Bibliography
Z
Raineri, Osvaldo, ed. Il Gadl di san Pietro, patriarca di Alessandria e ultimo dei martiri. Patrologia Orientalis, 51/5 (230). Turnhout: Brepols, 2010.
-
- በስመ፡ እግዚአብሔር፡ ወበዋሕናሁ፡ ተክፍሎ፨
- ወበተክፍሎቱ፡ ዋሕድና፡ አምሳለ፡ ፀሓይ፡ ዘትማሰሎ፨
- ውዳሴ፡ መልክዑ፡ እጽሕፍ፡ እንዘ፡ እሴብሕ፡ ወአሌዕሎ፨
- ለጴጥሮስ፡ ሰማዕት፡ አመ፡ በእንተ፡ ሕዝብ፡ ሰአሎ፨
- ተፍጻሜተ፡ ሰማዕት፡ እንተ፡ ዘአምላክ፡ ይቤሎ፨
-
- ሰላም፡ ለዝክረ፡ ስምከ፡ ስመ፡ ወልደ፡ ዮና፡ ክቡር፨
- ወለሥዕርትከ፡ ሰላም፡ ዘጠለ፡ ዮርዳኖስ፡ ፀምር፨
- ሊቀ፡ ጳጳሳት፡ ጴጥሮስ፡ ወሰማዕተ፡ ሥቃይ፡ መሪር፨
- አሐሊ፡ ለከ፡ ማሕሌተ፡ ከመ፡ በዐሥር፡ አውታር፨
- ንጉሠ፡ እስራኤል፡ ሐለየ፡ ለታቦት፡ ዘጾር፨
-
- ሰላም፡ ለግንዘተ፡ ሥጋከ፡ በሕገ፡ ጳጳሳት፡ ክቡራን፨
- ወለመቃብሪከ፡ ሰላም፡ በእስክንድርያ፡ ምካን፨
- ተፍጻሜተ፡ ደሞሙ፡ ለሰማዕታተ፡ ጽድቅ፡ አሚን፨
- አሰበ፡ ጽራኅየ፡ በነቢበ፡ ዝንቱ፡ ድርሳን፨
- ዕረፍተ፡ ሥሩሓን፡ ሀበኒ፡ በሐዳስ፡ ዘመን፨
- ተረፈ፡ መልክእ፡
-
- ማዕረረ፡ ገድልከ፡ አባ፡ ሶበ፡ አልጸቀ፡ ተቅራማ፨
- አዋልደ፡ ክብር፡ አክሊላት፡ መልዕልተ፡ ርእስከ፡ ቆማ፨
- አስካለ፡ መልክእከ፡ ዘንት፡ እምገራህተ፡ ልሳን፡ ይቅስማ፨
- እስመ፡ ዮም፡ ሕዋሲቲከ፡ አዋልደ፡ ብዙኀ፡ ጻማ፨
- ግብረ፡ ዘወሀ፡ በኮን፡ ፈጽሞ፡ ፈጸማ፨
-
- ሰላም፡ እብል፡ ለጴጥሮስ፡ የማኖ፨
- ሊቀ፡ ጳጳሳት፡ በተክህኖ፨
- ለአርዮስ፡ ዕልው፡ ግዘተ፡ ሥጋሁ፡ ኰነኖ፨
- ለወልደ፡ ማርያም፡ ሶበ፡ ነጸረ፡ ሥኖ፨
- እንዘ፡ እኁዝ፡ በእዴሁ፡ ሥጡጠ፡ ገርዜኖ፨
-
- ሰላም፡ ለከ፡ ሰባኬ፡ ሃይማኖት፡ በጥንቃቄ፨
- አምሳለ፡ ጳውሎስ፡ ዘአተሰሎንቄ፨
- ዕፀ፡ መድኃኒት፡ ጴጥሮስ፡ ወዕፀ፡ ሐዲስ፡ ኢሎቄ፨
- አዕዋፈ፡ ሰማይ፡ ዘሞርሞቄ፡ እንተ፡ ጸለይከ፡ እምዕንቈ፨
- እፎኑመ፡ ጊዜ፡ ሰርክ፡ አውዐየከ፡ መርቄ፨