Details
-
- ሰላም፡ ለዝክረ፡ ስምከ፡ ወለሥዕርተ፡ ርእስከ፡ ድሉል፨
- ለርእስከኒ፡ ወለገጽከ፡ ጽዱል፨
- ገብረ፡ ክርስቶስ፡ አጽቀ፡ ንጉሠ፡ ሮም፡ ኮል፨
- ኣእምር፡ ስእለተከ፡ ቅድመ፡ ወልደ፡ አምላክ፡ ልዑል፨
- ከመ፡ ገራህተ፡ ሰብእ፡ ይሠምር፡ ወይሠርጽ፡ ሐምል፨
-
- ሰላም፡ ለቀራንብቲከ፡ ወለአዕይንቲከ፡ ምስለ፡ አእዛን፨
- ኅሩማተ፡ ነገር፡ ምኑን፨
- ገብረ፡ ኢየሱስ፡ ወርቅ፡ በነደ፡ መከራ፡ ፍቱን፨
- ምርሐኒ፡ እግዚኦ፡ ፍኖተ፡ ምናኒ፡ ብርሃን፨
- ዘያበርህ፡ ወትረ፡ ልበ፡ ሰብእ፡ ጻድቃን፨
-
- ሰላም፡ ለበድነ፡ ሥጋከ፡ ወለግንዘተ፡ ሥጋከ፡ በልብሰ፡ ከርቤ፨
- ወለመቃብሪከ፡ ቍድስ፡ ምልዕተ፡ ዕጣን፡ ይባቤ፨
- ገብረ፡ ኢየሱስ፡ ክርስቶስ፡ ዘተወከፍከ፡ ምንዳቤ፨
- አርሕቅ፡ ሊተ፡ ምንዳቤየ፡ እንዘ፡ ትከውን፡ ዐቃቤ፨
- ወትከውነኒ፡ ለሊከ፡ መጋቤ፨
-
- ሰላም፡ ለፍልሰተ፡ ሥጋከ፡ ኀበ፡ ወልደ፡ አምላክ፡ ዘበጽሐ፨
- እንበለ፡ ምሕረትከሰ፡ ገብረ፡ ኢየሱስ፡ አቡሃ፨
- ዘይደልወከ፡ ክብር፡ እስመ፡ ኢያቅረበት፡ ግብረ፡ አፉሃ፨
- ለነፍስየ፡ ኢመዋቲት፡ እስከ፡ ታፈደፍድ፡ ላሐ፨
- እምደለወ፡ ላቲ፡ ፍትሐ፡ ሞት፡ ዕፃሃ፨
- ተረፈ፡ መልክእ፡
-
- ሰላም፡ ለከ፡ ገብረ፡ ኢየሱስ፡ አስተምሕር፡ ኀበ፡ ዘኵሎ፡ ፈጠረ፨
- ምስሌከ፡ እኩን፡ ዘአምላክ፡ ገብረ፨
- ዘቀርበ፡ ወዘተፈቅረ፨
-
- ሰላም፡ ለከ፡ ገብረ፡ ኢየሱስ፡ ይቤሎ፡ ለፈጣሪሁ፡ ክርስቶስ፨
- እምይእዜሰ፡ እንከ፡ ኣኀሥሥ፨
- በግዐ፡ መዊት፡ ምዕረ፡ ዘያስተናፍስ፨
- እምሥቃዩ፡ ለዘቦ፡ ተጽናስ፨