Subjects
Righteous
ገብረ፡ ክርስቶስ፡
Gabra Krəstos
Alexius
Gabra Krəstos
Alexius
Malkəʾ
-
- አሐሊ፡ ማሕሌተ፡ ለዝክረ፡ ስምከ፡ እንዘ፡ እወጥን፡ ሰላመ፨
- አብድልመሲሕ፡ ስሙይ፡ በአፈ፡ አቡከ፡ ቅድመ፨
- ወብእሴ፡ እግዚአብሔርኒ፡ በአፈ፡ ማርያም፡ ዳግመ፨
- ጸውዖ፡ ስምከ፡ ገብረ፡ ክርስቶስ፡ ከዊኖ፡ ጥዑመ፨
- መንገለ፡ ድኂን፡ በኪዳኑ፡ ጸውዐ፡ ዓለመ፨
-
- ሰላም፡ ለሥዕርተ፡ ርእስከ፡ እምቅብዓ፡ መንግሥት፡ ቅድው፨
- ዘአፍቀረ፡ ሕጻባተ፡ ጻሕል፡ ዲቤሁ፡ ይትከዐው፨
- ወይስሕባከ፡ በመዓት፡ ዘአግብርቲከ፡ አእዳው፨
- ተኀይልከ፡ ለተጋድሎ፡ ገብረ፡ ክርስቶስ፡ ውርዝው፨
- በሥዕርትከ፡ ጸሊም፡ ወአኮ፡ ጽዕድው፨
-
- ሰላም፡ ለፍጽምከ፡ ማዕተበ፡ ብርሃን፡ ዘዐተቦ፨
- ወበእንተዝ፡ ጽልመት፡ ግሙራ፡ ኢይቀርቦ፨
- ገብረ፡ ክርስቶስ፡ ርድአኒ፡ እመ፡ አልጻቁ፡ ለተመንድቦ፨
- ምንዳቤ፡ ዘየአምር፡ ዘረከቦ፨
- ምንዳቤ፡ ኀበ፡ ቦ፡ ወዘሰ፡ ኢረከበ፡ ኢየአምር፡ አልቦ፨
-
- ሰላም፡ ለመቃብሪከ፡ ለብርሃነ፡ ሰማይ፡ ምሕያኡ፨
- ወመካነ፡ ፈውስ፡ ለሕሙማን፡ እለ፡ እመሬቱ፡ ተቀብኡ፨
- ምስሌከ፡ ጻድቃን፡ አመ፡ እመቃብር፡ ይትነሥኡ፨
- አንሥአኒ፡ ገብረ፡ ክርስቶስ፡ ኀበ፡ ይብሎሙ፡ በግዑ፨
- ቡሩካኑ፡ ለአቡየ፡ ንዑ፨
-
- እምውዳሴከ፡ ብዙኅ፡ ዘኢይትፌጸም፡ በፍካሬ፨
- መጠነ፡ ብየ፡ ነገርኩ፡ ወኢኀባእኩ፡ በስዋሬ፨
- ዳግመ፡ እትሜነይ፡ በቃለ፡ ፍሥሓ፡ ለዝማሬ፨
- ምስሌከ፡ ገብረ፡ ክርስቶስ፡ ክፍለኒ፡ ኑባሬ፨
- ውስተ፡ ምድረ፡ ገነት፡ ሥርግውት፡ በጽጌ፡ ወፍሬ፨
-
- ኦገብረ፡ ክርስቶስ፡ እንዘ፡ ታቀድም፡ ፍዳ፡ ሰላም፡ ወሀብተ፡ በረከት፡ ታተሉ፨
- ትበለኒ፡ ሊተ፡ ይእዜ፡ ይደሉ፨
- ንሣእ፡ ፍቁርየ፡ በእንተ፡ ስራሕከ፡ ኵሉ፨
- ዐስበ፡ ንዴት፡ ብዕለ፡ ለዓለም፡ ዘይሄሉ፨