Subjects
Righteous
ዘርአ፡ ያዕቆብ፡
Zarʾa Yāʿqob
Zarʾa Yāʿqob
Zarʾa Yāʿqob
Zarʾa Yāʿqob
Malkəʾ
-
- በስመ፡ እግዚአብሔር፡ ንጉሥ፡ ዘለዓለም፡ መንግሥቱ፨
- ናሁ፡ ወጠንኩ፡ ሰላመ፡ መልክእከ፡ በበ፡ ፍኖቱ፨
- ባሕቱ፡ ርድአኒ፡ ዘርአ፡ ያዕቆብ፡ ለፈጽሞቱ፨
- እመሰ፡ ፈቀከ፡ እግዚኦ፡ ኢይሰአነከ፡ ዝንቱ፨
- እስመ፡ ሀብተ፡ ረድኤት፡ ለከ፡ ተውህበ፡ እምጥንቱ፨
-
- ሰላም፡ ለዝክረ፡ ስምከ፡ በዓለ፡ ዐቢይ፡ ምልክና፨
- ወለሥዕርትከ፡ ዘጽሕደ፡ በቅብአ፡ ዕጐልት፡ ንጽሕና፨
- ዘርአ፡ ያዕቆብ፡ ሙሴ፡ መልአከ፡ ራምሴ፡ ወሲና፨
- አዕይንተ፡ አውሴ፡ ወካሌብ፡ ሕዋሳትየ፡ ከመ፡ ሰብአ፡ ይኩና፨
- መንገለ፡ ምድረ፡ ርስት፡ ምድረ፡ ጥበብ፡ አብሐን፡ ፍና፨
-
- ሰላም፡ ለሕፅንከ፡ ምርፋቀ፡ አጋእዝት፡ ሠለስቱ፨
- ወለአእዳዊከ፡ ፍቱሓት፡ እማእስረ፡ ዓለም፡ ዝንቱ፨
- ዘርአ፡ እስራኤል፡ ያዕቆብ፡ ለእግዚአብሔር፡ መክፈልተ፡ ርስቱ፨
- ለምዕራፈ፡ አፅምከ፡ ዳጋ፡ ለእስጢፋኖስ፡ ምኔቱ፨
- ብዕለ፡ ነፍስ፡ ወብዕለ፡ ሥጋ፡ ጸግዋ፡ በከንቱ፨
-
- ነዋ፡ አቅረብኩ፡ ለመንግሥትከ፡ ፍሬ፡ ከናፍር፡ ጸባሕተ፨
- በፍቅደ፡ ራብዓይ፡ ሱባዔ፡ መጠነ፡ ተክህለኒ፡ ሊተ፨
- ዘርአ፡ ያዕቆብ፡ ሀበኒ፡ እምዕሤትየ፡ ዕሤተ፨
- አበ፡ ነጋሢ፡ ይሁብ፡ አኮኑ፡ ብዙኀ፡ ሀብተ፨
- ለእመ፡ ብእሲ፡ ወሀቦ፡ ንዋየ፡ ንስቲተ፨