Subjects
Righteous
ክርስቶስ፡ ሠምራ፡
Krəstos Śamrā
Krəstos Śamrā
Krəstos Śamrā
Krəstos Śamrā
Malkəʾ
-
- ሰላም፡ ለዝክረ፡ ስምኪ፡ ለክርስቶስ፡ ሥምረቱ፨
- እንዘ፡ ይብል፡ ካህን፡ አንተ፡ አንበቦ፡ እምጥንቱ፨
- ሥምረ፡ ክርስቶስ፡ ሠምራ፡ እስመ፡ ኢየሐጽጸኪ፡ ለለሰዓቱ፨
- ተረክበ፡ ፍካሬሁ፡ ለንባበ፡ ስምኪ፡ ዝንቱ፨
- ለኵሉሰ፡ ተነብዮ፡ ፍካሬ፡ አልቦቱ፨
-
- ሰላም፡ ለሥዕርተ፡ ርእስኪ፡ ለተላጽዮ፡ ተቀብአ፨
- ወለርእስኪ፡ ሰላም፡ እንተ፡ አብቈለት፡ ቆብአ፨
- በእሲተ፡ ኪዳን፡ ክርስቶስ፡ ሠምራ፡ አናቅጸ፡ እዝንኪ፡ በጕጉዓ፨
- በነግደ፡ ልሳንየ፡ ማኅሌትየ፡ እንተ፡ መንገሌኪ፡ መጽአ፨
- አርኅዊ፡ ሎቱ፡ ኢትቁም፡ በአፍአ፨
-
- ሰላም፡ ለገጽኪ፡ ዘሥነ፡ ጽድለቱ፡ ተነክረ፨
- አዕይንተ፡ ጽልመትኒ፡ ዘበብዝኃ፡ ብርሃኑ፡ አየረ፨
- ቅድመ፡ ገጸ፡ ንጉሥ፡ ክርስቶስ፡ ሠምራ፡ በዕለተ፡ እቀውም፡ ድኅረ፨
- ያከብር፡ ስብሐተኪ፡ ኪያየ፡ ግብረ፨
- ወክብረ፡ ገጽኪ፡ የኀባእ፡ ዘአፉየ፡ ነውረ፨
-
- ሰላም፡ ለቀራንብትኪ፡ እለ፡ ይሠርገዋ፡ ገጸ፨
- ወለአዕይንትኪ፡ ንዋም፡ እለ፡ እምኔሆን፡ ነፈጸ፨
- አመ፡ አፍአ፡ ኆኅት፡ ይቀውም፡ ክርስቶስ፡ ሠምራ፡ በደረ፡ ወሮጸ፨
- አርኅዊ፡ በምሕረትኪ፡ ዘበእደ፡ ኪሩብ፡ አንቀጸ፨
- እስመ፡ እንበሌኪ፡ ኢያጥረይኪ፡ ቢጸ፨
-
- ሰላም፡ ለአእዛንኪ፡ እለ፡ አፍጣና፡ ሰሚዓ፨
- ኲናተ፡ ቃሉ፡ ለወንጌል፡ እስመ፡ ውስተ፡ ልብኪ፡ ቦአ፨
- ውስተ፡ ቤተ፡ ከብካብ፡ ክርስቶስ፡ ሠምራ፡ አመ፡ በአትኪ፡ በፍግአ፨
- ጸግውኒ፡ ለጽማድኪ፡ አመ፡ አደልው፡ ለመርዓ፨
- እንተ፡ አሠነይኪ፡ ማኅቶተ፡ ወቅብአ፨
-
- ሰላም፡ ለመላትሕኪ፡ እምነ፡ ቅርፍቱ፡ ለሮማን፨
- እለ፡ ያነሥአ፡ ዘልፈ፡ አምሳላተ፡ እዝን፨
- ኢያብድሩ፡ ክርስቶስ፡ ሠምራ፡ እምነ፡ ለኪዳን፨
- ቅብአ፡ ረድኤትኪ፡ ወትንብልናኪ፡ ወይን፨
- ዘበደኃሪ፡ ይመጽእ፡ ዘመን፨
-
- ሰላም፡ ለአእናፊከ፡ እለ፡ አጼነዋ፡ ዕጣነ፨
- እምነ፡ ማዕጠንቱ፡ ለኪሩብ፡ ከመ፡ ትርስኢ፡ ኀዘነ፨
- እስከ፡ ዮም፡ ክርስቶስ፡ ሠምራ፡ ከመ፡ ጳውሎስ፡ ሊቅነ፨
- እስመ፡ ትዌስኪ፡ ዲበ፡ ሥን፡ ሥነ፨
- ዲበ፡ ዘመንየ፡ ወስኪ፡ ዘመነ፨
-
- ሰላም፡ እብል፡ ለከናፍርኪ፡ ልሙዳት፨
- ኢተኅዞ፡ ለጽልሰ፡ ወለግብረ፡ ኵሉ፡ ሐሜት፨
- ክብረ፡ ድንግል፡ ክርስቶስ፡ ሠምራ፡ ወትምክህተ፡ ኵሎን፡ አንስት፨
- ኪያየ፡ ይርዳእ፡ ጸሎትኪ፡ በሰዓተ፡ ደዌ፡ ወሞት፨
- እስመ፡ አኮኑ፡ ትረድኦ፡ ለጻድቅ፡ ጸሎት፨
-
- ሰላም፡ ለአፉኪ፡ ጥንቁቀ፡ ዘሤሞ፨
- ከመ፡ ኢይንብብ፡ ሐሰተ፡ ለዓቃቤሁ፡ አርምሞ፨
- ትተግዒ፡ ክርስቶስ፡ ሠምራ፡ ትእዛዘ፡ ዮሐንስ፡ ለፈጽሞ፨
- ነጸርኪ፡ ኅቡኣተ፡ ምስለ፡ ብዙኅ፡ ተደሞ፨
- በከመ፡ ነጸረ፡ ዮሐንስ፡ ለፍጥሞ፨
-
- ሰላም፡ ለአስናንኪ፡ እለ፡ ይመስላ፡ በረዳ፨
- ወለልሳንኪ፡ ጽልሑት፡ እንተ፡ ነገሩ፡ ይጽሕዳ፨
- ተዘኪረከ፡ ክርስቶስ፡ ሠምራ፡ ዘአመ፡ ሙሴ፡ ልማዳ፨
- ከመ፡ ትጽብዒ፡ ለዘይጸብሁኒ፡ ገሃዳ፨
- ዘትገንያ፡ ፈንዊ፡ ሙራዳ፨
-
- ሰላም፡ ለቃልኪ፡ ከመ፡ መጸብሐን፡ ዘኢተለበለ፨
- ወለእስትንፋስኪ፡ ሰላም፡ እንተ፡ ይስእል፡ አካለ፨
- በምግባርኪ፡ ክርስቶስ፡ ሠምራ፡ እንተ፡ አደውኪ፡ ሰኢለ፨
- በአይ፡ ዘኢተጽኢና፡ ዘእምአጽምኪ፡ ፈልፈለ፨
- ለዘበጌጋይ፡ አባልየ፡ ቈስለ፨
-
- ሰላም፡ ለጕርዔኪ፡ ዘሎቱ፡ ጥዑም፨
- ለእግዚአብሔር፡ ሕያው፡ ንባበ፡ ቃሉ፡ አዳም፨
- ዓቃቢተ፡ ሥራይ፡ ክርስቶስ፡ ሠምራ፡ ለሰብእናኪ፡ ድኩም፨
- ፈውስኪዮ፡ በቀኖና፡ ወኀጣእኪዮ፡ በጾም፨
- እስመ፡ በመብልዕ፡ ረከቦ፡ ሕማም፨
-
- ሰላም፡ ለክሳድኪ፡ በቅናተ፡ ሐብል፡ ለተጸምዶ፨
- ወለመታክትኪ፡ ዘጾረ፡ አርዑተ፡ መስቀል፡ በተዋርዶ፨
- ንሥእኒ፡ ክርስቶስ፡ ሠምራ፡ እምነ፡ ሰይጣን፡ ዘተካየዶ፨
- እስመ፡ በኵርኪ፡ ፈጣሪ፡ ሰአለ፡ ወሪዶ፨
- ምህርካሁ፡ ለሰይጣን፡ ሄዶ፨
-
- ሰላም፡ ለዘባንኪ፡ ወለእንግድአኪ፡ እለ፡ አብደሩ፨
- ህየንተ፡ ክዳናት፡ ዘወርቅ፡ በክዳነ፡ ማእስ፡ ይነብሩ፨
- ኢትፍልጥኒ፡ ክርስቶስ፡ ሠምራ፡ ለክርስቶስ፡ እማኅበሩ፨
- አርዌ፡ እኩይ፡ እንተ፡ ያጠብብ፡ በምክሩ፨
- ለእመ፡ ኪዳን፡ ኪድዮ፡ በእግሩ፨
-
- ሰላም፡ ለሕፅንኪ፡ ዘመከረ፡ እሙነ፨
- ምርፋቀ፡ ነዳያን፡ ይኩን፡ ወዘግፉዓን፡ ፀወነ፨
- እስመ፡ ሕገ፡ አምላክ፡ ረሰይኪ፡ ክርስቶስ፡ ሠምራ፡ ለፍኖትኪ፡ ብርሃነ፨
- ዘተሣየጠ፡ በሕፅንኪ፡ ዘአብርሃም፡ ሕፅነ፨
- ወበውስቴትኪ፡ ምርፋቅኪ፡ ኮነ፨
-
- ሰላም፡ ለአእዳውኪ፡ ጸብዐ፡ ቅዱስ፡ እለ፡ ተምኤራ፨
- ምስለ፡ መዛርዕ፡ ወኵርናዕ፡ ለተመጥዎ፡ መከራ፨
- በልማደ፡ አበው፡ ሰማየ፡ አመ፡ ፍልሰትኪ፡ ክርስቶስ፡ ሠምራ፨
- ኪያኪ፡ ለተበቅሎ፡ እንዘ፡ ይትባደራ፨
- እኅተ፡ ሙሴ፡ የበበት፡ ወጸለየት፡ ዲቦራ፨
-
- ሰላም፡ ለእመታትኪ፡ ወለእራኃትኪ፡ ክልኤ፨
- ለዘርአ፡ ሥጋየ፡ ዘይጸንዕ፡ በኃሣር፡ ክብረ፡ ትንሣኤ፨
- ለእመ፡ ረዊዮ፡ ክርስቶስ፡ ሠምራ፡ ምስለ፡ ዘለኪ፡ ጉባኤ፨
- ወቃለ፡ አቅርንት፡ አመ፡ ይከውን፡ ጸዋኤ፨
- ወዓውደ፡ እክሉ፡ ያስተናሥእ፡ መሥኤ፨
-
- ሰላም፡ እብል፡ ለአፃብዕኪ፡ ዐሠርቱ፨
- ምዕረ፡ በኂሩቱ፨
- አመታተ፡ ገድል፡ ወጻማ፡ ዐሠረ፡ ምስለ፡ ክልኤቱ፨
- ቦ፡ አመ፡ ቆምኪ፡ ለባሕረ፡ ጻና፡ ውስቴቱ፨
- ወቦ፡ ከመ፡ ከመ፡ በፍኖት፡ ሮጽኪ፡ ቦቱ፨
-
- ሰላም፡ እብል፡ ለዘዚአከ፡ ክበበ፨
- እንተ፡ ተከላ፡ እምሕፃን፡ ዘኢያነትግ፡ ንባበ፨
- በተውላጠ፡ ዝንቱሰ፡ ለኪ፡ ክርስቶስ፡ ሠምራ፡ እግዚአብሔር፡ ወሀበ፨
- ቂርቆስሃ፡ ወልደ፡ ካዕበ፨
- ለወላዲሁ፡ ለአከውን፡ አበ፨
-
- ሰላም፡ ለገቦኪ፡ ዘኢስከበ፡ ጕንዱየ፨
- አመጻኒ፡ በምስካቢሁ፡ ወደየ፨
- ከማኪሰ፡ ክርስቶስ፡ ሠምራ፡ ኀበ፡ ኢክህለት፡ ጐይየ፨
- ዘማ፡ ነገፈት፡ ለገቦሃ፡ ዘርቢተ፡ ሠናየ፨
- ወበውስቴቱ፡ ነሰነሰት፡ መጽርየ፨
-
- ሰላም፡ ለከርሥኪ፡ ምስለ፡ ዘለኪ፡ ልቡና፨
- ለኵልያትኪኒ፡ ዘተለዉ፡ ሕሊና፨
- ፍኖተ፡ ቅዱሳን፡ ክርስቶስ፡ ሠምራ፡ እንዘ፡ ትትባደረ፡ ለፍና፨
- ኢያትለዉ፡ ለኪ፡ ለድሙዓ፡ ማይ፡ አዕባነ፡ ቅዱስ፡ ወሲና፨
- ወለረኀብኪ፡ ስኩረ፡ ወመና፨
-
- ሰላም፡ እብል፡ ለዘዚአኪ፡ አማዑተ፨
- ወለንዋያትኪ፡ ዘውስጥ፡ እንዘ፡ አተሉ፡ ኅንብርተ፨
- ዕረፍተ፡ ኃጥኣን፡ ክርስቶስ፡ ሠምራ፡ ዘትመሰሊ፡ ሰንበተ፨
- ንሥእኒ፡ ለለጽባሑ፡ ኀለተ፡ ከናፍር፡ ጸሎተ፨
- በዘትመንኒ፡ ዘነፍስየ፡ ቤተ፨
-
- ሰላም፡ ለሐቌኪ፡ ቅኑተ፡ አስኬማ፡ ወዓዲም፨
- ወለአቍያጽኪ፡ ሰላም፡ አዕማደ፡ ሥጋ፡ ወደም፨
- አምሕለኪ፡ ክርስቶስ፡ ሠምራ፡ ዘአግዓዚ፡ ሕማም፨
- እስመ፡ ትረክብ፡ ሊተ፡ እማኅደረ፡ ዳኅራይ፡ ዓለም፨
- ዐይንኪ፡ ተኀጥአ፡ ንዋም፨
-
- ሰላም፡ ለአብራክኪ፡ እለ፡ አስገዳ፡ ዕሩየ፨
- አራዊተ፡ ቀላይ፡ ወየብስ፡ ለእንተ፡ ለኪ፡ አግነየ፨
- ኢይትርፍ፡ ብኪ፡ ክርስቶስ፡ ሠምራ፡ አስበ፡ ማኅሌትየ፨
- አባግዓ፡ የማን፡ እመ፡ ይቤ፡ ንዑ፡ ኀቤየ፨
- ቁመተ፡ አምላክ፡ ንግሪዮ፡ አስብያ፨
-
- ሰላም፡ ለአእጋርኪ፡ ለሐውጾ፡ ድምይ፡ ዘሮጹ፨
- ለምሒረ፡ ነዳይ፡ እንዘ፡ ኢትክዒ፡ ገጹ፨
- ክብረ፡ ድንግል፡ ክርስቶስ፡ ሠምራ፡ ለባሕረ፡ ጻና፡ አንቀጹ፨
- ወጾረ፡ ማርያም፡ ድንግል፡ ኪያየ፡ ሐወጹ፨
- ወለእለ፡ ይጸልዑኪሰ፡ ፍጡነ፡ ይንፍጹ፨
-
- ሰላም፡ ለሰኰናኪ፡ ወለመከየድኪ፡ በዕሪና፨
- አሣዕነ፡ ብሩር፡ ወርቅ፡ ይስእና፨
- ሀላዊተ፡ መቅደስ፡ ክርስቶስ፡ ሠምራ፡ አምሳለ፡ ስምዖን፡ ወሐና፨
- እንዘ፡ ትተልዊ፡ ዘተክለ፡ ሃይማኖት፡ ፍና፨
- እፎኑ፡ አመ፡ ረሰይኪ፡ ፄዋዋተ፡ ለሕፅና፨
-
- ሰላም፡ እብል፡ ለአፃብዕኪ፡ ዘአእጋር፨
- ምስለ፡ ዘዲቤሆን፡ አጽፋር፨
- ፈንዊ፡ ሊተ፡ ክርስቶስ፡ ሠምራ፡ ሐመረ፡ ዮሐንስ፡ ኄር፨
- ፈጽሚ፡ መዋዕልየ፡ አመ፡ ይእኅዝ፡ ሐመር፨
- እንዘ፡ እፈርህ፡ ተሠጥሞ፡ በሲኦል፡ ባሕር፨
-
- ሰላም፡ እብል፡ ለማእከላይ፡ ቆመ፡ ዚአኪ፨
- ለአዳም፡ ራእይ፡ ወዘቂሐቱ፡ ያወኪ፨
- ወበእንተዝ፡ ክርስቶስ፡ ሠምራ፡ አዋልደ፡ ንግሥት፡ ይብሉኪ፨
- ጥቀ፡ ስነኪ፡ ወጥቀ፡ አደምኪ፨
- ሥሙረ፡ በቀልት፡ ይመስል፡ ቆምኪ፨
-
- ሰላም፡ ለመልክእኪ፡ ጥቀ፡ ሠነየ፨
- እንዘ፡ ቍረ፡ ክረምት፡ ይትቀባዕ፡ ወይሠርግው፡ ዋዕየ፨
- ቤተ፡ ነፍስየ፡ ክርስቶስ፡ ሠምራ፡ እንዘ፡ እፈቱ፡ ርእየ፨
- አርኅውኒ፡ እኅትየ፡ ካልእትየ፨
- ሶበ፡ ኀቤኪ፡ አፍቀረት፡ ነፍስየ፨
-
- ሰላም፡ ለፀአተ፡ ነፍስኪ፡ ለመዝሙረ፡ ዳዊት፡ በድምፁ፨
- ወጼና፡ ዕጣን፡ ካህናት፡ አመ፡ ኪያኪ፡ ሐወጹ፨
- በጺሐኪ፡ ክርስቶስ፡ ሠምራ፡ ለክርስቶስ፡ ቅድመ፡ ገጹ፨
- ለአርዊ፡ ቀዳማዊ፡ መሥገርተ፡ አዳም፡ ወቢጹ፨
- እስመ፡ ኢያጽለልኪ፡ በቈጽሉ፡ ወሠርፁ፨
-
- ሰላም፡ ለበድነ፡ ሥጋኪ፡ ምዑዘ፡ ከልበኔ፡ ወአፈዋት፨
- ወለግንዘትኪ፡ ሰላም፡ በልብሰ፡ ሰንዱናት፨
- ፀበለ፡ ድካም፡ ሥጋየ፡ ምዉት፨
- አመ፡ ይዘረው፡ ክድኒዮ፡ ክርስቶስ፡ ሠምራ፡ ገነት፨
- እስመ፡ እምጽሎቱ፡ ይትጋባእ፡ ሥጋየ፡ መሬት፨
-
- ሰላም፡ ለመቃብርኪ፡ በደሴተ፡ ጻና፡ ወጽንፋ፨
- ወለትንሣኤኪ፡ ድኅረ፡ ለነሢአ፡ ዕሤት፡ ወተስፋ፨
- ሰአሊ፡ ክርስቶስ፡ ሠምራ፡ ምስለ፡ ጳውሎስ፡ ወኬፋ፨
- በበግዕ፡ ወጠሊ፡ አመ፡ ይትነበብ፡ ዘዘልፋ፨
- ምስለ፡ አባግዕ፡ ያቁመኒ፡ አልፋ፨
-
- ሰላም፡ ለዕርገትኪ፡ መንገለ፡ ዘዐርገ፡ ርእስ፨
- አኮ፡ በሥጋ፡ ዳዕሙ፡ በነፍስ፨
- ክርስቶስ፡ ሠምራ፡ ሥንኪ፡ ኀበ፡ ዘሠምረ፡ ክርስቶስ፨
- ተንብሊ፡ ለለጽባሑ፡ በርደተ፡ መንፈስ፡ ቅዱስ፨
- ለዛቲ፡ መቅደስ፡ ወለዛቲ፡ ተርሴስ፨
-
- አንጽሕኒ፡ ክርስቶስ፡ ሠምራ፡ በጸሎትኪ፡ ዘሠምረ፨
- ለዘኢተሐፀብኩ፡ ገብር፡ እንተ፡ አርኀወ፡ ደብረ፨
- በቃለ፡ ጸሎቱ፡ ለሙሴ፡ አዕጽምተ፡ አበው፡ አክበረ፨
- ጸሊማን፡ አዕይንቲሁ፡ ለሮቤል፡ ዘቆረ፨
- ስእመ፡ ከመ፡ በረድ፡ ጽዕድው፡ ወመሰሉ፡ ፀምረ፨
-
- ተክለ፡ ሃይማኖት፡ በጻማሁ፡ ወለአፈ፡ ወርቅ፡ ብፁዕ፨
- እስእለኪ፡ ክርስቶስ፡ ሠምራ፡ በማእከለ፡ ጉቡኣን፡ ሰብእ፨
- እምወይነ፡ ቤልኪ፡ እስተይ፡ አርከ፡ ነፍስኪ፡ ጽሙዕ፨
- ወረደ፡ ለኪ፡ አኮኑ፡ በእደ፡ ሚካኤል፡ ጽዋዕ፨
- ጽዋዕኪሰ፡ ውእቱ፡ ጽኑዕ፨
-
- ውዳሴ፡ ይደሉ፡ ለጸጋኪ፡ ክርስቶስ፡ ሠምራ፡ እምነ፨
- እስመ፡ ርድእኒ፡ ጸጋኪ፡ ወጸግውኒ፡ ሥልጣነ፨
- ከመ፡ ኢይበሉኒ፡ ፀር፡ በአስተናሥኦ፡ ልሳነ፨
- ሕንፃ፡ ውዳሴኪ፡ እንበለ፡ አቅሙ፡ መጠነ፨
- ወዘወጠነሰ፡ ፈጽሞተ፡ ስእነ፨