Subject
Righteous
ሽታ፡ ልየው፡
Šəttā Ləyaw
Šəttā Ləyaw
Šəttā Ləyaw
Šəttā Ləyaw
Malkəʾ
-
- ሰላም፡ ለዝክረ፡ ስምከ፡ በአድያመ፡ ማርቆስ፡ ዘተዐውቀ፨
- ወለሥዕርትከ፡ ግልቡብ፡ መልበሰ፡ ገብረ፡ አብ፡ ጽድቀ፨
- ወልደ፡ ገብርኤል፡ መልአክ፡ ዘትመስል፡ ወርቀ፨
- ፈረየ፡ አምኣተ፡ ወአመክዐበ፡ ጥቀ፨
- ውስተ፡ ምድር፡ ሠናይ፡ ሥጋከ፡ ዘወድቀ፨
-
- ሰላም፡ ለርእስከ፡ ወለገጽከ፡ ብሩህ፨
- ወለቀራንብቲከ፡ ሰላም፡ ወለዐይንከ፡ ንጹሕ፨
- በእንተ፡ ዝንቱ፡ ሞትከ፡ ወልደ፡ ገብርኤል፡ ፍሱሕ፨
- እምዐይነ፡ አቡከ፡ ወእምከ፡ እምሰርክ፡ እስከ፡ ነግህ፨
- ከመ፡ ማይ፡ ውሕዙ፡ ሰቆቃው፡ ወላሕ፨
-
- ሰላም፡ ለመቃብሪከ፡ ዘአስተዳለወ፡ ማርቆስ፨
- ለዘያፈቅሮ፡ እምልበ፡ ተክለ፡ ሃይማኖት፡ ንጉሥ፨
- ለወልደ፡ ገብርኤል፡ ዜናዊ፡ ምሉአ፡ ሞገስ፨
- በቃለ፡ ሐሰት፡ ነፋሰ፡ አውሎ፡ ፍጹመ፡ ኢትኤብስ፨
- ዘቈጽላ፡ ኢይትነገፍ፡ ብዕልከ፡ በለስ፨
-
- አብርሃም፡ ወባስልዮስ፡ ከመ፡ አዘዝዎሙ፡ ገብሩ፨
- ለመልአከ፡ ፀሓይ፡ ምስሌሁ፡ እለ፡ በቃለ፡ ጽድቅ፡ ኀብሩ፨
- ወልደ፡ ገብርኤል፡ ሥጋከ፡ እንዘ፡ ይበውእ፡ ውስተ፡ ማኅደሩ፨
- በከዩ፡ ወአስቆቀዉ፡ በሐልዮ፡ አዳም፡ ግብሩ፨
- ለገብረ፡ ሕይወት፡ እንዘ፡ ይትገበር፡ ተዝካሩ፨
- እስመ፡ ወይነ፡ ሰትዩ፡ ወእክለ፡ ተደሩ፨
-
- ሰላም፡ ለአኃዊከ፡ እለ፡ ይነግዱ፡ ባሕረ፨
- ተጽዒኖሙ፡ ሐመረ፨
- ወልደ፡ ገብርኤል፡ ሥጋከ፡ በጊዜ፡ ተቀብረ፨
- ዘረዉ፡ ለነዳያን፡ ወርቀ፡ ወብሩረ፨
- እንዘ፡ ያውሕዙ፡ እምዐይኖሙ፡ አንብዐ፡ መሪረ፨
- እምቅድመ፡ ገጾሙ፡ እስመ፡ ኀጥኡ፡ ኪያከ፡ ክቡረ፨
-
- ሰላም፡ ለኀዘንኪ፡ ዘያውዒ፡ አማዑተ፨
- ወያነድድ፡ ኵልያተ፨
- ወለተ፡ ጊዮርጊስ፡ ወይን፡ ዘትከውኒ፡ ትፍሥሕተ፨
- ዐይንኪ፡ ማሕየዊ፡ አስተዳለወ፡ ክረምተ፨
- እስመ፡ ሲሳየ፡ ሕዝብ፡ ወልድኪ፡ ተዘርአ፡ መሬተ፨