Subjects
Martyr
ኢየሉጣ፡
ʾIyaluṭṭā
Julitta
Julitta
Malkəʾ
-
- ሰላም፡ ለዝክረ፡ ስምኪ፡ እምስመ፡ ዘመድኪ፡ ኵሉ፨
- ዘየዐቢ፡ ጥቀ፡ ለመጽሐፍ፡ አርአያ፡ ባሕሉ፨
- ኢየሉጣ፡ ሥርጉት፡ ለኮከበ፡ ያዕቆብ፡ ስነ፡ ጸዳሉ፨
- ሰላም፡ በዲበ፡ መድር፡ ወቃለ፡ ስብሐት፡ በላዕሉ፨
- መፍትው፡ ለኪ፡ ወለኪ፡ ይደሉ፨
-
- ሰላም፡ ለሥዕርትኪ፡ በቅብአ፡ ደመ፡ ስምዕ፡ ዘርሕሰ፨
- ወለርእስኪ፡ ሰላም፡ ዘተቀጸለ፡ ሞገሰ፨
- ልዑለ፡ ቅዳሴ፡ አምላክ፡ አመ፡ ኪያኪ፡ ቀደሰ፨
- አድነነ፡ ለኪ፡ ኢየሉጣ፡ አካለ፡ ነባልባል፡ ርእሰ፨
- ወኀበ፡ ግዕዘ፡ ማይ፡ ለኪ፡ ግዕዞ፡ አፍለሰ፨
-
- ሰላም፡ ለገጽኪ፡ በቀለመ፡ ሐዲስ፡ ሕይወት፨
- ዘበውስቴቱ፡ ተሥዕሉ፡ ገጻተ፡ ሥላሴ፡ ገጻት፨
- አንጌቤናይት፡ ወለት፡ ኢየሉጣ፡ ዘአበውኪ፡ ነገሥት፨
- ያስተበፅዐኪ፡ ካልአትኪ፡ አንስት፨
- በጸጋ፡ ወሀብት፨
-
- ሰላም፡ ለቀራንብትኪ፡ ወለአዕይንትኪ፡ እምንዋም፨
- እለ፡ ንቁሓተ፡ ኮና፡ ለተወክፎ፡ ሥቃይ፡ ግሩም፨
- ኢየሉጣ፡ ክፍልኒ፡ ርስተ፡ መጻኢ፡ ዓለም፨
- ዓለምየሰ፡ ዓለመ፡ ይእዜ፡ ወዮም፨
- ተረስአተ፡ ሕልም፡ ይትረሳዕ፡ ከመ፡ ውእቱ፡ ሕልም፨
-
- ሰላም፡ ለአእዛንኪ፡ ቅንዋተ፡ ኀጺን፡ እለ፡ ተወክፋ፨
- ወለመላትሕኪ፡ ሰላም፡ ዘግብረ፡ ተጸፍዖ፡ አዝለፋ፨
- ኢየሉጣ፡ ንግርኒ፡ ለኅዙን፡ ነገራተ፡ ኀሤት፡ ወተፋ፨
- ወባርኪ፡ ዓመታትየ፡ እለ፡ ኅዳጣተ፡ ተርፋ፨
- መብዝኅቶንሰ፡ በጌጋይ፡ ኀለፋ፨
-
- ሰላም፡ ለአእናፍኪ፡ መዐዛ፡ መለኮት፡ እለ፡ ተመልኣ፨
- ወለከናፍርኪ፡ ልሙጻት፡ እለ፡ ይከ<>ድና፡ ጽልኣ፨
- ኢየሉጣ፡ ረስዪ፡ ኃጢአትየ፡ ኅቡአ፨
- ሰብእሰ፡ ገፋኢ፡ መንገለ፡ ወፅአ፡ ወቦአ፨
- ኅቡአተ፡ አርኩ፡ ይክሥት፡ ዘርእየ፡ ወሰምዐ፨
-
- ሰላም፡ ለአፉኪ፡ ሥርዓተ፡ አርምሞ፡ ዘጠንቀቀ፨
- ወለአስናንኪ፡ ሰላም፡ እለ፡ መነና፡ ስላቀ፨
- አሪገኪ፡ ላዕለ፡ ኢየሉጣ፡ ወወሪደኪ፡ ዕመቀ፨
- ኅሥሢ፡ በኢጐንድዮ፡ ኀበ፡ ተገድፈ፡ ወወድቀ፨
- ንዋየ፡ ቤትኪ፡ ሰብእናየ፡ ወርቀ፨
-
- ሰላም፡ ለልሳንኪ፡ ወለቃልኪ፡ ቅዳሴ፨
- እለ፡ ያቄርባ፡ ዘልፈ፡ ለዘእንዘ፡ ዋሕድ፡ ሥላሴ፨
- ኢየሉጣ፡ አክሊሉ፡ ለዓመተ፡ ምሕረት፡ እምድምሳሴ፨
- ኪያኪ፡ እመ፡ ለአጥርዮ፡ አምጣነ፡ ኮንኩ፡ ኀሣሤ፨
- ብፅዓን፡ ሊተ፡ ወለኪ፡ ውዳሴ፨
-
- ሰላም፡ ለእስትንፋስኪ፡ መፍቅደ፡ ሕሙማን፡ ጥዒና፨
- ወለጕርዔኪ፡ ሰላም፡ ከመ፡ ወይነ፡ ትእምርት፡ ዘምድረ፡ ቃና፨
- ኢየሉጣ፡ ሰማዕት፡ ከመ፡ ቆምኪ፡ ውሳጤ፡ ርስና፨
- ይዋሄ፡ ተምህርት፡ እሳትኪ፡ ወተሳተፈት፡ ኂርውና፨
- እምእሳተ፡ ደብሩ፡ ለሙሴ፡ እንተ፡ ይእቲ፡ ሲና፨
-
- ሰላም፡ ለክሳድኪ፡ ዕጉሠ፡ ተመትሮ፡ በሰይፍ፨
- ወመትከፍትኪ፡ ሰላም፡ ክዱ(fol. 100r)ነ፡ ደመ፡ ስምዕ፡ ዐጽፍ፨
- ኢየሉታ፡ ሰማይ፡ ልዕልተ፡ ልዕልና፡ ትሩፍ፨
- ኢክህለ፡ ዐሪጎተኪ፡ ደመና፡ ሥቃያት፡ አእላፍ፨
- ወበጺሖተኪ፡ ስእነ፡ ነበልባል፡ ዖፍ፨
-
- ሰላም፡ ለዘባንኪ፡ መቅሠፍተ፡ ጥብጣቤ፡ ተዐጋሢ፨
- ወለእንግድዓኪ፡ ሰላም፡ መንበረ፡ ልቡና፡ ነጋሢ፨
- ኢየሉጣ፡ ልብኪ፡ ተራድኦ፡ ድኩም፡ እስመ፡ ኀሣሢ፨
- ለረዲኦትየ፡ ኀይለኪ፡ ልበሲ፨
- ሶበ፡ ምስሌየ፡ ተሣለቀ፡ ከይሲ፨
-
- ሰላም፡ ለሕፅንኪ፡ አርዑተ፡ ሥቃይ፡ ዘክህለ፨
- ወለአእዳውኪ፡ ሰላም፡ እለ፡ አስተባዝኃ፡ ገድለ፨
- ኢየሉጣ፡ ኮንኪዮ፡ ለሰብእናየ፡ ምጽላለ፨
- ኢይትሜነይ፡ ጊዜ፡ ሐሩር፡ እምአርዘ፡ ሊባኖስ፡ ቈጽለ፨
- ወእምአየራት፡ ኢየኀሥሥ፡ ጠላ፨
-
- ሰላም፡ ለመዛርእኪ፡ ማዕተበ፡ ሃይማኖት፡ እለ፡ ጾራ፨
- ወለኵርናዕኪ፡ ክቡድ፡ ዘቀጥቀጠ፡ አርእስተ፡ ሐራ፨
- ኢየሉጣ፡ ድሉት፡ _______
- [The remainder of the text is lost.]