Subjects
Martyr
እስጢፋኖስ፡
ʾƎsṭifānos
Stephen
Stephen
Malkəʾ
-
- እምጥበብከ፡ ስፉሕ፡ ወእምጸጋከ፡ ረቂቅ፨
- እንተ፡ ተበጽዐ፡ ፈድፋደ፡ በአፈ፡ ኅሩያን፡ ደቂቅ፨
- እስጢፋኖስ፡ ክፍለኒ፡ በሥምረተ፡ ሰላም፡ ወጽድቅ፨
- አሠረከ፡ እትሉ፡ እግዚኦ፡ ወፍኖተከ፡ በጻሕቅ፨
- እስመ፡ ጸጋ፡ ዘንቱ፡ ይትበደር፡ እምብሩር፡ ወወርቅ፨
-
- ሰላም፡ ለዝክረ፡ ስምከ፡ ሆህያተ፡ አሌፍ፡ እምጥንቱ፨
- ወለሥዕርተ፡ ርእስከ፡ ወለገጽከ፡ በደመ፡ ውግረት፡ ሠርጐ፡ ትርሲቱ፨
- እስጢፋኖስ፡ መምህር፡ ወሊቀ፡ ዲያቆናት፡ ሰባዕቱ፨
- አርትዕ፡ ሊተ፡ እግዚኦ፡ ልዕላኤ፡ አፉየ፡ ዝንቱ፨
- ውዳሴ፡ ዚአከ፡ ከመ፡ አንብብ፡ ቦቱ፨
-
- ሰላም፡ ለቀራንብቲከ፡ ወለአዕይንቲከ፡ ምስለ፡ አእዛን፨
- ወለመላትሒከ፡ ቀይሕ፡ አምሳለ፡ ሮማን፨
- እስጢፋኖስ፡ ዲያቆን፡ ወሠዋዔ፡ ሐዲስ፡ ቍርባን፨
- ቤዛ፡ ይኩነኒ፡ ለወልድከ፡ ውስተ፡ ዐውደ፡ አይሁድ፡ መካን፨
- ውግረተ፡ ዚአከ፡ በብዝኅ፡ አእባን፨
-
- ሰላም፡ ለፍልሰተ፡ አፅምከ፡ ዘተረክበ፡ እምተከብቶ፨
- አመ፡ ፲ወ፭፡ ለወርኀ፡ መስከረም፡ ቲቶ፨
- ተወኪፈከ፡ እስጢፋኖስ፡ መሥዋዕተ፡ ሰላምየ፡ በኢያስትቶ፨
- ምስሌየ፡ ግበር፡ እግዚኦ፡ ለሠናይትከ፡ ትእምርቶ፨
- ናሁ፡ ለውዳሴከ፡ ርኢኩ፡ ማኅለቅቶ፨
-
- እስጢፋኖስ፡ አእላፍ፡ አመ፡ ኃጥኡከ፡ በሞት፨
- ከመ፡ በከዩ፡ ፈድፋደ፡ እምኍልቈ፡ አርብዓ፡ ዕለት፨
- በእንተ፡ ጌጋይየ፡ ኢትትኀየይ፡ እስጢፋኖስ፡ ሰማዕት፨
- እመሰ፡ ተሐየይከ፡ እምገቢረ፡ ብዙኅ፡ ጸሎት፨
- ተስፋ፡ ድኅነተ፡ ነፍስ፡ አልብየ፡ በአፍአ፡ ወቤት፨
-
- በየማነ፡ አምላክ፡ ለወልድ፡ ከመ፡ ነጸርከ፡ በግርማ፨
- አመ፡ ተልዕለ፡ ዐይንከ፡ መንገለ፡ ልዑል፡ ራማ፨
- ዐይነ፡ ሕሊናየ፡ ክሥት፡ እስጢፋኖስ፡ ለባሴ፡ ፃማ፨
- እትሉ፡ ፍና፡ ዚአሁ፡ ለጸዊረ፡ መስቀል፡ ባማ፨
- ወተግሣጻቲሁ፡ እትወከፍ፡ ለብፁዕ፡ በርሶማ፨