Subject
Malkəʾ
-
- ሰላም፡ ለፅንሰትከ፡ ለእግዚአብሔር፡ በሥምረቱ፨
- እምሥጋ፡ ንጹሓን፡ አሐዱ፡ ወአኮ፡ ክልኤቱ፨
- ወበእንተዝ፡ ታዴዎስ፡ ውድሶተከ፡ እፈቱ፨
- እስከ፡ እፌጽም፡ ዘወጠንኩ፡ ተራድአኒ፡ ባሕቱ፨
- እስመ፡ ታሠልጥ፡ ወትክል፡ ለጻድቅ፡ ጸሎቱ፨
-
- ሰላም፡ ለልደትከ፡ በፍጻሜ፡ ትውልድ፡ ዕሥራ፨
- እምቤተ፡ ሌዊ፡ ወሳዶቅ፡ ካህናተ፡ ቀዳሚት፡ ደብተራ፨
- ወልደ፡ በረከት፡ ታዴዎስ፡ ለነገረ፡ ይስሐቅ፡ ዘትትናደራ፨
- ይትባረክ፡ አቡከ፡ ዜና፡ ሕይወት፡ ከመ፡ አብርሃም፡ ዘታራ፨
- ወቅዱስ፡ ሕዝባ፡ እምከ፡ ዳግሚት፡ ሳራ፨
-
- ሰላም፡ ለዝክረ፡ ስምከ፡ ታዴዎስ፡ ዘተብህለ፨
- በአፈ፡ ካህናት፡ ክቡራን፡ እለ፡ ይፌከሩ፡ ወንጌለ፨
- እምብዕለ፡ ሥጋ፡ ታዴዎስ፡ እንተ፡ አብደርከ፡ መስቀለ፨
- ለቢወከ፡ ከመ፡ አኅለፈ፡ በስቍረተ፡ መርፍዕ፡ ገመለ፨
- መኵሴ፡ ስምከ፡ ዘገሠጸ፡ ታዴዎስ፡ ባዕለ፨
-
- ሰላም፡ ለሥዕርተ፡ ርእስከ፡ ዘይትአመር፡ ባቲ፨
- ጊዜ፡ ተላጽዮ፡ ወብቍላት፡ ትንሣኤ፡ ሥጋ፡ መዋቲ፨
- እምደብረ፡ ድኁኃን፡ ታዴዎስ፡ አበ፡ ሃይማኖት፡ ኢተአታቲ፨
- እምከሰ፡ ደብረ፡ ሊባኖስ፡ ይእቲ፨
- ባሕቱ፡ በዕፃ፡ ነሥአተከ፡ ዛቲ፨
-
- ሰላም፡ ለርእስከ፡ ዘተዐገሠ፡ በሕቁ፨
- ሕማመ፡ ተኰርዖ፡ በህላት፡ ከመ፡ ርእስ፡ ሊቁ፨
- ታዴዎስ፡ ነዓ፡ ከመ፡ ትናዝዞሙ፡ ለደቂቁ፨
- ምኔትከ፡ ደብረ፡ ድኁኃን፡ እስመ፡ በምዝባሬሃ፡ ታስቆቁ፨
- ወዕጓለ፡ ቋዕ፡ በዐውዳ፡ ይነቁ፨
-
- ሰላም፡ ለመልክእከ፡ ሥነ፡ ላሕዩ፡ ዘይትፈቶ፨
- እምጼና፡ ገዳም፡ ዘወርኀ፡ ቲቶ፨
- እመ፡ ኢኮነ፡ ከማከ፡ ታዴዎስ፡ ብእሴ፡ አእኵቶ፨
- ሰብእሰ፡ ይመስል፡ ከንቶ፨
- ወከመ፡ ጽላሎት፡ በበክ፡ ያጠፍእ፡ ሕይወቶ፨
-
- ሰላም፡ ለፀአተ፡ ነፍስከ፡ መንገለ፡ ህላዌ፡ ዘላዕሉ፨
- ለመልአከ፡ ሕይወት፡ ሚካኤል፡ በዕለተ፡ ቅዱስ፡ በዓሉ፨
- አመ፡ ሞትከ፡ ታዴዎስ፡ መስቆቅዋን፡ ይቤሉ፨
- ወይሌ፡ ወይሌ፡ ለደቂቀ፡ አዳም፡ ይደሉ፨
- እስመ፡ እመቃብር፡ ወሞት፡ ኢያመሥጥ፡ ኵሉ፨
-
- ሰላም፡ ለመቃብሪከ፡ እምጻማ፡ ብዙኅ፡ ተመንድቦ፨
- ዘአዕረፍከ፡ ባቲ፡ በወርኀ፡ ሚካኤል፡ ወርኀ፡ የብቦ፨
- ኢትክልአኒ፡ ታዴዎስ፡ ድርሳነ፡ ወአንብቦ፨
- መኑ፡ ዘይሬኢ፡ መርዔቶ፡ ወኢይስቲ፡ ሐሊቦ፨
- ወመኑ፡ ዓሳብ፡ ዘየኀድግ፡ ዐስቦ፨
-
- በከመ፡ ተወከፈ፡ እግዚእከ፡ በአንቀጸ፡ ምኵራብ፡ ዘአይሁድ፨
- ጸሪቀ፡ መበለት፡ ኅዳጠ፡ እመባአ፡ አብዕልት፡ ፍድፉድ፨
- ጠቢበ፡ ሠናያት፡ ታዴዎስ፡ ተወከፈኒ፡ ለአብድ፨
- ዘአቅረብኩ፡ ለከ፡ አስተብቍዖ፡ እንዘ፡ እጽሕፍ፡ በእድ፨
- ሶበ፡ አገበረኒ፡ ኂሩቱ፡ ለወልድ፨
-
- ሰላም፡ ለታዴዎስ፡ ዘደብረ፡ ሊባኖስ፡ ወላዲቱ፨
- ወደብረ፡ ድኁኃን፡ ምኔቱ፨
- አመ፡ ምድረ፡ ዋዕይ፡ አብእዎ፡ በእንተ፡ ሃይማኖት፡ ጊዜ፡ ስደቱ፨
- አንቅዐ፡ ማየ፡ ትእምርት፡ እንዘ፡ ዓሣተ፡ ባሕር፡ ውስቴቱ፨
- እስከ፡ ሐራ፡ ንጉሥ፡ አንከሩ፡ ወሰገዱ፡ ሎቱ፨
-
- ሰላም፡ ለፀአተ፡ ነፍስከ፡ ዕለተ፡ ብርሃን፡ ወቅዳሴ፨
- አመ፡ ፲ወ፫፡ ለወርኀ፡ ነሐሴ፨
- ታዴዎስ፡ ባሕረ፡ ዘከፈልከ፡ በስመ፡ ሥላሴ፨
- አባ፡ አባ፡ አሣእኒከ፡ ብናሴ፨
- አባ፡ ከፋሌ፡ ባሕር፡ ዳግማይ፡ ሙሴ፨