Details
-
- ሰላም፡ ለፅንሰትከ፡ ወለልደትከ፡ በጥይቅና፨
- እማሕፀነ፡ እምከ፡ ህልቃና፨
- ጊጋር፡ ሶርያዊ፡ ንጹሐ፡ ቅዱስ፡ ኅሊና፨
- ዕቀበኒ፡ ወአድኅነኒ፡ በእንተ፡ ማርያም፡ ወሐና፨
- እምእለ፡ ይዴግኑ፡ አፅራር፡ በምቅንን፡ ፍና፨
-
- ሰላም፡ ለዝክረ፡ ስምከ፡ ወለሥዕርተ፡ ርእስከ፡ ጽፉር፨
- ለርእስከ፡ ወለገጽከ፡ ዘያበርህ፡ ከመ፡ አሚር፨
- ገባሬ፡ ተአምር፡ ብዙኅ፡ በማእከለ፡ ሰማይ፡ ወምድር፨
- ዕቀበኒ፡ ወአድኅነኒ፡ እምእደ፡ ጸላኢ፡ ወፀር፨
- ጊጋር፡ ሶርያዊ፡ መኰንን፡ ወበኵር፨
-
- ሰላም፡ ለቀራንብቲከ፡ ወለአዕይንቲከ፡ ይኔጽራ፨
- ለአእዛኒከ፡ ወለመላትሒከ፡ ምስሌሆን፡ እንዘ፡ የኀብራ፨
- ጊጋር፡ ሶርያዊ፡ ዘሰማይ፡ ሐራ፨
- ምስለ፡ ቢጽከ፡ ጊዮርጊስ፡ ወምስለ፡ ቢጽከ፡ መርቆራ፨
- ከመ፡ ተባልሐኒ፡ ነዓ፡ እምክቡድ፡ መከራ፨
-
- ሰላም፡ ለአእናፊከ፡ ወለከናፍሪከ፡ እለ፡ ተግህሣ፨
- ለአፉከ፡ ወለአስናኒከ፡ እለ፡ ኢይበልዓ፡ ቆዐ፡ አበሳ፨
- ጊጋር፡ ሶርያዊ፡ ለስመ፡ ሥላሴ፡ እንተ፡ ትቄድሳ፨
- አፅራር፡ ዘበእንቲአየ፡ እስመ፡ አብዝኁ፡ ኀሠሣ፨
- ይቀትልዎ፡ ለሥጋየ፡ ዘርህብት፡ ነፍሳ፨
-
- ሰላም፡ ለልሳንከ፡ ወለቃልከ፡ ሐዋዝ፨
- ለእስትንፋስከ፡ ወለጕርዔከ፡ ሠራበ፡ ስቴ፡ ዘሕምዝ፨
- ጊጋር፡ ሶርያዊ፡ ጸዋሬ፡ ሳድስ፡ ትእዛዝ፨
- እጸርሕ፡ መንገክልከ፡ እመ፡ በጽሐኒ፡ ትካዝ፨
- ከመ፡ ታድኅነኒ ሊተ፡ እምክቡድ፡ ጋዕዝ፨
-
- ሰላም፡ ሰላም፡ ለክሳድከ፡ እብሎ፨
- ለመትከፍትከ፡ ሰላም፡ ወለዘባንከ፡ ለሥቃየ፡ ጊዮርጊስ፡ እንተ፡ አዘሎ፨
- ጊጋር፡ ሶርያዊ፡ ለነገረ፡ ጸብእ፡ ዘታቀልሎ፨
- ዕቀበኒ፡ ወአድኅነኒ፡ እምተቀሥፎ፡ አካል፡ ወእምተቀትሎ፨
- እምእደ፡ ጸላኢ፡ ወፀር፡ ዘያማስን፡ ኵሎ፨
-
- ሰላም፡ ለእንግድዓከ፡ ወለሕፅንከ፡ ምስለ፡ አእዳው፨
- ምስለ፡ መዛርዕ፡ ወኵርናዕ፡ ወለእመትከ፡ ምንትው፨
- ጊጋር፡ ሶርያዊ፡ ሰማዕተ፡ ፈጣሪ፡ ሕያው፨
- በሎሙ፡ ለአብያጺከ፡ ወለዘዚአከ፡ አኃው፨
- ለረዲአ፡ ገብርየ፡ ንሑር፡ በፍኖት፡ ዘበድው፨
-
- ሰላም፡ ለእመትከ፡ ወለእራኅከ፡ መጣኒ፨
- ምስለ፡ አጽፋር፡ ቀኖተ፡ ኀጺን፡ ወመቃኒ፨
- ጊጋር፡ ሶርያዊ፡ ቢጸ፡ ፊቅጦር፡ ወዘውገ፡ አርሳኒ፨
- እምእደ፡ ጸላኢ፡ ወፀር፡ በኪዳንከ፡ ትባልሐኒ፨
- እትአመነከ፡ አንሰ፡ በዓለም፡ ማሳኒ፨
-
- ሰላም፡ ለገቦከ፡ ወለከርሥከ፡ ዘተሠትረ፨
- ዘምስለ፡ ኵልያት፡ ወልብ፡ ከዊኖ፡ ኅቡረ፨
- ጊጋር፡ ሶርያዊ፡ ተወፈይከ፡ ኀሣረ፨
- ቦ፡ በኲናት፡ ወበ፡ በመጥባሕት፡ ሶበ፡ ኪያከ፡ አምተረ፨
- አብድየ፡ መዊኦትከ፡ ኢክህለ፡ ምዕረ፨
-
- ሰላም፡ ለኅሊናከ፡ ወለአማዑቲከ፡ ዘተመዝመዘ፨
- ምስለ፡ ንዋየ፡ ውስጥ፡ ወሕንብርት፡ በከመ፡ አብድያ፡ አዘዘ፨
- ጊጋር፡ ሶርያዊ፡ ዘትትመስል፡ ቤዘ፨
- አሰስል፡ እምላዕሌየ፡ ኀዘነ፡ ወትካዘ፨
- እምእደ፡ ጸላኢ፡ ወፀር፡ እስመይ፡ ግዑዘ፨
-
- ሰላም፡ ለሐቌከ፡ ወለአቍያጺከ፡ እለ፡ ይስግዳ፨
- ለስመ፡ ማርያም፡ ድንግል፡ ወለስመ፡ ፍቁር፡ ወልዳ፨
- ጊጋር፡ ተወካፌ፡ መጥባሕት፡ እንግዳ፨
- ከመ፡ ስምዖን፡ ወአብርሃም፡ ለምድረ፡ ሶርያ፡ በዐውዳ፨
- እስከ፡ አነዳከ፡ ተሰፉሐ፡ ወኮነ፡ ሰሌዳ፨
-
- ሰላም፡ ለአብራኪከ፡ ወለአእፋሪከ፡ እለ፡ ኀለፋ፨
- ዘምስለ፡ ሰኰና፡ ወመከየድ፡ ለምድረ፡ ግብጽ፡ እስከነ፡ ጽንፋ፨
- ጊጋር፡ ሶርያዊ፡ ሰማዕተ፡ ክርስቶስ፡ አልፋ፨
- ሄሮድስ፡ ለማርያም፡ ሶበ፡ ኀሠሠ፡ ምዕራፋ፨
- ምስሌሃ፡ ተግህሥከ፡ ከመ፡ ትረክብ፡ ተስፋ፨
-
- ሰላም፡ ለአጻብዒከ፡ ወለአጽፋረ፡ እግርከ፡ ዘምስለ፡ ቆም
- ወለመልክእከ፡ ዘያበርህ፡ አምሳለ፡ ተቅቋም፨
- ጊጋር፡ ሶርያዊ፡ ቢጸ፡ ፊቅጦር፡ ወመርምህናም፨
- ለሄሮድስ፡ ሶበ፡ ጸፋዕኮ፡ እምነገረ፡ በቀል፡ ወዊም፨
- አልባሲሁሰ፡ ኮና፡ ሲሩያት፡ በደም፨
-
- ሰላም፡ ለፀአተ፡ ነፍስከ፡ ወለበድነ፡ ሥጋከ፡ ዘበአርአያ፨
- ለግንዘትከ፡ ወለመቃብሪከ፡ ዘኮነ፡ በምድረ፡ ሶርያ፨
- ጊጋር፡ ሰማዕቱ፡ ለወልደ፡ ቅድስት፡ ማርያ፨
- ዕቀበኒ፡ ኢይብጽሐኒ፡ ለዓለም፡ እምእከያ፨
- እስመ፡ ከማከ፡ ዘየዐዱ፡ አልብየ፡ ኖትያ፨
-
- ሰላም፡ ለፍልሰተ፡ ሥጋከ፡ በእምርት፡ ዕለት፡ ዘአግመሮ፨
- ድማትያኖስ፡ ንጉሥ፡ እግዚአብሔር፡ በከመ፡ ነገሮ፨
- ለጊጋር፡ ዘጋቤ፡ ጥበብ፡ ወአእምሮ፨
- ለለ፡ ንጼውዕ፡ ስሞ፡ ወለእለ፡ ንገብር፡ ተዝካሮ፨
- ኢይብጽሐነ፡ ለዓለም፡ ገዓሮ፡ ወጻዕሮ፨
- ተረፈ፡ መልክእ፡
-
- ሰላም፡ ለከ፡ ጊጋር፡ ሶርያዊ፨
- ሰላም፡ ለከ፡ ጊጋር፡ ሰማዕተ፡ ኢየሱስ፡ ናዝራዊ፨
- ሰላም፡ ለከ፡ ጊጋር፡ ዘፈጻዕኮ፡ ለሄሮድስ፡ ዐላዊ፨
- ሰላም፡ ለከ፡ ጊጋር፡ በጊዜ፡ ስደት፡ ምስለ፡ ማርያም፡ ሀላዊ፨
-
- ሰላም፡ ለከ፡ ጊጋር፡ ዘምስለ፡ ሰሎሜ፡ ቅድስት፡ ወምስለ፡ ዮሴፍ፡ አረጋዊ፨
- ሰላም፡ ለከ፡ ጊጋር፡ ወልታ፡ ረድኤት፡ ማሕየዊ፨
- ዕቀበኒ፡ ወአድኅነኒ፡ እምእደ፡ ብእሲ፡ ነዓዊ፨
- ከመ፡ እምተክላ፡ የዐቅብ፡ በግዖ፡ ኖላዊ፨