Subject
Malkəʾ
-
- በስመ፡ አብ፡ ወወልድ፡ ወመንፈስ፡ ቅዱስ፡ ሥላሴ፨
- እንዘ፡ ኣዐትብ፡ ገጽየ፡ ከመ፡ እለ፡ እዝራ፡ ወሙሴ፨
- ናሁ፡ እትናገር፡ ዘማኅበረ፡ በኵር፡ ውዳሴ፨
- ድኅረ፡ ስትዪ፡ ወይነ፡ ሰማይ፡ ቅድመ፡ ገጸ፡ ሐዳስ፡ ክናሴ፨
- እስመ፡ በእግረ፡ ኃይል፡ ኬዱ፡ አንበሳ፡ ወከይሴ፨
-
- ሰላም፡ ለፅንሰትክሙ፡ በሩካቤ፡ ሥጋ፡ ግሱስ፨
- እንተ፡ አልቦቱ፡ ሲበት፡ ወግብረ፡ ኀጢአት፡ ንኡስ፨
- አእጹቀ፡ ወንጌሉ፡ ማኅበር፡ ለዕፀ፡ ሕይወት፡ ክርስቶስ፨
- ጸገይክሙ፡ ጽጌ፡ አምልኮ፡ በጠለ፡ ትእግሥት፡ ሐዲስ፨
- ከመ፡ ኀረገ፡ ወይን፡ ሳውል፡ ወስምዖን፡ በለስ፨
-
- ሰላም፡ ለልደትክሙ፡ እምወላዲት፡ ማሐፀን፨
- በዘባረካ፡ ዕለት፡ እግዚአብሔር፡ ቀርን፨
- ማኅበረ፡ በኵር፡ አእላድ፡ ቅዱሳነ፡ ላህይ፡ ወሥን፨
- ያበርህ፡ ውዳሴክሙ፡ በልሳነ፡ ደቂቅ፡ ኄራን፨
- እንቍ፡ ሥርጋዌሃ፡ ለደብር፡ ብንያስ፡ ካህን፨
-
- ሰላም፡ ለዝክረ፡ ስምክሙ፡ ዘፍኖተ፡ ዕበይ፡ ኀለፈ፨
- ወበዐምደ፡ ወርቅ፡ ተጽሕፈ፨
- ማኅበረ፡ በኵር፡ ጻድቃን፡ እለ፡ ትትቄደሱ፡ ዘልፈ፨
- ረስዩ፡ በጸሎትክሙ፡ ኀጢአትየ፡ ግዱፈ፨
- እምፍቅደ፡ ኆፃ፡ ባሕር፡ ፍቅዱ፡ አኮኑመ፡ ተርፈ፨
-
- ሰላም፡ ለሥዕርተ፡ ርእስክሙ፡ ዘጽላሌሁ፡ አዳም፨
- ወከመ፡ ጸጉረ፡ ቋዕ፡ ጸሊም፨
- ማኅበር፡ ጻድቃን፡ አበወ፡ ኵሉ፡ ዓለም፨
- አኅድሩ፡ በላዕሌነ፡ ሰላመ፡ ዚአክሙ፡ ዮም፨
- እስመ፡ ለደቂቅ፡ ይደሉ፡ ዘአበው፡ ሰላም፨
-
- ሰላም፡ ለርእስክሙ፡ ትእምርተ፡ መስቀል፡ ዘቦቱ፨
- ወስመ፡ ሥላሴ፡ ትርሲቱ፨
- ለመሥዋዕተ፡ ሰላም፡ ክርስቶስ፡ ማኅበር፡ ሥዋዕቱ፨
- በጽሑ፡ ለተራድኦ፡ ሶበ፡ ኪያየ፡ አገቱ፨
- ምንዳቤ፡ ሥጋ፡ ወነፍስ፡ አፍላት፡ ክልኤቱ፨
-
- ሰላም፡ ለገጽክሙ፡ ዘኵለንታሁ፡ ብሩህ፨
- እምነ፡ ብሩህ፡ ፀሓይ፡ ወእምነ፡ ንጹሕ፡ ወርኅ፨
- ክሉላነ፡ ሥጋ፡ ማኅበር፡ በወልታ፡ ሱራፌል፡ ንጽሕ፨
- ፍጽሙ፡ አፈ፡ ዚአሁ፡ ለአርዌ፡ ሰማይ፡ መፍርህ፨
- ዘእምገነቱ፡ ሄዶ፡ ለአዳም፡ የዋሕ፨
-
- ሰላም፡ ለቀራንብቲክሙ፡ እለ፡ ይመስላ፡ ቍጽለ፨
- ወሥነ፡ ጽጌ፡ ወርቅ፡ ሥዑለ፨
- ማኅበረ፡ በኵር፡ ዐበይት፡ ዘትሴአኑ፡ ወንጌለ፨
- ወትትመረጕዙ፡ ሕይወተ፡ ሕሙማን፡ መስቀለ፨
- ውብዕለ፡ ነዳያን፡ ዘልብሱ፡ ሕገ፡ ቃል፡ ጽዱል፨
-
- ሰላም፡ ለአዕይንቲክሙ፡ እለ፡ ኢነጸራ፡ ምዕረ፨
- ተድላ፡ ቤተ፡ ነዌ፡ ወኪራም፡ እንተ፡ ያመጽእ፡ ሐሣረ፨
- ማኅበረ፡ በኵር፡ ጻድቃን፡ ዘትኔጽሩ፡ ስውረ፨
- ጸልዩ፡ በበ፡ ዕለቱ፡ ለዘይገብር፡ ተዝካረ፨
- ወለለ፡ ጊዜሁ፡ ይዜምር፡ ለክሙ፡ መዝሙረ፨
-
- ሰላም፡ ለአእዛኒክሙ፡ ለአጽምኦ፡ ምስጢር፡ ዘተደለዋ፨
- ከመ፡ እዝነ፡ አዳም፡ ዘኤዶም፡ ወመርአተ፡ ገነት፡ ሔዋ፨
- አቅርንተ፡ ወንጌሉ፡ ማኅበር፡ ለዕጓለ፡ ሐዳስ፡ ጣዕዋ፨
- እስከ፡ እፌጽም፡ ውዳሴክሙ፡ አናቅጸ፡ ዕረፍት፡ ተአጽዋ፨
- ወምኵራበ፡ ድቃስ፡ ስፍሕት፡ ተመዝበረት፡ ነዋ፨
-
- ሰላም፡ ለመላትሒክሙ፡ ቅርፍተ፡ ሮማናት፡ እከ፡ መስላ፨
- ወለአእናፊክሙ፡ ሰላም፡ ጼና፡ ደብረ፡ ዕፍረት፡ ዘኤላ፨
- ማኅበረ፡ በኵር፡ ጻድቃን፡ ግቡራነ፡ ትዕግሥት፡ ቀጸላ፨
- አዕርፉኒ፡ ለገብርክሙ፡ አመ፡ ዕለተ፡ ኀዘን፡ ወተድላ፨
- ኀበ፡ ዘሀሎ፡ ዳዊት፡ ወሰሎሞን፡ ስግላ፨
-
- ሰላም፡ ለከናፍሪክሙ፡ ዘጣዕመ፡ ነገሮን፡ መዐር፨
- ወለአፉክሙ፡ ነባቢ፡ ሃይማኖተ፡ ኬፋ፡ መምህር፨
- ማኅበረ፡ በኵር፡ ጻድቃን፡ ኖትያተ፡ ሓዲስ፡ መስጢር፨
- አእድዉኒ፡ ባሕረ፡ ኵነኔ፡ በጸሎትክሙ፡ ሐመር፨
- ምስለ፡ አበ፡ ኵሉ፡ ብንያስ፡ ወብርሃን፡ ዘደብር፨
-
- ሰላም፡ ለአስናኒክሙ፡ ጸአድኢዳነ፡ ሕብር፡ ከመ፡ ሐሊብ፨
- ወለልሳንክሙ፡ ዓዲ፡ ገሣጼ፡ ዕልዋን፡ ሕዝብ፨
- ማኅበረ፡ በኵር፡ ጻድቃን፡ አዕናቍ፡ ስብሐት፡ መዝገብ፨
- አብርሁ፡ ልበ፡ ዚአየ፡ ለድርስትክሙ፡ ዕፀብ፨
- በልብስ፡ ጽላሌ፡ ልብየ፡ አኮኑ፡ ግልቡብ፨
-
- ሰላም፡ ለቃልክሙ፡ ልቡና፡ ረሲኣን፡ ዘአደንገጸ፨
- አኮ፡ ከመ፡ ማይ፡ በዐውድ፡ ቃለ፡ ሃይማኖት፡ አድመፀ፨
- ሰባክያኒሁ፡ ማኅበር፡ ለዘእምልአቱ፡ ኢሐፀ፨
- በግዙፍ፡ ሥጋ፡ አዳም፡ ሶበ፡ ኪያነ፡ ሐወጸ፨
- ወበመስቀለ፡ ሮም፡ በትሩ፡ ባሕረ፡ ሞት፡ ገሠጸ፨
-
- ሰላም፡ ለእስትንፋስክሙ፡ ፈውሰ፡ ሕሙማን፡ አእላፍ፨
- ወለጕርዔክሙ፡ ጥዑም፡ እምጣዕመ፡ ወይነ፡ ምድር፡ ግዙፍ፨
- ማኅበረ፡ በኵር፡ ጻድቃን፡ አእሩገ፡ ሐዲስ፡ መጽሐፍ፨
- ባርኩነ፡ በእዴክሙ፡ ምልዕተ፡ በረከት፡ ትሩፍ፨
- ከመ፡ ባረኮ፡ ለኤፍሬም፡ ያዕቆብ፡ ሐዳፍ፨
-
- ሰላም፡ ለክሳድክሙ፡ በማሕተመ፡ ክርስቶስ፡ ሕቱም፨
- ወለመትከፍትክሙ፡ ሰላም፡ ጸዋሬ፡ መከራ፡ ግሩም፨
- ነበልባላቲሁ፡ ማኅበር፡ ለማየ፡ ዮርዳኖስ፡ ፍሕም፨
- አውእይዋ፡ ለጌጋይነ፡ ዘሶከ፡ መከራ፡ ገዳም፨
- ከመ፡ እምውእየታ፡ ይትሀወክ፡ አርዌ፡ ምክር፡ ሕሱም፨
-
- ሰላም፡ ለዘባናቲክሙ፡ ለስብከተ፡ ወንጌል፡ እለ፡ ተቀስፋ፨
- ወለእንግድዓክሙ፡ ሠናይት፡ እስከነ፡ ማእከላ፡ እምጽንፋ፨
- ማኅበረ፡ በኵር፡ ጻድቃን፡ አእፁቀ፡ በለስ፡ ኬፋ፨
- አዕርፉኒ፡ በታሕቲክሙ፡ ፀሐየ፡ መሪር፡ ዘልፉ፨
- አመ፡ በረሲኣን፡ ያሠርቅ፡ መለኮት፡ አልፋ፨
-
- ሰላም፡ ለሕጽንክሙ፡ ዘመዐዛሁ፡ ፍትው፨
- ወለአእዳዊክሙ፡ ዐበይት፡ ግብራተ፡ መለኮት፡ ሕያው፨
- ሲሩያነ፡ እድ፡ ማኅበር፡ በደመ፡ በግዕ፡ ቅድው፨
- ሰአሉ፡ እምኀበ፡ አብ፡ ስርየተ፡ ኃጥኣን፡ አኀው፨
- እስመ፡ ሀብተ፡ ክሂል፡ ልክሙ፡ በሰማይ፡ ድልው፨
-
- ሰላም፡ ለመዛርዒክሙ፡ መዝራዕተ፡ ክቡድ፡ አንበሳ፨
- ወመዝራዕተ፡ እደው፡ ስሳ፨
- ማኅበረ፡ በኵር፡ ጻድቃን፡ ነፋሳተ፡ መንክር፡ ኀሠሣ፨
- ዝርዉ፡ እምላዕሌየ፡ ጸበለ፡ ገጸ፡ ምድር፡ አበሳ፨
- ወበረከተ፡ አብ፡ ንፍሑ፡ ለነፍስየ፡ በርእሳ፨
-
- ሰላም፡ ለኵርናዕክሙ፡ ወለእመትክሙ፡ ጽኑዕ፨
- አርአያ፡ ኀጺን፡ ወብርት፡ ንዋያቲሁ፡ ለሰብእ፨
- ማኅበረ፡ በኵር፡ ጻድቃን፡ ወአልተ፡ ነጋሢ፡ ብፁዕ፨
- ጸውዑኒ፡ መቅድመ፡ ኵሉ፡ ምሳሐ፡ ደብረ፡ ጽዮን፡ ቅብእ፨
- አመ፡ ለጻድቃን፡ ይገብር፡ መለኮት፡ እግዚእ፨
-
- ሰላም፡ ለእራኃቲክሙ፡ በአርአያ፡ መስቀል፡ እለ፡ ተገብራ፨
- ወለአጻብዕትክሙ፡ ሰላም፡ ፍና፡ ገሢሠ፡ ነድ፡ ዘሖራ፨
- ማኅበረ፡ በኵር፡ ጻድቃን፡ ካህናተ፡ ወንጌል፡ ደብተራ፨
- አዕርጉ፡ ጸሎተ፡ ሕዝብ፡ ምስለ፡ ክልኤቱ፡ ወዕሥራ፨
- ካህናተ፡ ሰማይ፡ ዘገብሩ፡ ድልወቶሙ፡ ጌራ፨
-
- ሰላም፡ ለአጽፋረ፡ እዴክሙ፡ በደመ፡ መለኮት፡ ዘርሕሱ፨
- ዘምስለ፡ አጽባዕቶሙ፡ ደርገ፡ እስከ፡ ውስተ፡ መሬት፡ ፈለሱ፨
- ማኅበረ፡ በኵር፡ በማእከሌነ፡ አንሶሱ፨
- ነገሥታት፡ ወመኳንንት፡ ሶበ፡ ጸበለ፡ ምድር፡ ለብሱ፨
- ወአመ፡ ይነግሥ፡ አብ፡ ምስለ፡ ወልድ፡ ኢያሱ፨
-
- ሰላም፡ ለገቦክሙ፡ ሥርግወ፡ ሐመልማል፡ ጶዴሬ፨
- ወለከርሥክሙ፡ ጽዱል፡ እምዕንቍ፡ ጽዱል፡ ወራውሬ፨
- ማኅበረ፡ በኵር፡ ጻድቃን፡ ውሉደ፡ ሐዲስ፡ ዝማሬ፨
- ባርኩነ፡ በእዴክሙ፡ ለደቂቀ፡ ብንያስ፡ ኅሬ፨
- ከመ፡ በዓለክሙ፡ ንግበር፡ በሐዲስ፡ ኁባሬ፨
-
- ሰላም፡ ለልብክሙ፡ ዕጉሠ፡ ጻማ፡ ወጻዕር፨
- እንዘ፡ ይሄሊ፡ ፍጹመ፡ ዕሤተ፡ እንታክቲ፡ ሀገር፨
- ማኅበረ፡ በኵር፡ ጻድቃን፡ አናቅጸ፡ ቃላት፡ ዐሥር፨
- ኢክህሉ፡ አንቀልቅሎተ፡ አፍላገ፡ ሰበልዮስ፡ ምድር፨
- መሰረተክሙ፡ አሚነ፡ ዘክብር፨
-
- ሰላም፡ ለኵልያቲክሙ፡ እንተ፡ አልቦቱ፡ ደነስ፨
- ወለኅሊናክሙ፡ ካዕበ፡ አጽቀ፡ ንጻሬ፡ በለስ፨
- ማኅበረ፡ በኵር፡ ጻድቃን፡ ሐራ፡ ሰማያዊ፡ ንጉሥ፨
- አብኡኒ፡ እንበለ፡ ጻማ፡ ውስተ፡ ውሳጣይ፡ መቅደስ፨
- ዘበውስቴታ፡ ካህን፡ ኢየሱስ፡ ክርስቶስ፨
-
- ሰላም፡ ለሕንብርትክሙ፡ ዘክበበ፡ ፀሓይ፡ ክበቡ፨
- ወለሐውቄክሙ፡ ሰላም፡ ዘአስኬማ፡ ኀይላት፡ መዝገቡ፨
- ማኅበረ፡ በኵር፡ ጻድቃን፡ አብዕልተ፡ ወልድ፡ ወአቡ፨
- ኅብስት፡ ነገረ፡ ጸጋ፡ ነዳያነ፡ ሀብታት፡ አጽግቡ፨
- ወበጥበባት፡ አጥናነ፡ አጥብቡ፨
-
- ሰላም፡ ለአቍያጺክሙ፡ አዕማደ፡ ባላቅ፡ እለ፡ መሰሉ፨
- ወለአብራኪክሙ፡ ካዕበ፡ ጽጌ፡ አስተባርኮ፡ ዘኤሉ፨
- ማኅበረ፡ በኵር፡ ጻድቃን፡ አርድእተ፡ ወላዲ፡ ወቃሉ፨
- ብጽሑ፡ በሰረገላ፡ ወበደመና፡ ዘላዕሉ፨
- ለእለ፡ በዛቲ፡ ጸሎት፡ ኅቡረ፡ ወአሉ፨
-
- ሰላም፡ ለአእጋሪክሙ፡ ለስብከተ፡ ወንጌል፡ እለ፡ ነገዳ፨
- እስከ፡ ብሔረ፡ ግብጽ፡ ወሮም፡ እምነ፡ አሐቲ፡ ይሁዳ፨
- ደቂቀ፡ መርአ፡ ማኅበር፡ ለባስያነ፡ ክርስቶስ፡ ጸዐዳ፨
- አንቅሑኒ፡ ለተቀብሎ፡ መርዐዌ፡ ሰማይ፡ እንግዳ፨
- እምንዋመ፡ ሀኬት፡ ብዙኅ፡ ዘያመጽእ፡ እዳ፨
-
- ሰላም፡ ለሰኰናክሙ፡ ዘኢተጉድአት፡ ኅዳጠ፨
- እንዘ፡ በቀዊም፡ ትነሥእ፡ ቁመተ፡ አዕማድ፡ ፍሉጠ፨
- ቅቡኣነ፡ አልባስ፡ ማኅበር፡ ሃይማኖተ፡ ኬፋ፡ ስግላጠ፨
- ፍቅርክሙ፡ ቅብአ፡ ሐሤት፡ ውስተ፡ ልብየ፡ ተስውጠ፨
- ወልብሰ፡ ሥጋዊ፡ ሀኬት፡ እምዛቲ፡ ሰጠጠ፨
-
- ሰላም፡ ለመከየድክሙ፡ በዐውደ፡ ዘለፉ፡ ዘቆመ፨
- ከመ፡ እስጢፋኖስ፡ ይፈጽም፡ ግብረ፡ ተጋድሎ፡ ፍጹመ፨
- ደመናተ፡ ወንጌል፡ ማኅበር፡ ዘታገምሩ፡ ሰላመ፨
- አንጠብጥቡ፡ በላዕሌየ፡ በረከተክሙ፡ ዝናመ፨
- ምድረ፡ ስብእናየ፡ ታውፅእ፡ ሠርጸ፡ ክብር፡ አዳመ፨
-
- ሰላም፡ ለአፃብኢክሙ፡ እለ፡ ይመስላ፡ ነደ፨
- ወለአጽፋሪክሙ፡ ሰላም፡ ጸዐደዒዳነ፡ ሕብር፡ አብራደ፨
- ማኅበረ፡ በኵር፡ ጻድቃን፡ ዘታመልኩ፡ ዋሕደ፨
- ሀገረ፡ ነፍስየ፡ ሶበ፡ መልአከ፡ ሞት፡ መረደ፨
- ለተራድኦ፡ አፍጥኑ፡ እምሰማይ፡ ወረደ፨
-
- ሰላም፡ ለቆምክሙ፡ ቆመ፡ ሱራፌል፡ አብያጽ፨
- ወለመልክእክሙ፡ ሰላም፡ ዘርቤተ፡ ኢዮባብ፡ ግብጽ፨
- ማኅበር፡ ጻድቃን፡ አፍላጋተ፡ ወንጌል፡ ድምፅ፨
- ስጥቁ፡ እምላዕሌየ፡ ምድረ፡ አበሳ፡ ዘዳሕፅ፨
- በዘዚአክሙ፡ በቋዒ፡ ተግሣጽ፨
-
- ሰላም፡ ለጸአተ፡ ነፍስክሙ፡ ዘኢተአምር፡ ተበቅሎ፨
- እንበለ፡ በቋዒ፡ ምሕረት፡ ወእንበለ፡ ብዙኅ፡ ተሣህሎ፨
- ማኅበረ፡ በኵር፡ ጻድቃን፡ አፍራሰ፡ ነበልባል፡ ተልዕሎ፨
- አዕርጉኒ፡ እንበለ፡ ጻማ፡ ከመ፡ ጳውሎስ፡ ዘሴሎ፨
- እስከ፡ ሳልሣዊ፡ ሰማይ፡ ብዕለ፡ ክብር፡ ዘሀሎ፨
-
- ሰላም፡ ለበድነ፡ ሥጋክሙ፡ ቅቡአ፡ ዕፍረት፡ ወምስክ፨
- ወለግንዘትክሙ፡ ሰላም፡ በእደ፡ ብእሲ፡ ቡሩክ፨
- ማኅበረ፡ በኵር፡ ጻድቃን፡ ሐራ፡ ኢየሱስ፡ አምላክ፨
- ጽብእዎ፡ በኀይልክሙ፡ ለአርዌ፡ ዐመፃ፡ ድሩክ፨
- እስመ፡ ለአስሕቶ፡ ይመጽእ፡ በጽባሕ፡ ወሰርክ፨
-
- ሰላም፡ ለመቃብሪክሙ፡ ፈውሰ፡ ሕሙማን፡ ወጥዒና፨
- ወለዕርገትክሙ፡ ካዕበ፡ በሥርዓተ፡ ብዙኅ፡ ልዕልና፨
- ማኅበር፡ ጻድቃን፡ ጽጉባነ፡ ክርስቶስ፡ መና፨
- ዘወረደ፡ በጎለ፡ ላሕም፡ ለደቂቀ፡ ብዙኅ፡ ሙስና፨
- እምከርሠ፡ አሐቲ፡ ፅዕዱት፡ ወብርህት፡ ደመና፨
-
- ተወከፉ፡ ወትረ፡ ሰላምየ፡ ወተነጽፎትየ፡ ንግሩ፨
- ለእግዚአብሔር፡ ሕያው፡ በሐጸ፡ ህላዊት፡ ፍቅሩ፨
- ማኅበር፡ ጻድቃን፡ አዕርክተ፡ ሐዳስ፡ መስጢር፨
- ሰአሉ፡ ሰርየተ፡ ነፍስ፡ ለዘኪያየ፡ ፈጠሩ፨
- በመንፈስ፡ ቅዱስ፡ ወዘርዕ፡ ዘንጹሕ፡ ግብሩ፨