መልክአ፡ ፊልሞና፡ ዘአበርጉት፡
Malkəʾa Filmonā za-ʾAbargut
Image of Filmonā of ʾAbargut
-
- ናሁ፡ እዜኑ፡ ለለ፡ ሠርቀ፡ አሚር፡ ወወዐሙ፨
- ዜና፡ ማሕሌትከ፡ ክቡረ፡ ስሙ፨
- ፊልሞና፡ አቡየ፡ አደወ፡ እምነ፡ ዐቅሙ፨
- ገድልከ፡ መንክር፡ ሶበ፡ ነጸሩ፡ ተደሙ፨
- ዕጹብ፡ እንዘ፡ ይብሉ፡ መላእክት፡ አርመሙ፨
-
- ሰላም፡ ለዝክረ፡ ስምከ፡ በአጽናፈ፡ ዓለም፡ ዘተሰምዐ፨
- ወለሥዕርትከ፡ ድሉል፡ በመዐዛ፡ ዕፍረት፡ ወሚዐ፨
- ፊልሞና፡ ዝክርከ፡ እምዝክረ፡ ቅዱሳን፡ ተበፅዐ፨
- ውስተ፡ መርዐ፡ አመ፡ ይከውን፡ ውውዐ፨
- ሀበኒ፡ ማኅቶተ፡ ወውዱሰ፡ ቅብዐ፨
-
- ሰላም፡ ለአፉከ፡ ዘይወልድ፡ ወትረ፡ ዝናመ፡ መዝሙር፡ ወነጐድጓድ፨
- ወለአስናኒከ፡ ንጹሕ፡ እምፍተታተ፡ ጽዕድው፡ በረድ፨
- ፊልሞና፡ ጳውሎስ፡ ዘላፌ፡ ረሲዓን፡ አይሁድ፨
- እፎ፡ ተዐገሥከ፡ ተመትሮ፡ አእጋር፡ ወእድ፨
- እምፈተውኩ፡ ተሳትፎ፡ ግብርከ፡ ዋሕድ፨
-
- ሰላም፡ ለሕፅንከ፡ ምርፋቀ፡ በረከት፡ ወጸጋ፨
- ወለአእዳዊከ፡ ስፉሓት፡ ተሰርግዎ፡ ወርቅ፡ እንተ፡ ኀደጋ፨
- ዕንቈ፡ አሮን፡ ፊልሞና፡ ለደብረ፡ ዳሬት፡ ሠራዔ፡ ሕጋ፨
- ናዝዘኒ፡ እግዚኦ፡ ምስለ፡ ኅሩያን፡ እንግልጋ፨
- ለሕዙነ፡ ነፍስ፡ ዘሐመ፡ በሥጋ፨
-
- ሰላም፡ ለፀአተ፡ ነፍስከ፡ እንበለ፡ ምማቴ፡ ወፍርሀት፨
- ወለበድነ፡ ሥጋከኒ፡ ዘመዐዛሁ፡ ዕፍረት፨
- በእንተ፡ ኢየሱስ፡ ክርስቶስ፡ ምቱረ፡ አጽባዕት፨
- ንሥኦሙ፡ ለደቂቅከ፡ በጸሎትከ፡ ቅድስት፨
- ኀበ፡ ማኅበረ፡ በኵር፡ ሀለዉ፡ ተንሢኦሙ፡ እሞት፨
-
- ሰላም፡ ለግንዘትከ፡ ዘመዐዛሁ፡ አበሜ፨
- ወለዝኅርከኒ፡ ክልእተ፡ ዝኅረ፡ ጴጥሮስ፡ ነቅዐ፡ ትርጓሜ፨
- ዐምደ፡ ሃይማኖት፡ ፊልሞና፡ እንተ፡ ትሰመይ፡ ቀዋሜ፨
- በእደ፡ ፈቃድ፡ እምቤተ፡ ዐቢይ፡ ቅያሜ፨
- ያውፅአኒ፡ ጸጋከ፡ ቀዋሚ፨
-
- ሰላም፡ ለቆብዐ፡ ርእስከ፡ ዘአርአያሁ፡ አክሊለ፡ ሦክ፨
- ዘቦቱ፡ ይትመዋእ፡ ጸብአ፡ መስቴማ፡ ድሩክ፨
- ውዱሰ፡ ምግባር፡ ፊልሞና፡ መሥመሬ፡ ክርስቶስ፡ አምላክ፨
- ምጥቀኒ፡ ለደቂቅከ፡ ውስተ፡ ሰማያዊት፡ ፈለክ፨
- ምስለ፡ እኩታን፡ ቅኑያን፡ ዘሰርክ፨
-
- ናሁ፡ ፈጸምኩ፡ ማሕሌተ፡ መልክእከ፡ ኵሉ፨
- እንዘ፡ ይትራድአኒ፡ ሚካኤል፡ መልአከ፡ ኀይሉ፨
- ለንጉሠ፡ አፍአ፡ ወውስጥ፡ ዘሀሎ፡ ወይሄሉ፨
- ተወከፍ፡ ሊተ፡ ፊልሞና፡ በበ፡ መክፈልቱ፡ ወክፍሉ፨
- ተወክፎተ፡ ስብሐት፡ ለአብ፡ እምወልዱ፡ ይደሉ፨
-
- ሰላም፡ ለከ፡ ፊልሞና፡ ቢጸ፡ ገብረ፡ ክርስቶስ፡ ፈላሲ፨
- ጥበበ፡ ምክረ፡ ከመ፡ ኵሲ፨
- ወኢጌሥከ፡ ቤተ፡ መያሲ፨
-
- ሰላም፡ ለከ፡ እፎ፡ አናኅከ፡ ተዐግሦ፡ ከመ፡ ያዕቆብ፡ ግሙድ፨
- ምትረተ፡ አእጋር፡ ወመዝራዕተ፡ እድ፨
- እስከ፡ በጽሐ፡ ኀበ፡ ክሳድ፨
-
- ሰላም፡ ለከ፡ ምስለ፡ ማኅበራኒከ፡ አባ፡ አርብዓ፡ ወስብዕ፨
- አመ፡ ናዝዝ፡ ወባቍዕ፡ እምክበደ፡ ላህ፡ ወወይሌ፡ ጽኑዕ፨
- ናዝዘኒ፡ በኵሎን፡ ሳዕ፨