Subjects
Righteous
ዘሩፋኤል፡
Zarufāʾel
Zarufāʾel
Zarufāʾel
Malkəʾ
-
- በስመ፡ አብ፡ ወወልድ፡ ቃል፡ ቀዳማዊ፨
- ወመንፈስ፡ ቅዱስ፡ ማሕየዊ፨
- ዘወጠንኩ፡ ዘንተ፡ ዜና፡ ዘሩፋኤል፡ ያዕቆባዊ፨
- ታብጽሒ፡ ኀበ፡ ፍጻሜ፡ ምስለ፡ ገብርኪ፡ ጻማዊ፨
- አምጻኢተ፡ ምሕረት፡ ለሰብእ፡ ማርያም፡ ሀልዊ
-
- ሰላም፡ ለዝክረ፡ ስምከ፡ ዘመዐዛሁ፡ አዳም፨
- እመዐዛ፡ ጽጌ፡ ጥንቁቅ፡ እንተ፡ ይጸግዮ፡ ገዳም፨
- ዘሩፋኤል፡ ጸዋሚ፡ ድግዱገ፡ ሥጋ፡ ወአፅም፨
- ናሁ፡ ያስተበፅዑከ፡ በአርጋኖነ፡ ቃል፡ ጥዑም፨
- አናስር፡ ኵሉ፡ ነገድ፡ ዘያፌት፡ ወሴም፨
-
- ሰላም፡ ለአእናፊከ፡ እለ፡ አጼነዋ፡ እምርኁቅ፨
- መዐዛ፡ ኢየሱስ፡ ክርስቶስ፡ ሰላመ፡ ክልኤ፡ ደቂቅ፨
- ዘሩፋኤል፡ ዴጋኒ፡ አሰረ፡ ሲኖዳ፡ ጻድቅ፨
- ኢተመሰሉ፡ በቅድሜከ፡ መጠነ፡ አሐቲ፡ ጸሪቅ፨
- መዛግብተ፡ ብሩር፡ ጽሩይ፡ ወቀይሕ፡ ወርቅ፨
-
- ሰላም፡ ለመትከፍትከ፡ ሥርግወ፡ ሱራሄ፡ ትብልያ፨
- ዘብዑድ፡ ግብረቱ፡ እምቢሶስ፡ ካህን፡ ግብረ፡ ኬንያ፨
- ዘሩፋኤል፡ መብርሂ፡ ዕንቈ፡ ኤዎስጣቴዎስ፡ ዘአርማንያ፨
- ስብከትከ፡ ፈልፈለ፡ ማይ፡ እስመ፡ ፍሬ፡ ጥበብ፡ አፍረያ፨
- ገነተ፡ ሲኖዳ፡ ትትፌሣሕ፡ ወትትሐሠይ፡ ነያ፨
-
- ሰላም፡ ለመቃብሪከ፡ ዘያስተጋኒ፡ አእላፈ፨
- ኀይለ፡ አርያም፡ ውስቴቱ፡ እስመ፡ አዕረፈ፨
- ዘሩፋኤል፡ ዘንተ፡ ይባቤ፡ እንዘ፡ ትሬሲ፡ ውኩፈ፨
- ሀቦሙ፡ ለሱራፌል፡ ከመ፡ ያንብብዎ፡ ዘልፈ፨
- ወበጽሌ፡ ልብከ፡ እግዚእየ፡ የሀሉ፡ ጽሑፈ፨
-
- እምትሩፋቲሁ፡ ትሩፍ፡ ንስቲተ፡ ክፍለ፨
- ለዘሩፋኤል፡ ኤልያስ፡ ገዳመ፡ ጽሙና፡ ዘኤለ፨
- ናሁ፡ ፈጸምኩ፡ እንዘ፡ ታቀንተኒ፡ ኀይለ፨
- ማርያም፡ በትረ፡ እማሬ፡ እንበለ፡ ትስቀይ፡ ጠለ፨
- ዘጸገየት፡ ለነ፡ ወፈረየት፡ ቃለ፨