Subjects
Righteous
አቢብ፡
ʾAbib
Phib
Phib
Malkəʾ
-
- ሰላም፡ ለዝክረ፡ ስምከ፡ ወለሥዕርትከ፡ ምስለ፡ ርእሱ፨
- ለገጽከ፡ ወቀራንብቲከ፡ እስከ፡ ብርሃናዊ፡ ሞገሱ፨
- አበ፡ ብዙኃን፡ አቢብ፡ ለእንጦንዮስ፡ ምዋርሱ፨
- ፈጽም፡ ሊተ፡ እግዚኦ፡ ለኅሊናየ፡ ማኅሠሡ፨
- በሀገረ፡ ተስፋ፡ ነፍስ፡ ምስሌከ፡ ታንሶሱ፨
-
- ሰላም፡ ለአእዛኒከ፡ ምስለ፡ መላትሕ፡ ኅቡረ፨
- ለአእናፊከ፡ ወለከናፍሪከ፡ ወለአፉከ፡ ድኅረ፨
- አቢብ፡ ፍቁሩ፡ ለዘኵሎ፡ ፈጠረ፨
- ተወከፍ፡ ጸሎትየ፡ ኵሎ፡ አሚረ፨
- ወእምአባላትየ፡ ስድድ፡ አበሳ፡ ወነውረ፨
-
- ሰላም፡ ለቆምከ፡ ፍትው፡ ወለመልክእከ፡ አዳም፨
- ለፀአተ፡ ነፍስከኒ፡ ወለበድነ፡ ሥጋከ፡ ሰላም፨
- አቢብ፡ አቡየ፡ ኮከበ፡ ገዳም፨
- ጸሊ፡ ሊተ፡ እግዚኦ፡ ወጸሎትከ፡ ግጹም፨
- ከመ፡ ታዕርፈኒ፡ እምስራህ፡ ለዛቲ፡ ዓለም፨
-
- ሰላም፡ ለቆብዕከ፡ ወለአፅፍከ፡ ዘምስለ፡ አስኬማ፨
- ዘተረሰይከ፡ ቦሙ፡ አምሳለ፡ በዝግና፡ ቃማ፨
- አቢብ፡ ሥጋዊ፡ ወመልአከ፡ ሰማይ፡ ዘራማ፨
- በዐይነ፡ ረድኤትከ፡ ነጽር፡ ለሰብእናየ፡ ድካማ፨
- እስመ፡ ያረስእ፡ ሰይጣን፡ ለብዙኅ፡ ጻማ፨
-
- ይጽውኡ፡ ስምከ፡ ዮም፡ እለ፡ ተጋባእነ፡ ሕዝብ፨
- አስተጋብአነ፡ ለዕለተ፡ ከብካብ፨
- ወዓዲ፡ ይእዜ፡ ቅዱስ፡ አቢብ፨
- አጥብበኒ፡ ለደቂቅከ፡ በዘዚአከ፡ ጥበብ፨
- ወበየማንከ፡ ባርከኒ፡ አብ፨
-
- ማሕፀን፡ በሕማምከ፡ ሶበ፡ ነጸረከ፡ ሕማሞ፨
- በመልዕልተ፡ ቅዱስ፡ መስቀል፡ እንተ፡ አንጸፍጸፈ፡ ደሞ፨
- ለኢየሱስ፡ ክርስቶስ፡ ሕሩመ፡ በቀል፡ ወተቀይሞ፨
- አባ፡ አቢብ፡ ዕቀበኒ፡ እምባሕረ፡ ሲኦል፡ ተሰጥሞ፨
- እስመ፡ ኵሉ፡ ድኅን፡ ዘጸውዐ፡ ስሞ፨