Details
-
- እምአፈ፡ ልቡና፡ ዘይወፅዑ፡ ልሳናተ፡ ጥበብ፡ ወቃል፨
- ጽልመተ፡ ኅሊናየ፡ ይብራህ፡ በመጽሔቶሙ፡ ጽዱል፨
- ለሐዋርያተ፡ ክርስቶስ፡ እጽሕፍ፡ አምጣነ፡ ብየ፡ ክሂል፨
- በቀለመ፡ ፍቅር፡ መልክአ፡ ጻማ፡ ወገድል፨
- ዘይከውነነ፡ ማዕይት፡ እምሀጕል፨
-
- ሰላም፡ ለዝክረ፡ ስምክሙ፡ እምቅድመ፡ ዓለማት፡ ዘጠበጠበ፨
- በዐምደ፡ ወርቅ፡ ዘላዕሉ፡ እንዘ፡ ይኔጽር፡ ይቡበ፨
- ሐዋርያተ፡ ክርስቶስ፡ እምአርዌ፡ ዘነሣእክሙ፡ ጥበበ፨
- ወእምነ፡ ርግብ፡ ተየውሆ፡ መንፈስ፡ ካዕበ፨
- ታፈደፍዱ፡ ጽድቀ፡ ወትነሥኡ፡ ዐስበ፨
-
- ሰላም፡ ለመቃብሪክሙ፡ እንተ፡ ይእቲ፡ ሰሌዳ፨
- ሞገሰ፡ ረድኤት፡ ዘየዐውዳ፨
- ሐዋርያተ፡ ክርስቶስ፡ ሰማዕታት፡ አብያጸ፡ ጊዮርጊስ፡ ዘልዳ፨
- ጸሐፍዋ፡ በልብክሙ፡ ለማሕሌትየ፡ እንግዳ፨
- ከመ፡ ማርያም፡ ጸሐፈት፡ ነገሮ፡ ለወልዳ፨
-
- አምኃ፡ ስብሐት፡ ሕጹጽ፡ ወአኮ፡ ፍድፉዴ፨
- ለቃልክሙ፡ እስመ፡ በርዴ፨
- ሐዋርያተ፡ ክርስቶስ፡ ተንብሉ፡ ኵልክሙ፡ በኢቡአዴ፨
- ቅድመ፡ እግዚእክሙ፡ በቃልክሙ፡ አዋዴ፨
- ከመ፡ ያርኁ፡ ሊተ፡ ዘገነት፡ ዴዴ፨
-
- ስብሐት፡ ይደሉ፡ ለሥላሴ፡ ለልብየ፡ ዘመአዶ፨
- በሰዋስወ፡ ብርሃን፡ ወሪዶ፨
- ለሐዋርያተ፡ ክርስቶስ፡ እጽሕፍ፡ ዜና፡ ኂሩቶሙ፡ በአንጐድጕዶ፨
- ይስምዕ፡ በአናቶት፡ ወበመድብያ፡ ተምኢዶ፨
- ከመ፡ ባህለ፡ ትንቢት፡ ተአምኅ፡ ዘሐጌ፡ ወሀዶ፨
-
- ሠለስተ፡ ይምንየ፡ ሠለስተ፡ ጽግምየ፨
- ሠለስተ፡ ቅድሜየ፡ ሠለስተ፡ ድኅሬየ፨
- ሐዋርያተ፡ ክርስቶስ፡ ቡሩካን፡ ንዑ፡ ኀቤየ፨
- ከመ፡ ትፈጽሙ፡ መፍቅደ፡ ልብየ፨
- ወከመ፡ ትፅብዑ፡ ለብእሲ፡ ፀርየ፨