Subject
Malkəʾ
-
- በስመ፡ እግዚአብሔር፡ ሕያው፡ ሥሉስ፡ በግጻዌሁ፨
- ወዋሕድ፡ በህላዌሁ፨
- ማሕሌተከ፡ ፊልጶስ፡ ከመ፡ እሕሊ፡ በበ፡ ጾታሁ፨
- አንቀጸ፡ ልብየ፡ በመርሖ፡ ጥበብ፡ አርኁ፨
- ኢፍታሕ፡ ተፈታሕ፡ በለኒ፨
-
- ሰላም፡ ለዝክረ፡ ስምከ፡ በቍዔተ፡ ዘሰአላ፨
- ገባሬ፡ መንክራት፡ እንተ፡ አልዐላ፨
- ሠናየ፡ ዝክር፡ ፊልጶስ፡ ለገነተ፡ ልዑል፡ አስካላ፨
- ማርያም፡ ርግበ፡ ገሊላ፡ ፀሓየ፡ ጽድቅ፡ ብሂላ፨
- ሰመየተከ፡ ስመ፡ በጥዑም፡ ቅላ፨
-
- ሰላም፡ ለምራቅከ፡ ለአብዝኆ፡ ጻማ፡ ዘየብሰ፨
- ኀጺነ፡ ወሠቀ፡ በጊዜ፡ ረሰይከ፡ ልብሰ፨
- ፊልጶስ፡ ፈጽም፡ ዘኅሊናየ፡ ማኅሠሠ፨
- ለማየ፡ አፉየ፡ ዘመጻጕዐ፡ ፈወሰ፨
- እምፈተውኩ፡ አንሰ፡ ትቅብአኒ፡ ሥልሰ፨
-
- ሰላም፡ ለመናቅዕከ፡ ፀጋመ፡ ወየማነ፨
- ፊልጶስ፡ አቡነ፨
- በዐይነ፡ ኅሊና፡ ርኢኩ፡ እለ፡ ከማከ፡ ጻድቃነ፨
- ሕርመተ፡ ፀሓይ፡ ወወርኅ፡ ለባሕቲትከ፡ ኮነ፨
- እስከ፡ መኅቱ፡ ኢረከብኩ፡ አነ፨
-
- ሰላም፡ ለአቍያጺከ፡ ለተሌልዮ፡ ዘቀርቡ፨
- ማዕሰ፡ ሥጋ፡ ኢረከቡ፨
- መጽሐፈ፡ ብርሃን፡ ፊልጶስ፡ ኆኅተከ፡ ያንብቡ፨
- እምበረከትከ፡ ሕዝበ፡ ኢትዮጵያ፡ ይጽገቡ፨
- ግብረተ፡ ፀር፡ ለንጉሥነ፡ ጸግዎ፡ አቡ፨
-
- ሰላም፡ ለአብራኪከ፡ እለ፡ አኀዛ፡ ይግነያ፨
- ለስመ፡ እግዚአብሔር፡ ኬንያ፨
- ፊልጶስ፡ ይትነከር፡ ለኂሩትከ፡ ሥነ፡ ዕበያ፨
- ሐወጸከአ፡ ለቤተ፡ ክርስቲያን፡ ባሕርያ፨
- መምህር፡ ዘአፍራቅያ፡ ፊልጶስ፡ ሐዋርያ፨
-
- ሰላም፡ ለአእጋሪከ፡ ለማኅደረ፡ ንጉሥ፡ ዐምዳ፨
- እለ፡ ተሰብራ፡ በሕቁ፡ ከመ፡ ብርዐ፡ ባሕሩሰ፡ ጸዐዳ፨
- ፊልጶስ፡ አቡየ፡ ባልሐኒ፡ እምነ፡ ዕዳ፨
- ፍናወ፡ ጽድቅከ፡ አእጋርየ፡ ይኬዳ፨
- እምአድባረ፡ ትእዛዝ፡ ወልድከ፡ ኢይንበር፡ በበዳ፨
-
- ሰላም፡ ለሰኳንዊከ፡ ትዕግሥተ፡ ኢዮብ፡ ተዐጋሢ፨
- አመ፡ ይመጽእ፡ መርዓዊ፡ እንተ፡ ኢስእንከ፡ ታምሲ፨
- በጸሎትከ፡ ፊልጶስ፡ ኀጢአትየ፡ አናኅሲ፨
- ካዕበኒ፡ ትእምተ፡ መድኃኒት፡ ረሲ፨
- ሰኮና፡ እግርየ፡ ለአባሲ፡ ኢይንስኮ፡ ከይሲ፨
-
- ሰላም፡ ለመከየድከ፡ ለአርብሖ፡ ምናን፡ ነጋዲ፨
- አመ፡ ይመጽእ፡ መርዓዊ፡ ምስለ፡ ረባሐን፡ ይፍዲ፨
- ማኅደረ፡ በረከት፡ ፊልጶስ፡ እንተ፡ ኢትነዲ፨
- መነኮስ፡ ተጋዳሊ፡ ተረፈ፡ ሰማዕታት፡ ዓዲ፨
- ቦኑመ፡ አንተ፡ አቡየ፡ አብሳዲ፨
-
- ሰላም፡ ለግንዘተ፡ ሥጋከ፡ በከመ፡ መጻሕፍት፡ ሠርዑ፨
- ልብሰ፡ ሠቅ፡ ዘትለብሰ፡ እምላዕሌከ፡ ኢያውፅኡ፨
- ጼዋ፡ ፍቁራኒከ፡ ኢይምጽኡ፨
- ከመ፡ ይባርኩነ፡ በኍልቈ፡ ዕለታት፡ ሰብዑ፨
- ተክለ፡ መርዓዊ፡ ወፍሬ፡ ወንጌል፡ ወአባ፡ በግዑ፨
-
- ሰላም፡ ለመቃብሪከ፡ አቲዎ፡ አእላፈ፨
- እንተ፡ ዲቤሁ፡ ተክህለ፡ መለኮት፡ እንዘ፡ ይባርክ፡ አጽናፈ፨
- ማሕሌተከ፡ ፊልጶስ፡ ዘልሳንየ፡ ጸሐፈ፨
- ከመ፡ ይትቀሠፉ፡ ቦቱ፡ አፅራረ፡ ነፍስየ፡ ዘልፈ፨
- አንበርኩ፡ ሎሙ፡ ኲናተ፡ ወሰይፈ፨
-
- ኦፊልጶስ፡ ለወይንከ፡ ታሕተ፡ ሐረጉ፨
- ጊዜ፡ ፍና፡ ሰርክ፡ እትቀነይ፡ በእግረ፡ ኅሊና፡ ዐረጉ፨
- መጠነ፡ ጻህቅየ፡ ሊተ፡ ዲናረ፡ መንፈስ፡ ጸጉ፨
- ናሁ፡ ለባሕረ፡ ውዳሴከ፡ እንዘ፡ ስፉሕ፡ ድንጋጉ፨
- እንበለ፡ እጽብቶ፡ ሕቀ፡ ናሁ፡ ኀደጉ፨