Subject
Malkəʾ
-
- በስመ፡ አካለ፡ አብ፡ ባሕርይ፡ ወበአካለ፡ ወልድ፡ ቃል፨
- ወበስመ፡ አካሉ፡ ሕይወት፡ ለመንፈስ፡ ቅዱስ፡ ባዕል፨
- ዜና፡ መልክኡ፡ እትናገር፡ ለአፍቀረነ፡ እግዚእ፡ መርጡል፨
- ጥበበ፡ ባስልኤል፡ ማርያም፡ ለልቡናየ፡ ምስሐል፨
- ኪሩቤል፡ አእምሮ፡ ጸልሊ፡ ዘክንፉ፡ መስቀል፨
-
- ሰላም፡ ለዝክረ፡ ስምከ፡ መዝገበ፡ ሕይወት፡ ወተስፋ፨
- ወለሥዕርትከ፡ ልጹይ፡ ለሰንዱነ፡ እንጦስ፡ ዘትትዐጽፋ፨
- አፍቀረነ፡ እግዚእ፡ መምህር፡ ተመጣዌ፡ ትምህርት፡ እምቃለ፡ ኬፋ፨
- ኢትግድፈኒ፡ ውስተ፡ ደይን፡ ከመ፡ ለሰዶም፡ ገደፋ፨
- እግዚአብሔር፡ ዘኮነ፡ ለጥበብ፡ ምዕራፋ፨
-
- ሰላም፡ ለአእናፊከ፡ እለ፡ ያጼንዋ፡ በኁባሬ፨
- ምስለ፡ ከናፍሪከ፡ ደርገ፡ ዘተሐውዙ፡ ጾታ፡ ዝማሬ፨
- አፍቀረነ፡ እግዚእ፡ ዘትሔውጽ፡ መሳክወ፡ አሚን፡ ምስለ፡ ፍካሬ፨
- ከመ፡ ዕፀ፡ በለስ፡ ርግምት፡ ይትዐረቅ፡ እምፍሬ፨
- ገነተ፡ ሕይወቱ፡ ለልዮን፡ ዘኦዶ፡ ምዝባሬ፨
-
- ሰላም፡ ለመቃብሪከ፡ ደብረ፡ ጉግቤን፡ ቂሳርያ፨
- ወለቤትከ፡ ምጽሌ፡ ካልእተ፡ አግያ፡ ሶፍያ፨
- አፍቀረነ፡ እግዚእ፡ ምክር፡ ምክረ፡ ተሣህሎ፡ ጽድቅ፡ ዘይሤንያ፨
- ናሁ፡ ለወይንከ፡ እንስሳ፡ ገዳም፡ ተርእያ፨
- ወሐራውያ፡ ሐቅል፡ አርኰሳ፡ ዘባቲ፡ አርአያ፨
-
- ጸራይቀ፡ ማሕሌት፡ ዘተረክበ፡ እምንዴተ፡ ልሳን፡ ወከናፍር፨
- ለዕበይከ፡ አቅረብኩ፡ በኍልቈ፡ ሠላሳ፡ ብሩር፨
- አፍቀረነ፡ እግዚእ፡ ሊቆሙ፡ ለያዕቆባውያን፡ ማኅበር፨
- ግበር፡ ሊተ፡ እግዚኦ፡ ለደምስሶ፡ ጌጋይ፡ ወነውር፨
- እስመ፡ አነ፡ ረድእ፡ ወአንተ፡ መምህር፨