Details
-
- በስመ፡ አብ፡ ወወልድ፡ ወመንፈስ፡ ቅዱስ፡ አሐዱ፨
- አምላከ፡ ሰማይ፡ ወምድር፡ ይብል፡ ዘየዐዱ፨
- ክላሐ፡ ምድረ፡ ግብጽ፡ እምዝየ፡ ለረድኤትከ፡ በእዱ፨
- ሰላም፡ ለከ፡ ሚካኤል፡ ዘሰደነ፡ ስብሐት፡ ናርዱ፨
- መዐዛ፡ ቅዳሴከ፡ እስመ፡ ሠምረ፡ ዘብርሃን፡ ማኅፈዱ፨
-
- ሰላም፡ ለዝክረ፡ ስምከ፡ ዘሀሎ፡ ምሉአ፡ ውስተ፡ ኵለሄ፨
- እስመ፡ ትሜግብ፡ ፀሓየ፡ ለዘየኀሥሥ፡ ሱራሔ፨
- ሚካኤል፡ ኵነኒ፡ ፍኖተ፡ ኤፍራታ፡ መራሔ፨
- አሜሃ፡ ለዘከማከ፡ ለሐሴቦን፡ ናዊ፡ ርኅራኄ፨
- እኅትከ፡ ወላዲቱ፡ ለሥግው፡ ኤሎሄ፨
-
- ሰላም፡ ለመታክፍቲከ፡ እለ፡ ምስለ፡ ሥልጣን፡ ትሳተፋ፨
- በመንክር፡ ግብር፡ ወአጽፈ፡ ብርሃን፡ ተአጽፋ፨
- ሚካኤል፡ መልአክ፡ ከመ፡ አንቃሕኮ፡ ለኬፋ፨
- ውስተ፡ ቤተ፡ ሞቅሕ፡ እምዘሰከበ፡ ይኅልፋ፨
- ኆኅተ፡ ሕፃን፡ ተርኅወት፡ ወቆመት፡ በጽንፋ፨
-
- ሰላም፡ ለአጽፋረ፡ እዴከ፡ እለ፡ ብርሃኖን፡ ሊሉይ፨
- እምነ፡ ብሩህ፡ ኵለንታከ፡ ምስብዒተ፡ እምፀሓይ፨
- ሚካኤል፡ ሊቆሙ፡ ለመገብተ፡ እሳት፡ ወማይ፨
- ኮንከ፡ መልአክ፡ ጠል፡ ውስተ፡ ግበ፡ እሳት፡ ውዑይ፨
- ለሠለስቱ፡ ደቂቅ፡እምሕግ፡ ብሉይ፨
-
- ሰላም፡ ለከርሥከ፡ ሠናየ፡ ርኅራኄ፡ ሰሌዳ፨
- ከመ፡ ቀርነ፡ ነጌ፡ ዘኮነ፡ ለተጽሕፎተ፡ ሣህል፡ እንግዳ፨
- ሚካኤል፡ ቀሳሚ፡ ዘጸገየ፡ ጽጌ፡ ረዳ፨
- ደብረ፡ ሃሌ፡ ሉያ፡ ትግበር፡ ወመዐረ፡ ሕይወት፡ ጸዐዳ፨
- ዘታፈቅር፡ ማርያም፡ ወይፈቱ፡ ወልዳ፨
-
- ሰላም፡ ለሐቌከ፡ አአስተርአት፡ ባሕቲታ፨
- ውስተ፡ ዐውደ፡ አርገብ፡ ወሳሬል፡ ቅናተ፡ ብርሃን፡ ቀኒታ፨
- ሚካኤል፡ ሥዕለከ፡ አብአት፡ ውስተ፡ ቤታ፨
- ሠናይተ፡ ምግባር፡ አፎምያ፡ ተውላጠ፡ ምዉት፡ ምታ፨
- ጸላዒ፡ ሠናያት፡ ኢክህለ፡ መዊኦታ፨
-
- አምኃ፡ ሰላም፡ አቅረብኩ፡ ለመልክእከ፡ ጕንደ፡ ወይን፨
- ዘበማየ፡ ክርስቶስ፡ ፈረየ፡ ምሕረተ፡ ኃጥኣን፡ ኑኀ፡ ዘመን፨
- መራሄ፡ አበው፡ ሚካኤል፡ በኢየሩሳሌም፡ መካን፨
- ውስቴታ፡ ይበውእ፡ በረድኤትከ፡ ነባቤ፡ ዝንቱ፡ ድርሳን፨
- ወለዝ፡ ረድኤት፡ አልቦቱ፡ ስዒን፨
-
- ሰላም፡ ለመስቀለ፡ ብርሃን፡ ማሕተሙ፨
- ዘሐትመከ፡ ክርስቶስ፡ መዝገበ፡ ስሙ፨
- ዘተፃብእ፡ ምስስሌከ፡ ምስለ፡ ሠራዊቱ፡ ኵሎሙ፨
- ጐየ፡ ይቤ፡ ምስለ፡ አርያሙ፨
- ወሞእከ፡ ድኅረ፡ ዘሞእከ፡ ቀዲሙ፨
- ተረፈ፡ መልክእ፡
-
- ሰላም፡ ለከ፡ ሚካኤል፡ ሥልጣነ፡ ፈጣሪ፡ ሥሉጥ፨
- ሰላም፡ ለከ፡ ሚካኤል፡ መኰንነ፡ አፍአ፡ ወውስጥ፨
- ሰላም፡ ለከ፡ ሚካኤል፡ መልአከ፡ ሕይወት፡ ለሎጥ፨
- ሰላም፡ ለከ፡ ምዕቅናየ፡ ሠናየ፡ አድኅኖ፡ ምሥያጥ፨
- ሰላመ፡ በዓለከ፡ ገብሩ፡ ዘብዙኅ፡ ወዘኅዳጥ፨