Subject
Malkəʾ
-
- ሰላም፡ ለዝክረ፡ ስምከ፡ ዘተፀውዐ፡ ወተነግረ፨
- በአፈ፡ ኢሳይያስ፡ ቅድመ፡ ወበአፈ፡ ገብርኤል፡ ድኅረ፨
- ቃለ፡ አዋዲ፡ ዮሐንስ፡ እንተ፡ ትሰብከ፡ ምስጢረ፨
- እስመ፡ ኢይክል፡ ጸቢተ፡ ዘማየ፡ ውዳሴከ፡ ባሕረ፨
- መንፈሰ፡ ጸጋከ፡ ይኩነኒ፡ ሐመረ፨
-
- ሰላም፡ ለሥዕርተርእስከ፡ እለ፡ ኮናሁ፡ አክናፈ፨
- እምዲበ፡ ጻህል፡ ርእስከ፡ አመ፡ ውስተ፡ ሰማይ፡ ኀለፈ፨
- ንስረ፡ ገሊላ፡ ዮሐንስ፡ እንተ፡ ትጸውር፡ መጽሐፈ፨
- እፎ፡ አዘዘ፡ እምላዕሌከ፡ ከመ፡ ኢይሚጡ፡ ሰይፈ፨
- በዕለተ፡ ልደቱ፡ ሄሮድስ፡ እንተ፡ ጸግበ፡ ጻዕፈ፨
-
- ሰላም፡ ለሐቌከ፡ ዘቀነተ፡ ኀይለ፨
- ህየንተ፡ ቅናቱ፡ ለአሮን፡ በወርቀ፡ ቅድሳት፡ ዘተቀፍለ፨
- ዮሐንስ፡ ዐቢይ፡ እንተ፡ ነሣእከ፡ ክሂለ፨
- አድኅነኒ፡ እምኃጥኣን፡ እለ፡ ይትአመኑ፡ ብዕለ፨
- እስመ፡ ከመ፡ መላጺ፡ በሊኅ፡ ይገብሩ፡ ህብለ፨
-
- ሰላም፡ ለመቃብሪከ፡ ዘእግዚአብሔር፡ ቀደሳ፨
- አምሳለ፡ ታቦቱ፡ ለኖኅ፡ እንተ፡ ተቀብአት፡ ፒሳ፨
- ዮሐንስ፡ መጥምቅ፡ አመ፡ ቆምከ፡ ምስለ፡ ንጉሣ፨
- ስብሐተከ፡ ዮርዳኖስ፡ እንዘ፡ ትብል፡ ሐዊሳ፨
- ወዓሣትኒ፡ ነበቡ፡ በከርሣ፨
-
- ተወከፍ፡ አምኃየ፡ ወዕሤትየ፡ ትደሎ፨
- ኦዮሐንስ፡ ሰባኬ፡ መድኃኒት፡ ወተሣህሎ፨
- ናሁ፡ ፈጸምኩ፡ በበ፡ ጸዋትው፡ ወበበ፡ መትሎ፨
- በሰላም፡ ወበእማኄ፡ ስብሐተ፡ መልክእከ፡ ኵሎ፨
- እንዘ፡ እግዚእ፡ ይረድእ፡ ወያጸንዕ፡ ቃሎ፨