ ማሕሌተ፡ ጠቢባን፡ እደው፨
- እምነ፡ አእምሮ፡ ቅድው፡ ወእምነ፡ ነገር፡ ግጽው፨
- እስመ፡ አፉየ፡ ዕሩቅ፡ ወልብየ፡ በድው፨
-
- ሰላም፡ ለዝክረ፡ ስምከ፡ መርስኤ፡ ኵሉ፡ ኀዘን፨
- ከመ፡ ዝክረ፡ ማሕሌት፡ ጊዜ፡ ስቴ፡ ወይን፨
- ፊቅጦር፡ ጠቢብ፡ መምህረ፡ አእሩግ፡ ሕፃን፨
- ለስብሐተ፡ ስምከ፡ መልኦ፡ ውስተ፡ ገጸ፡ ኵሉ፡ መካን፨
- አስተጋብኦቶ፡ ይስእን፡ ወይደክም፡ ልሳን፨
-
- ሰላም፡ ለፅንሰትከ፡ ፅንስ፡ ክቡር፨
- በብስራተ፡ ማርያም፡ ድንግል፡ ወሥምረተ፡ ወልዳ፡ ፍቁር፨
- አፈወ፡ ልብን፡ ፊቅጦር፡ ውስተ፡ ልብየ፡ ስቂር፨
- ኢትትአንተል፡ እምሕሰሙ፡ ወምግባራቲሁ፡ ኅቁር፨
- እስመ፡ ልበ፡ አብድ፡ ከመ፡ ጻሕብ፡ ስቁር፨
-
- ሰላም፡ ለልደትከ፡ ለልዴ፡ ይስሐቅ፡ ሱታፉ፨
- እምልበ፡ ወላዲት፡ እምከ፡ ድኅረ፡ ጠፍአ፡ ተስፋ፨
- ኰኵሐ፡ ሃይማኖት፡ ፊቅጦር፡ ወጽንዐ፡ ትዕግሥት፡ ኬፋ፨
- ታስረኒ፡ ከመ፡ አዕዋፍ፡ ወታብጽሐኒ፡ ምዕራፋ፨
- ፀሓየ፡ ጽድቅከ፡ ዘሕይወት፡ ክንፋ፨
-
- ሰላም፡ ለመከየድከ፡ እለ፡ ኢኬዳ፡ ዐጸዶ፨
- ለዲዮቅልጥያኖስ፡ ዐላዊ፡ እምአመ፡ ለክርስቶስ፡ ክሕዶ፨
- ሰማዕተ፡ ወንጌሉ፡ ፊቅጦር፡ እንተ፡ ትፀመድ፡ ፈቀዶ፨
- ረስየኒ፡ ወልደ፡ ዚአከ፡ አመ፡ ዐልተ፡ ዳግም፡ ተወልዶ፨
- ለብዕለ፡ ጸጋከ፡ እትካፈል፡ ክበዶ፨
-
- ሰላም፡ ሰላም፡ ለዝኅርከ፡ ክልኤቲ፨
- ዘቅጽረ፡ ጳሪቆን፡ አሐቲ፡ ወዘአንጾኪያ፡ አሐቲ፨
- ፍሉጠ፡ ምግባር፡ ፊቅጦር፡ እምግባረ፡ ኵሉ፡ መዋቲ፨
- ጻውዐኒ፡ ከመ፡ ማኅፈር፡ ውስተ፡ መርዓከ፡ እንታክቲ፨
- አፈወ፡ ሮማን፡ ዘፍቅርከ፡ እስቲ፨
-
- ናሁ፡ መልአ፡ ውዳሴ፡ መልክእከ፡ ጠንቂቆ፨
- እምልሳንየ፡ ድኅንፃ፡ ወእምአፉየ፡ መሰንቆ፨
- ፊቅጦር፡ አብዝኅ፡ ለዕሤተ፡ ጻማየ፡ ኍልቆ፨
- ስእመ፡ ጥቀ፡ ተአመንኩከ፡ እንዘ፡ አልብየ፡ ናፍቆ፨
- ከመ፡ ዘለቅሐ፡ ለሲሳይ፡ ወርቆ፨