Subjects
Trinitarian
ኢየሱስ፡ ክርስቶስ፡
ʾIyyasus Krəstos
Jesus Christ
ʾIyyasus Krəstos
Jesus Christ
Malkəʾ
-
- በእንተ፡ ስምከ፡ ኢየሱስ፡ ዘተጸውዐ፡ ቀዲሙ፨
- በርእሰ፡ ኢያሱ፡ መስፍን፡ ለምድረ፡ ከላውዴዎን፡ ነሳቴ፡ ጥቅሙ፨
- በመንፈሰ፡ ጸጋከ፡ አልዕል፡ ለትሕትና፡ ልብየ፡ እንበለ፡ ዐቅሙ፨
- ከመ፡ እጽሐፍ፡ በሥምረትከ፡ ብካየ፡ መስቀል፡ ስሙ፨
- በብርዐ፡ ሰቆቃው፡ ውዑይ፡ ዘአንብዕ፡ ቀለሙ፨
-
- እበኪ፡ በእንተ፡ ሥዕርትከ፡ እንዘ፡ ከመ፡ ጸምር፡ ጸዐዳ፨
- በደመ፡ ኵርዐት፡ ዘቅእሐ፡ እመ፡ ተእሰርከ፡ እንበለ፡ ዕዳ፨
- አልብሰኒ፡ ክርስቶስ፡ ዘልብሰ፡ ትሕትናከ፡ ከለሜዳ፨
- እመ፡ ምጽአትከ፡ ለተወክፎ፡ መንግሥት፡ ወፍዳ፨
- እምገጸ፡ ሥነ፡ ቶማስ፡ ይብራህ፡ ዘሠርቁ፡ መርሙዳ፨
-
- እበኪ፡ በእንተ፡ ርእስከ፡ ዘወርቀ፡ ቄፋዝ፡ አምሳሉ፨
- ተወካፌ፡ ዝብጠት፡ በበትር፡ ወዘአክሊለ፡ ሦክ፡ ሠርጐ፡ አክሊሉ፨
- ኢየሱስ፡ ክርስቶስ፡ ለመስቀል፡ ትእምርተ፡ ኀይሉ፨
- መስቀለከ፡ አእዳውየ፡ ጊዜ፡ ለተሐትሞ፡ አልዐሉ፨
- ምትሐተ፡ ጸላኢ፡ ይትኀፈር፡ ወይትሀጐል፡ ኵሉ፨
-
- እበኪ፡ በእንተ፡ መቃብሪከ፡ ከመ፡ ማርታ፡ ወማርያ፨
- ስብሐተ፡ ሥልጣንከ፡ ግብተ፡ እምቅድመ፡ ይርአያ፨
- መልአከ፡ ፋሲካየ፡ ክርስቶስ፡ በእግረ፡ መስቀልከ፡ ሐዋርያ፨
- አብስረኒ፡ ሊተ፡ ከመ፡ ኬፋ፡ ለትንሣኤከ፡ ዕበያ፨
- ወከመ፡ በኀይልከ፡ ውስተ፡ ግብ፡ ተዐሥረ፡ ጕህልያ፨
-
- እትፌሣሕ፡ ጥቀ፡ በትንሣኤከ፡ በሌሊተ፡ እሑድ፡ ዘተዐውቀ፨
- አመ፡ መልአከ፡ ሣህል፡ ተርእየ፡ እንዘ፡ ይለብስ፡ መብረቀ፨
- ብርሃነ፡ ትንሣኤከ፡ ክርስቶስ፡ ከመ፡ ቅድመ፡ አንስት፡ ሠረቀ፨
- አብርህ፡ ጸልምቶትየ፡ ዘይገለብበኒ፡ ሠቀ፨
- እንበለ፡ መስቀልከ፡ ሕይወትየ፡ ኢይኩን፡ ህሉቀ፨
-
- ስብሐት፡ ለከ፡ አምላኪየ፡ እንተ፡ ሣረርከ፡ ሰማየ፨
- ስብሐት፡ ለከ፡ ታሕተ፡ ምድር፡ ዘአዕመቀ፡ ቀላየ፨
- ስብሐት፡ ለከ፡ በመስቀል፡ እስመ፡ ቤዘውከ፡ ኪያየ፨
- ኀበ፡ እዝነ፡ ሥጋ፡ ኢሰምዐ፡ ወዐይነ፡ መዋቲ፡ ኢርእየ፨
- በመስቀልከ፡ ስብሐተ፡ ከመ፡ ይዜኑ፡ አፉየ፨
- እምቤተ፡ ሃይማኖት፡ ወንስሓ፡ ኢታውፅእ፡ ነፍስየ፨