Subject
Malkəʾ
-
- በስመ፡ እግዚአብሔር፡ ሕያው፡ ወማሕየዊ፡ ዘዋሕድ፡ ባሕርይሁ፨
- ወሥሉስ፡ አካላቲሁ፨
- አፍቀረነ፡ እግዚእ፡ እንግር፡ ውዳሴ፡ መልክእከ፡ በበ፡ ጾታሁ፨
- ፈኑ፡ ሊተ፡ ይእዜ፡ አንቀጸ፡ ለብየ፡ ያርኁ፨
- ጰራቅሊጦስሃ፡ መንፈሰ፡ ጸጋ፡ ዘፍጹም፡ ጸጋሁ፨
-
- ሰላም፡ ለዝክረ፡ ስምከ፡ በስመ፡ እግዚአብሔር፡ ዘተጸውዐ፨
- ወለሥዕርትከ፡ ጽሑድ፡ ዘተከለለ፡ ቆብዐ፨
- አፍቀረነ፡ እግዚእ፡ ጳጳስ፡ ዘይንዕዳ፡ በአፍአ፨
- ከመ፡ እክሥት፡ እምተሠውሮ፡ መድፍነ፡ ውዳሴ፡ ኅቡአ፨
- በውስተ፡ ከርሥየ፡ ሐድስ፡ መንፈሰ፡ ርቱዐ፨
-
- ሰላም፡ ለግንዘተ፡ ሥጋከ፡ በአፈወ፡ ዕፍረት፡ ወከርቤ፨
- ወለመቃብሪከ፡ ሰላም፡ በኅዝአትከ፡ ጉግቤ፨
- አፍቀረነ፡ እግዚእ፡ ገብርኤል፡ መልአከ፡ ስብሐት፡ ወይባቤ፨
- ኢትኅድገኒ፡ ለሕዝብከ፡ በውስተ፡ ኵሉ፡ ምንዳቤ፨
- እስመ፡ ዘእንበሌከ፡ ባዕድ፡ አልብነ፡ መጋቤ፨
-
- ሰላም፡ ለበትረ፡ እዴከ፡ እምበትረ፡ አሮን፡ ዘዐብየ፨
- ለፈውሰ፡ ብእሲ፡ ሕሙም፡ እስመ፡ አንቅዐ፡ ማየ፨
- አፍቀረነ፡ እግዚእ፡ ግዘር፡ ዐቅመ፡ ኅሊናሁ፡ ኀለየ፨
- በዝንቱ፡ ማሕሌትከ፡ እመ፡ ብእሴ፡ ትካዝ፡ ጸለየ፨
- እስከነ፡ ይስዕር፡ መናፍስተ፡ ወይፌውስ፡ ድዉየ፨
-
- አፍቀረነ፡ እግዚእ፡ በዕበይከ፡ ፍዳ፡ አቅረብኩ፡ ማሕሌተ፡ ውኁደ፨
- ለእግዚአብሔር፡ ሰአሎ፡ ወአስተብቍኦ፡ ገሀደ፨
- እምላዕሌየ፡ አቅልል፡ ጾረ፡ ኀጢአት፡ ክቡደ፨
- እስመ፡ አብየ፡ ወተለዐለ፡ እምኀጢአተ፡ ሰብእ፡ ፈድፉደ፨
- ዘከማየ፡ ሰብአ፡ ኢወለድከ፡ ወልደ፨
-
- አምኃ፡ ሰላም፡ አቅረብኩ፡ ለመልክእከ፡ እስመ፡ ይደሉ፡ ንስቲተ፨
- ነዳየ፡ አእምሮ፡ ወልድከ፡ መጠነ፡ ተክህለኒ፡ ሊተ፨
- አፍቀረነ፡ እግዚእ፡ ክፍልየ፡ ዘረሰይኩከ፡ መክፈልተ፨
- ውኩፈ፡ ይኩን፡ በቃልከ፡ ወኢይትኀደግ፡ እቱተ፨
- እስመ፡ ወልድከ፡ አነ፡ ዘበጽድቅ፡ ወአቡየ፡ አንተ፨