Subjects
Righteous
ሲኖዳ፡
Sinodā
Sinodā
Sinodā
Malkəʾ
-
- ለወልደ፡ ነጐድጓድ፡ ዮሐንስ፡ ወለእለ፡ ኬፋ፡ አብያጺሁ፨
- ዘወሀብኮሙ፡ ሥልጣነ፡ ማእስረ፡ ኀጢኣት፡ ይፍትሑ፨
- ጰራቅሊጦስ፡ ነዓ፡ አናቅጸ፡ ልብየ፡ ታርኁ፨
- ለአባ፡ ሲኖዳ፡ ከመ፡ እዜኑ፡ ዜናሁ፨
- እስመ፡ ድኅረ፡ ማዕረር፡ አኀዝኩ፡ ወወጠንኩ፡ ናሁ፨
-
- ሰላም፡ ለዝክረ፡ ስምከ፡ በትርሲተ፡ ጸጋ፡ ወሞገስ፨
- ዘአሠርገዎ፡ ፍጹመ፡ ሊቀ፡ ካህናት፡ ክርስቶስ፨
- ገባሬ፡ መንክራት፡ ሲኖዳ፡ ከመ፡ ጊዮርጊስ፨
- እስከ፡ እፌጽም፡ ስብሐቲከ፡ እምኀዘነ፡ ሥጋ፡ ወነፍስ፨
- ለበግዐ፡ ቤትከ፡ ዕቀበኒ፡ ኖላዊ፡ ሐዲስ፨
-
- አምኃ፡ ሰላም፡ ኣቄርብ፡ ለቆብእከ፡ አክሊለ፡ ሦክ፨
- ወእዜምር፡ ካዕበ፡ ለአስኬማከ፡ ቡሩክ፨
- መልከ፡ ጼዴቅ፡ አንተ፡ ሲኖዳ፡ ካህነ፡ አምላክ፨
- ተማሕፀንኩ፡ ከመ፡ ትዕቀባ፡ በረድኤትከ፡ ምስማክ፨
- ወበጸሎትከ፡ ለነፍስየ፡ እምአርዌ፡ ድሩክ፨
-
- ዓዲ፡ ሰላም፡ ለአጽፈ፡ መላእክት፡ አጽፍከ፨
- ለቀሚስኒ፡ ወቅናት፡ እለ፡ ድርዓ፡ መዊእ፡ ኮኑከ፨
- ሲኖዳ፡ አቡየ፡ ቃለ፡ አምላክከ፨
- ኢትርሳዕ፡ በተዘክሮ፡ አድኅኖተ፡ ነዳይ፡ ወልድከ፨
- እመስተዐግላን፡ ሰብእ፡ ጽባሐ፡ ወርስከ፨
-
- የአምር፡ እግዚአብሔር፡ ዘይፈትን፡ ልበ፡ ወኵልያተ፨
- ለተወድሶ፡ ወትምክሕት፡ ከመ፡ ኢያቅረብኩ፡ ዘንተ፨
- ለዕበየ፡ ዝንቱ፡ ጻድቅ፡ ኍልቈ፡ ሠላሳ፡ ማሕሌተ፨
- ኀሢሥየ፡ እንሣእ፡ ባሕቱ፡ ዐሥበ፡ መስተገብር፡ ዕሤተ፨
- ወይጸግወኒ፡ በጸጋሁ፡ ባርኮ፡ ንስቲተ፨