Subjects
Martyr
ፊቅጦር፡
Fiqṭor
Victor
Victor
Malkəʾ
-
- በረድኤተ፡ ክርስቶስ፡ አምላክ፡ ለክብረ፡ ስሙ፡ ሰጊድ፨
- እመንፈሳውያን፡ ነገድ፡ ወእምሥጋውያን፡ ትውልድ፨
- ወይነ፡ መንፈስ፡ ቅዱስ፡ ፊቅጦር፡ ዘጣዕምከ፡ ፍድፉድ፨
- ያስክረኒ፡ ስቴ፡ ፍቅርከ፡ ወያጥብበኒ፡ ለአብድ፨
- ዜና፡ ዕበያቲከ፡ እጽሕፍ፡ በመዝራዕት፡ ወእድ፨
-
- ሰላን፡ ለፅንሰትከ፡ ወለልደትከ፡ ፍሥሓ፨
- ውስተ፡ ቅጽረ፡ መንፍሥት፡ ዐባይ፡ ዘቀርነ፡ በዓሉ፡ ተነፍሐ፨
- ሕፃነ፡ ማርታ፡ ፊቅጦር፡ ዘነገሥተ፡ ምሥራቅ፡ አበዊሃ፨
- ይሕፅበኒ፡ እምርስሐትየ፡ ወይጸግወኒ፡ ንጽሐ፨
- ፈለገ፡ ቅዳሴ፡ ደምከ፡ ዐውደ፡ ስምዕ፡ ዘነዝኀ፨
-
- ሰላም፡ ለሰሌዳ፡ ስምከ፡ ሆህያተ፡ በቅጥር፡ ዘቦቱ፨
- ወፍካሬ፡ ባህሉሰ፡ በጽርዕ፡ ፊቅጦር፡ ዝንቱ፨
- ወብሂለ፡ ፊቅጦርኒ፡ ፍቁረ፡ ፈጣሪ፡ ውእቱ፨
- መምህራን፡ ወማእምራን፡ በጊዜ፡ አንበብዎ፡ ሎቱ፨
- እንዘ፡ ይብል፡ ከመዝ፡ ተረክበ፡ ጽሕፈቱ፨
-
- ሰላም፡ ለፍልሰተ፡ ሥጋከ፡ በእደ፡ እምከ፡ ማርታ፨
- እምውሳጤ፡ ይእቲ፡ ግብ፡ እንተ፡ ነበርከ፡ ውስቴታ፨
- ለእስክንድርያ፡ ፊቅጦር፡ ወለአንጾኪያ፡ ማኅቶታ፨
- ለዕበየ፡ ዛቲ፡ ፍልሰትከ፡ በዘትትሌዐል፡ ሥርዓታ፨
- በኈልቈ፡ ብፅዓናት፡ ዓሥር፡ ተጼሐ፡ ፍኖታ፨
-
- በኈልቈ፡ ሱባዔ፡ ራብዕ፡ ወበፍቅደ፡ ክራማት፡ ኃምስ፨
- ውስተ፡ ዓለምነ፡ ቦቱ፡ ዘአንሶሰወ፡ ክርስቶስ፨
- አምኃ፡ ማሕሌት፡ አቅረብኩ፡ ለመልክእከ፡ ውዱስ፨
- ተወከፍ፡ ሊተ፡ እግዚእየ፡ እምነ፡ ባሪክ፡ ጽኑስ፨
- ፊቅጦር፡ መኰንን፡ ፊቅጦር፡ ንጉሥ፨