Subject
Malkəʾ
-
- ኦእግዚአብሔር፡ ለዘካርያስ፡ ዘፈታሕኮ፨
- እማዕሠረ፡ ልሳን፡ ወአፍ፡ ወለአድገ፡ በለዓም፡ ዘአስተናበብኮ፨
- ድርሳነ፡ መርቆሬዎስ፡ ይንብብ፡ በጾታ፡ ፍካሬ፡ ተልእኮ፨
- ለልብየ፡ መሬታዊ፡ ዘአንተ፡ ፈጠርኮ፨
- በዲበ፡ ጥበብ፡ ጥበበ፡ ወስኮ፨
-
- ሰላም፡ ለዝክረ፡ ስምከ፡ ዘያስተፌሥሖ፡ ለነዳይ፨
- አመ፡ በዴዴሆሙ፡ ቆመ፡ ለአብዕልተ፡ ብዙኅ፡ ንዋይ፨
- መርቆሬዎስ፡ መስፍን፡ ኢያሱ፡ ዘምድረ፡ ጋይ፨
- እስከ፡ ንጸብኦ፡ ለአሞሬዎን፡ ጌጋይ፨
- አዝዛ፡ ኢይዕርበነ፡ ለዘመን፡ ፀሓይ፨
-
- ሰላም፡ ለአእናፊከ፡ መሳክወ፡ መንፈስ፡ ክልኤቱ፨
- ጥኢና፡ እንስሳ፡ ወሰብእ፡ ዘይነፍሕ፡ ለለ፡ ሰዓቱ፨
- መርቆሬዎስ፡ መልአክ፡ እምሥልጣነ፡ ደቂቅ፡ ሠለስቱ፨
- ከመ፡ ቈረ፡ ቀዳሚ፡ ለበትረ፡ ነነዌ፡ እሳቱ፨
- እሳተ፡ ጌጋይየ፡ አቍርር፡ ወአጥፍእ፡ በከንቱ፨
-
- ሰላም፡ ለመታክፍቲከ፡ ጸዊረ፡ መስቀል፡ ዘኢያንከራ፨
- ለክርስቶስ፡ ሐዋርያ፡ ወነቢይ፡ ዘአመ፡ እዝራ፨
- መርቆሬዎስ፡ ዮሴፍ፡ ሶበ፡ መነንከ፡ ነገራ፨
- ዓለም፡ ወለተ፡ ሥጋ፡ ብእሲተ፡ መኰንን፡ ጴጥፋራ፨
- አስተዋተደየተከ፡ እስከ፡ ለሞት፡ በብዙኅ፡ መከራ፨
-
- ሰላም፡ ለልብከ፡ ስመ፡ ወልደ፡ ዕሴይ፡ ዘተሳተፈ፨
- ዘበትርጓሜሁ፡ እምልበ፡ ፈጣሪ፡ ዘተርፈ፨
- ዕሤተ፡ ማርያም፡ ክደነኒ፡ መንጦላእተ፡ ሥጋከ፡ አጽፈ፨
- አፅራርየ፡ ሶበ፡ ተንሥኡ፡ ቀኒቶሙ፡ ሰይፈ፨
- ውስተ፡ እዴሆሙ፡ ኢይኩን፡ ግዱፈ፨
-
- ሰላም፡ ለአማዑቲከ፡ በእሳተ፡ ፍቅሩ፡ ዘሐመ፨
- ለክርስቶስ፡ ሐዋርያ፡ ዲበ፡ ዕፀ፡ መስቀል፡ ዘቆመ፨
- ዕሤተ፡ ማርያም፡ ዘኮንከ፡ እንተ፡ ትሰብክ፡ ገዳመ፨
- አንቅሀኒ፡ እምንዋምየ፡ ለእመ፡ ሰብእናየ፡ ደክመ፨
- ከመ፡ እምንዋሙ፡ ተንሥአ፡ አቤሜሌክ፡ ቅድመ፨
-
- ሰላም፡ ለአቍያጺከ፡ አዕማደ፡ ቤተ፡ ነፍስ፡ እለ፡ ተሰምያ፨
- በሰዓተ፡ ሰጊድ፡ ወቀዊም፡ ዘኢተሀከያ፨
- መርቆሬዎስ፡ ነቢይ፡ ወጳውሎስ፡ ሐዋርያ፨
- ተበጽዐከ፡ በብሂለ፡ ሃሌ፡ ወሉያ፨
- ደብረ፡ ድማኅ፡ ደብረ፡ ድማኅ፡ ደብረከ፡ ሶርያ፨
-
- ሰላም፡ ለአእጋሪከ፡ ፍና፡ ኢያሪኮ፡ ዘኀለፉ፨
- ማዕበላተ፡ ከመ፡ ይቅስፉ፨
- መርቆሬዎስ፡ አባ፡ ለማዕቀበ፡ እግዚእ፡ ጸዋሬ፡ አጽፉ፨
- በረከታቲከ፡ በላዕሌየ፡ ያዕርፉ፨
- ከመ፡ በረከታት፡ ዘኤልያስ፡ ላዕለ፡ ኤልሳዕ፡ ተርፉ፨
-
- ሰላም፡ ለፀአተ፡ ነፍስከ፡ በድምፀ፡ መላእክት፡ ወይባቤ፨
- ኀበ፡ ደብረ፡ ስኂን፡ ወደብረ፡ ከርቤ፨
- ዕሤተ፡ ማርያም፡ ዘኮንከ፡ ስብሐተ፡ ማርያም፡ ነባቤ፨
- አዕረጉከ፡ ሰብአ፡ ዝማሬ፡ በአክናፎሙ፡ ግልባቤ፨
- ሀገረ፡ ማርያም፡ ዕረፍተ፡ ኵሉ፡ እምብዙኅ፡ ምንዳቤ፨
-
- ሰላም፡ ለትንሣኤ፡ ሥጋከ፡ እግዚአብሔር፡ አመ፡ ሐወጻ፨
- ዳግመ፡ ከመ፡ ይሕንጻ፨
- መርቆሬዎስ፡ ሥዩም፡ ለመንግሥተ፡ ሰማይ፡ በአናቅጻ፨
- ኅድገኒ፡ እኅልፍ፡ እግዚኦ፡ መንገለ፡ ጥባባት፡ ሮጻ፨
- ለማርያም፡ እግዝእትከ፡ ከመ፡ እርአይ፡ ገጻ፨
-
- ድርሳነ፡ መልክእከ፡ ዘንተ፡ ሶበ፡ ወጠንኩ፡ ወፈጸምኩ፨
- እመኒ፡ አሕሠምኩ፡ ወኢያሠነይኩ፨
- መርቆሬዎስ፡ ሥረይ፡ ኃጢአትየ፡ በእንተ፡ ዝኩ፨
- ወልድከ፡ ወንዳይከ፡ ኀበ፡ መንፈሳዊ፡ ቀናእኩ፨
- እስመ፡ አዘዘኒ፡ አምላክከ፡ ወአነ፡ ነበብኩ፨