ሰቆቃወ፡ ሥጋ፡ Saqoqāwa Śəgā

Lamentation of the Flesh

- ናሁ፡ ወጠንኩ፡ ሰቆቃወ፡ ሥጋ፡ ግሱስ፨
- ተላዌ፡ ሰቆቃው፡ ዘነፍስ፨
- ባሕቱ፡ ብሂለ፡ ኢትበለኒ፡ ክርስቶስ፨
- ለምንት፡ ትነብብ፡ በአፉከ፡ እንዘ፡ ልብከ፡ ግሑሥ፨
- እምገቢረ፡ ዓሥር፡ ትእዛዝ፡ ወቃላት፡ ሳድስ፨
- ኦሥጋየ፡ መፍቀሪተ፡ ብዕል፡ ቅሡም፨
- ወሰትየ፡ ስቴ፡ ጥዑም፨
- ለምንት፡ ለኪ፡ አጽርዖተ፡ ጸሎት፡ ወጾም፨
- እንዘ፡ የአምር፡ ሕሊናኪ፡ ብዕለ፡ ተድላ፡ ዝንቱ፡ ዓለም፨
- ከመ፡ በጽላሎት፡ ተመስለ፡ ወዓዲ፡ በሕልም፨
- ኦሥጋየ፡ ይደልወኪ፡ ንስሐ፨
- እምሥዕርተ፡ ርእስኪ፡ ነዋኅ፡ አምጣነ፡ ጌጋይኪ፡ ኖኃ፨
- መፍትውኑ፡ ገቢረ፡ ሐሤት፡ ወፍሥሐ፨
- እንዘ፡ በዝየ፡ መልአከ፡ ሞት፡ ይጸንሐኪ፡ ጸኒሐ፨
- ወገሃነም፡ በከሐ፨
- ኦሥጋየ፡ ኢይበቍዓኪ፡ ምንተ፨
- [line missing]
- ከመዝ፡ አኮኑ፡ ፈጣሪ፡ እንበለ፡ ትዘከሪ፡ ሞተ፨
- በቀትረ፡ መዐልት፡ እመሂ፡ ሌሊተ፨
- አምሳለ፡ ሰራቂ፡ ይመጽእ፡ ወይበጽሕ፡ ግብተ፨
- ኦሥጋየ፡ ለእመ፡ ብኪ፡ ልባዌ፨
- ተዘከሪ፡ ዮም፡ ገቢረ፡ ሰማያዌ፨
- በዓለምሰ፡ ካልእተ፡ ሀገር፡ ነነዌ፨
- ተዘክሮ፡ ብዕል፡ ወኀሢሠ፡ ብዙኅ፡ ሥጋዌ፨
- ያመጽእ፡ በላዕለ፡ ነፍስ፡ ሕማመ፡ ወደዌ፨
- ኦሥጋየ፡ ለመብልዓ፡ ዓለም፡ ዝንቱ፨
- ምንት፡ ረባሑ፡ ወምንት፡ በቍዔቱ፨
- አኮኑ፡ የዓኪ፡ ወይጸላዕ፡ በደኃሪቱ፨
- ጊዜ፡ ጽምዕ፡ ይገድፍዎ፡ እንዘ፡ ይጸይእ፡ ውእቱ፨
- አምሳለ፡ ገደፍዎሙ፡ ለአካል፡ ባሕቱ፡ ዘሞቱ፨
- ኦሥጋየ፡ ለለመዋዕል፡ ወጊዜ፨
- ታፈድፍዲ፡ ጌጋየ፡ እስከ፡ ዘመን፡ ማእዜ፨
- ኢለበውኪኑ፡ ገቢረ፡ ኃጢአት፡ ዘይእዜ፨
- ከመ፡ ያበጽሕ፡ በደኃሪ፡ ውስተ፡ ጽኑዕ፡ እንባዜ፨
- መንገለ፡ ኢሀሎ፡ ትፍሥሕት፡ ወአልቦ፡ ኑዛዜ፨
- ኦሥጋየ፡ እመሌሊት፡ አሐደ፨
- ሶበ፡ አኀዘኪ፡ ደዌ፡ ዘተሐምሚ፡ ፈድፋደ፨
- እፎ፡ ደኃሪ፡ ይከውኑ፡ ክቡደ፨
- ኀቤኪ፡ ፈጣሪ፡ ጊዜ፡ ይፈኑ፡ ፈቀደ፨
- ዕፄ፡ መፍርሃ፡ ወግሩመ፡ ነደ፨
- ኦሥጋየ፡ እንዘ፡ ቃለ፡ ወንጌል፡ ይብል፨
- በዲበ፡ ክሳዱ፡ ዘኢጾረ፡ አርዑተ፡ መስቀሉ፡ ለቃል፨
- መንግሥተ፡ ሰማያትሃ፡ ከመ፡ ይትዋረሳ፡ ኢይክል፨
- ለምንት፡ ተሐሥሢ፡ ጸዋትወ፡ ሕይወት፡ ወብዕል፨
- ዘደኃሪቶሙ፡ ምንዳቤ፡ ወሐጕል፨
- ኦሥጋየ፡ መናኒተ፡ ገድል፡ ወምናኔ፨
- ዓዲ፡ መዝገበ፡ ዘኢያማሰኖ፡ ቍንቍኔ፨
- እስከ፡ ማእዜኑ፡ አልባሰ፡ ትሬስዪ፡ ልብሰ፡ ግማኔ፨
- እንዘ፡ ይዴለው፡ ሕይወትኪ፡ በጽንዓ፡ ፃዕረ፡ ሞት፡ ማኔ፨
- ወይጸንሐኪ፡ ፈድፋደ፡ ኵነኔ፨
- ኦሥጋየ፡ መፍቀራተ፡ ወይን፡ ወሥጋ፨
- ኵሎ፡ ጊዜ፡ እንበለ፡ ሕፀፅ፡ ወግብረ፡ ንትጋ፨
- ምንትኑ፡ በዓለም፡ ረኪበ፡ ጸጋ፨
- አኮኑ፡ ያቀውም፡ በፍርሃት፡ ማእከለ፡ ግሩም፡ እንግልጋ፨
- ወየዓሥር፡ ነፍሳ፡ ከመ፡ ሐብል፡ ወጋጋ፨
- ኦሥጋየ፡ ዘተሠርገውኪ፡ ዝንጋዔ፨
- ከመ፡ እለ፡ አልቦሙ፡ ተስፋ፡ ትንሣኤ፨
- ትጐይዪ፡ ውስተ፡ ዓውደ፡ ፍትሕ፡ ቅድመ፡ ጉባኤ፨
- በዓለ፡ ገራህት፡ እምተዋሕዶ፡ ለኀበ፡ ከዊነ፡ ክልኤ፨
- አመ፡ ክርዳዳተ፡ እምስርናይ፡ ይፈልጥ፡ በመስዔ፨
- ኦሥጋየ፡ ዘሕሊና፡ ዚአኪ፡ አብደ፨
- ልብኪኒ፡ ከመ፡ ፈርዖን፡ ከብደ፨
- እስፍንተ፡ ዘመነ፡ ወመዋዕለ፡ ፈድፋደ፨
- ለምንት፡ ኢትሬእዪ፡ እንዘ፡ ይቀትል፡ አሐደ፨
- ወእንዘ፡ አሐደ፡ ያደዊ፡ ፈጣሪ፡ ገሃደ፨
- ኦሥጋየ፡ እኅተ፡ ነዌ፡ ድሩክ፨
- አኮ፡ አኮ፡ እኅተ፡ አልዓዛር፡ ዓርክ፨
- ጊዜ፡ ንግደትኪ፡ ኮነ፡ ዘእሳት፡ ከመ፡ ንደተ፡ ሣዕር፡ ወሦክ፨
- ኢይክሉ፡ ያቍርሩ፡ ልሳነኪ፡ እምአዕርክት፡ ዓርክ፨
- ወእመላእክት፡ አሐዱ፡ መልአክ፨
- ኦሥጋየ፡ ኅጥዕተ፡ ንዋም፡ ወድቃስ፨
- በሐልዮ፡ ሲሳይ፡ ወልብስ፨
- ኅድጊሰ፡ ዘለኪ፡ እግዚአብሔር፡ ንጉሥ፨
- አኮኑ፡ ያስተዳሉ፡ ሲሳየ፡ ኵሉ፡ ዘነፍስ፨
- ወለአራዊት፡ ዘሀለዉ፡ ወስተ፡ ባሕር፡ ወየብስ፨
- ኦሥጋየ፡ ዘባሕርይኪ፡ መዋቲ፨
- ወግማደ፡ መሬት፡ አንቲ፨
- መንግሥተ፡ ሰማያትሃ፡ ሀገረ፡ ጻድቃን፡ ይእቲ፨
- እፎ፡ ጸላእከ፡ ወመነንኪ፡ በአፍቅሮተ፡ ዓለም፡ ዛቲ፨
- ዘትምይንታ፡ ብዙኅ፡ ወፍቅራ፡ መስሓቲ፨
- በእንቲአኪ፡ ነበብኩ፡ መንፈቀ፡ ሠላሳ፡ ድርሳናት፨
- ኦሥጋየ፡ ድሉተ፡ ኵለንታ፡ ለሞት፨
- ለመጽሐፈ፡ ዜናኪሰ፡ እስከ፡ ፍጻሜ፡ እምጥንት፨
- በረቀ፡ ሰማይ፡ ወበማየ፡ ሕመት፨
- አብሕርት፡ እምኢፈጸምዎ፡ ወብዙኃን፡ ጸሐፍት፨

Bibliography Z

Dickinson, Augustine. “The Lamentation of the Flesh (Saqoqāwa Śǝgā): An Ethiopic Penitential Hymn and Companion Text to the Lamentation of the Soul (Saqoqāwa Nafs).” Comparative Oriental Manuscript Studies Bulletin 11 (2025): 231–41.