-
- ሰላም፡ ለዝክረ፡ ስምከ፡ ፍሡሐ፡ አዕይንት፡ ሕፃን፨
- ዘእንበለ፡ ሰብሳብ፡ ተወልደ፡ እምልበ፡ መለኮት፡ ማሕፀን፨
- መርቆሬዎስ፡ አፈው፡ መርቆሬዎስ፡ ወይን፨
- እምቃለ፡ መርዓት፡ ይደልወከ፡ ብፅዓን፨
- እስመ፡ መዐዛከ፡ ርትዕት፡ አሚን፨
-
- ሰላም፡ ለቀራንብቲከ፡ እለ፡ ሐተታ፡ በስንዓዌ፨
- ውስተ፡ መርዐሁ፡ መስቀል፡ ዕጉሠ፡ ቅንዋት፡ መርዓዌ፨
- መርቆሬዎስ፡ መምህር፡ ዘመሀርከ፡ ጊዜ፡ ጽማዌ፨
- ኢይምሥጥ፡ አባግዒከ፡ ኑፋቄ፡ አውናምዮስ፡ አርዌ፨
- እንዘ፡ በአቃኒም፡ ሠላስ፡ አሐደ፡ ህላዌ፨
-
- ሰላም፡ ለንዋየ፡ ውስጥከ፡ እምዐይነ፡ ሥጋ፡ ዘሰወሮ፨
- በውሳጤ፡ ከርሥ፡ ፈጣሪ፡ ጊዜ፡ በጥበቡ፡ ፈጠሮ፨
- ኀይል፡ ውስተ፡ ኀይል፡ እስመ፡ ሖርከ፡ በኢተድኅሮ፨
- መርቆሬዎስ፡ ትረስ፡ ደለወከ፡ ልዑለ፡ መንበሮ፨
- ለመርዓዊ፡ ክርስቶስ፡ ዘሐጸነቶ፡ ሐጻኒት፡ አእምሮ፨
-
- ሰላም፡ ለግንዘተ፡ ሥጋከ፡ በልብሰ፡ ሐሪር፡ ጸዓዳ፨
- ወለመቃብሪከ፡ ሰላም፡ ለደብረ፡ ሰላም፡ ውስተ፡ ዐጸዳ፨
- መርቆሬዎስ፡ ርእስ፡ መክብበ፡ በዓላት፡ ውሉዳ፨
- ጥበብ፡ በዓልተ፡ ቤት፡ አስተዳለወት፡ ማዕዳ፨
- ሶበ፡ በዴዴሃ፡ ነጸረት፡ ኪያከ፡ እንግዳ፨
-
- እምላህየ፡ አበው፡ መርቆሬዎስ፡ ዘላህይከ፡ ይሤኒ፨
- ጽሩየ፡ ጠባይዕ፡ ፍቅርከ፡ ኀበ፡ ከመ፡ ወይን፡ ሞአኒ፨
- ሰላመ፡ መልክእከ፡ ፍትው፡ እስመ፡ መዝሙረ፡ ኮነኒ፨
- ወልድ፡ ለአቡሁ፡ አመ፡ በሰብእና፡ ይገኒ፨
- ዕሤተ፡ ኅዳጥ፡ ጻማየ፡ ብዙኀ፡ ሀበኒ፨
- ተረፈ፡ መልክእ፡
-
- ሰላም፡ ለከ፡ መርቆሬዎስ፡ አውር፡ መፍቀሬ፡ ጽሙር፡ ወጾም፨
- ሐዋዝ፡ እፎ፡ ወእፎ፡ አዳም፨
- ስምከ፡ መንክረ፡ ጣዕም፨
-
- ሰላም፡ ለከ፡ እመ፡ ብግርማሁ፡ ይመጽእ፡ ወልደ፡ አምላክ፡ ኰናኒ፨
- መርቆሬዎስ፡ አብ፡ ቢጸ፡ እንጦኒ፨
- እምቅድስት፡ መፍርህ፡ ወማኅዘኒ፨
- ፍቁርየ፡ ኢትፍራህ፡ በለኒ፨