Subjects
Apostle
ቲቶ፡
Tito
Titus
Titus
Malkəʾ
-
- ከመ፡ እሕሊ፡ ማሕሌተ፡ መንፈሰ፡ ጸጋከ፡ ሀበኒ፨
- ዘየሌብወኒ፨
- መንፈስከ፡ ሀኬት፡ ሊተ፡ ከመ፡ ኢይምአኒ፨
- ቲቶ፡ አቡየ፡ ነዓ፡ ርድአኒ፨
- ሶበ፡ ጸዋዕኩከ፡ ነዓ፡ በለኒ፨
-
- ሰላም፡ ለዝክረ፡ ስምከ፡ ዘጼወ፡ መለኮት፡ ቀሰማ፨
- አፉየ፡ ኮነ፡ ከመ፡ አስካለ፡ ወይን፡ ጣዕማ፨
- ቲቶ፡ ብፁዕ፡ ለቤተ፡ ክርስቲያን፡ ተቅዋማ፨
- በስምከ፡ ተማሕፀንኩ፡ እመልአከ፡ ቀላይ፡ መስቴማ፨
- በዲበ፡ ትእዛዝ፡ ለአማስኖ፡ ዘይፈጥር፡ ጻማ፨
-
- ሰላም፡ እብል፡ ለኵሎን፡ መልክእከ፡ ሥጋከ፡ በኁባሬ፨
- ንጽሐ፡ መላእክት፡ ዘልፈ፡ እለ፡ ለብሳ፡ ከመ፡ ጶዴሬ፨
- ቲቶ፡ ኅሩይ፡ ወሠናይ፡ ፍሬ፨
- ተማሕፀንኩ፡ በመልክእከ፡ ጽዱለ፡ ሥን፡ እምወራውሬ፨
- ተሰጠው፡ ማሕሌትየ፡ ወዘንተ፡ ዝማሬ፨
-
- ኵሉ፡ ሰብእ፡ ኀበ፡ ዘይዘውጎ፡ ይተሉ፨
- ነሢአከ፡ ጸጋ፡ እምነ፡ ላዕሉ፨
- ነዓ፡ ምስሌየ፡ ከመ፡ ተሀሉ፨
- እምእደ፡ አቡሁ፡ ነሢኦ፡ በረከት፡ ይደሉ፨
- ቲቶ፡ መምህረ፡ ሕግ፡ ለሉቃስ፡ አምሳሉ፨