መልክአ፡ ገላውዴዎስ፡ Malkəʾa Galāwdewos

Image of Galāwdewos

Malkəʾ

    • በስመ፡ እግዚአብሔር፡ ረቂቅ፡ መንፈስ፨
    • ዘተዋሕዶ፡ ፍጹመ፡ በግዕዘ፡ ሥጋ፡ ወነፍስ፨
    • ወጥን፡ ማሕሌተ፡ ለመልክእከ፡ ቅዱስ፨
    • ንጹሕ፡ ገላውዴዎስ፡ ዘአንጽሐከ፡ ክርስቶስ፨
    • እምቅድመ፡ ትትወለድ፡ እማሕፀን፡ ወትትወለድ፡ እምከርሥ፨
    • ሰላም፡ ለዝክረ፡ ስምከ፡ መታሬ፡ አሕዛብ፡ አእላፍ፨
    • እስመ፡ ትርጓሜሁ፡ መጥባሕት፡ ወበሊሕ፡ ሰይፍ፨
    • ገላውዴዎስ፡ ሕቀ፡ እምነ፡ ሐሳቡ፡ ትሩፍ፨
    • ማሕሌተ፡ ስምከ፡ ከመ፡ የሀሉ፡ ለዘልፍ፨
    • እምተረፈ፡ ልብየ፡ ናሁ፡ እነብብ፡ በአፍ፨
    • ሰላም፡ ለገጽከ፡ ውስተ፡ ገጸ፡ ኵሎ፡ ጸላእቱ፨
    • ፍርሀት፡ ወረዐድ፡ ዘይወዲ፡ በተመይጦቱ፨
    • ገላውዴዎስ፡ ትቤ፡ በመካነ፡ ትምህርት፡ ለለ፡ ዕለቱ፨
    • ለዋሕድ፡ ክርስቶስ፡ እምነ፡ ባሕርያት፡ ክልኤቱ፨
    • ተባዕደ፡ ፈቃድ፡ ወምግባር፡ ኢሀለወ፡ ቦቱ፨
    • ሰላም፡ ለአስናኒከ፡ ዘይመስላ፡ ሐሊበ፨
    • ስብሐተ፡ ይሁዳ፡ ንጉሥ፡ እስመ፡ ላዕሌሆን፡ ተዐትበ፨
    • ገላውዴዎስ፡ ለከ፡ ሶበ፡ ጸጋ፡ ሰማይ፡ ተውህበ፨
    • ርኁባን፡ በዘመንከ፡ ተመልኡ፡ ጸጋበ፨
    • ወአብዳንኒ፡ ረከቡ፡ ጥበበ፨
    • ሰላም፡ ለእስትንፋስከ፡ ዘኢይጤየቅ፡ ራእዩ፨
    • እስመ፡ ፍጥረቱ፡ ረቂቅ፡ ወኅቡእ፡ ባሕርዩ፨
    • ገላውዴዎስ፡ ንጉሥ፡ ለእግዚአብሔር፡ ባሕርዩ፨
    • ይትሌዐል፡ ዝክረ፡ ስምከ፡ ወለዝክረከ፡ ዕበዩ፨
    • እምእለ፡ አዕበዩ፡ ዝክረ፡ ወስመ፡ ሰመዩ፨
    • ሰላም፡ ለክሣድከ፡ በእንተ፡ ክርስቶስ፡ ዘተመትረ፨
    • ምስለ፡ ሰማዕታት፡ ኄራን፡ ከመ፡ ይሴባሕ፡ ወትረ፨
    • ገላውዴዎስ፡ ኪያከ፡ ሶበ፡ አምላክ፡ አፍቀረ፨
    • ሥልጣነ፡ ንግሥከ፡ በክብረ፡ ሥልጣኑ፡ አከበረ፥
    • ወበዕለተ፡ ሞቱ፡ ክብርት፡ ሞትከ፡ ኀብረ፨
    • ሰላም፡ ለእንግድዓከ፡ ዘከብዶ፡ ልቡና፨
    • ወለሕፅንከ፡ ሰላም፡ ምርፋቃተ፡ ጥበብ፡ ዘኮና፨
    • ለሰብለ፡ ወንጌል፡ ገላውዴዎስ፡ ፍሬ፡ ማሕፀና፨
    • ከመ፡ ኢይጥፋእ፡ እምአባልከ፡ ወኢየአትት፡ ምልክና፨
    • ያዕቆብ፡ ተነበየ፡ ወዐቀመ፡ ዜና፨
    • ሰላም፡ ለመዛርዒከ፡ ከመ፡ ቀስተ፡ ብርት፡ ጽኑዕ፨
    • ጊዜ፡ ተቃትሎ፡ ወጸብእ፨
    • ገላውዴዎስ፡ ይስሐቅ፡ አመ፡ ትመውት፡ በስምዕ፨
    • ለምንት፡ ከመ፡ ልማዱ፡ ለቤዝዎ፡ በግዕ፨
    • ሶበ፡ አእመረ፡ ዐሥበከ፡ ዘግፍዕ፨
    • ሰላም፡ ለአጽፋረ፡ እዴከ፡ አርእስተ፡ አጻብዕ፡ ያሠርግዋ፨
    • ለለ፡ አሐቲ፡ አሐቲ፡ በከተማሆን፡ ዘይሄልዋ፨
    • አንተ፡ ውእቱ፡ ገላውዴዎስ፡ መያጤ፡ ጼዋ፨
    • በትረ፡ መንግሥት፡ ቀዋሚ፡ እንተ፡ ሠረፅከ፡ እምሥርዋ፨
    • ለጕንደ፡ መንግሥትከ፡ ዐቢይ፡ ዘትትቄደስ፡ ነዋ፨
    • ሰላም፡ ለሥነ፡ መልክእከ፡ ሥነ፡ ልብነ፡ ድንግል፡ ረቡኒ፨
    • እምውሉደ፡ ሰብእ፡ ኵሉ፡ በሞገሰ፡ ላህይ፡ ዘይሤኒ፨
    • ገላውዴዎስ፡ ነድ፡ ዘአውዐይከ፡ ትምህርተ፡ ማኒ፨
    • ፍዳ፡ ተፈሥሑ፡ በየማንከ፡ መድኃኒ፨
    • አኅዘኖሙ፡ ለሕዝብከ፡ ሞትከ፡ ማኅዘኒ፨
    • ሰላም፡ ለፀአተ፡ ነፍስከ፡ ጊዜ፡ ተስዓቱ፡ ሰዓታ፨
    • ለዕለት፡ እምርት፡ ዲዮናስዮስ፡ ዘየአኵታ፨
    • ገላውዴዎስ፡ ንቃሕ፡ ወተንሥእ፡ ለረዲኦታ፨
    • ነሢአከ፡ ከመ፡ ልማድ፡ ኲናተ፡ መዊእ፡ ወወልታ፨
    • ናሁ፡ ለኢትዮጵያ፡ ጸብአ፡ ፀር፡ አገታ፨
    • ሰላም፡ ለግንዘተ፡ ሥጋከ፡ አምሳለ፡ ጊዮርጊስ፡ ሰማዕት፨
    • በአእዳወ፡ ክልኤ፡ አግብርት፨
    • ገላውዴዎስ፡ ዐምድ፡ ዘቁመትከ፡ ጽንዕት፨
    • ዲበ፡ መታግር፡ ቄርሎስ፡ ሰባኪ፡ ወዲዮስቆሮስ፡ ሰክተት፨
    • እፎ፡ መሠረተከ፡ አንቀልቀለ፡ ሞት፨
    • ተዘኪረከ፡ ክርስቶስ፡ በእንተ፡ ስምከ፡ ስምዖ፨
    • ዘሰይፈ፡ ጸላኢ፡ መተሮ፡ ወኲናተ፡ ፀር፡ ወግዖ፨
    • በእንተ፡ ዝንቱ፡ ሥጋከ፡ ኅብስተ፡ ሕይወት፡ ዘንሰውዖ፨
    • ገነት፡ ኀበ፡ ተርኅወ፡ ለገላውዴዎስ፡ አብኦ፨
    • ወመንግሥትአ፡ ሚናስ፡ ዕቀብ፡ እግዚኦ፡ እግዚኦ፨
    • ሰማዕታት፡ ምስለ፡ ገላውዴዎስ፡ ሰአሉ፨
    • ቅድመ፡ ገጸ፡ አምላክ፡ ክርስቶስ፡ ወእግዚእ፡ ዘላዕለ፡ ኵሉ፨
    • ሣህለ፡ ክርስቲያን፡ ይብዛኅ፡ ለሚናስ፡ በመዋዕሉ፨
    • ለፀርሰ፡ ቃለ፡ ትምህርቱ፡ አብጥሉ፨
    • እስከ፡ ማእዜኑ፡ ላዕሌነ፡ ይትሜካሕ፡ በኀይሉ፨

Tarafa Malkəʾ

    • አብየ፡ ላሐ፡ ነፍስየ፡ አምሳለ፡ ውሒዝ፡ ዘገዳም፨
    • ከመ፡ አብየ፡ ላሐ፡ ለኢየሩሳሌም፨
    • አመ፡ አብየ፡ ፍትሐ፡ ሞት፡ በስነነ፡ ኲናት፡ ጸሊም፨
    • ገላውዴዎስ፡ እንዘ፡ ንፍስከ፡ ኅርትምተ፡ በቀል፡ ቂም፨
    • ወአእዳዊከ፡ ንጹሓት፡ እምደም፨
    • ገላውዴዎስ፡ ዘትሬኢ፡ ዘውስተ፡ ዐይነ፡ ቢጽከ፡ ኀሠረ፨
    • ወኢታነውሮ፡ ለብእሲ፡ እንተ፡ ይሠረጎ፡ ነዉረ፨
    • ተዝካረ፡ ሞትከ፡ ናሁ፡ ኮኖሙ፡ መዝሙረ፨
    • ለእለ፡ ይፈልሱ፡ ርሑቀ፡ ብሔረ፨
    • ወለእለኒ፡ ይነግዱ፡ ባሕረ፨
    • ሰላም፡ ለርግዘትከ፡ ከመ፡ ጊዜ፡ ሐለይክዎ፡ በአንክሮ፨
    • አአነብዝ፡ ገባእኩ፡ እምፍናወ፡ ኀዘን፡ ወአንጽሮ፨
    • ባሕቱ፡ ነቃሕኩ፡ ሶበ፡ ለክርስቶስ፡ እኔጽሮ፨
    • ወአስተሐይጽ፡ በነፍስየ፡ ዘዕለተ፡ ዐርብ፡ ጻዕሮ፨
    • ከመ፡ ገቦሁ፡ ረገዙ፡ ወቀነዉ፡ እግሮ፨