Subjects
Apostle
ሉቃስ፡
Luqās
Luke
Luke
Malkəʾ
-
- ሰላም፡ እብል፡ ስመከ፡ ውዱሰ፨
- በመጽሐፈ፡ ሕይወት፡ ክርቱሰ፨
- ሉቃስ፡ ኪያከ፡ ልብየ፡ ኀሠሠ፨
- እምታሕተ፡ አምላክ፡ አጥረይኩከ፡ አንሰ፨
- ለስምየ፡ አባ፡ ሀቦ፡ ሞገሰ፨
-
- ሰላም፡ ለጸላሎትከ፡ በጽላሎተ፡ አምላክ፡ ኀዳሪ፨
- ዘተሐውር፡ በንጹሕ፡ ወጽድቅ፡ እንዘ፡ ገባሪ፨
- ሉቃስ፡ ቅኑይ፡ ዘእግዚአብሔር፡ ነባሪ፨
- ለሀብተ፡ ዚአየ፡ ኪያከ፡ እሐሪ፨
- ተኖለወኒ፡ እስከ፡ ነፍስ፡ ደኃሪ፨
-
- ሰላም፡ ለመልክእከ፡ እለ፡ ተጽሕፋ፡ ቅድመ፨
- ዘደመ፡ ኢየሱስ፡ ከዊኖ፡ ቀለመ፨
- መክፈልትየ፡ ሉውቃስ፡ ዘአድማዕኩከ፡ ፍጹመ፨
- ከማየ፡ አልቦ፡ በዓለም፡ ዘደክተመ፨
- በእንተ፡ ኢየሱስ፡ ኩነኒ፡ አበ፡ ወእመ፨
-
- ሰላም፡ ለሥዕርትከ፡ እምእግዚአብሔር፡ ኍሉቅ፨
- እምኔሆን፡ አሐቲ፡ እንተ፡ ኢትወድቅ፨
- አስተርአይከ፡ ሉቃስ፡ ከመ፡ ዘመብረቅ፨
- ዜና፡ ስብከትከ፡ በነገር፡ ዕሙቅ፨
- አዋከዮ፡ ለዐረብ፡ እምሰርቅ፨
-
- ሰላም፡ ለበድነ፡ ሥጋከ፡ በሰንዶናት፡ ዘተገንዘ፨
- ለሕዝበ፡ እስራኤል፡ በከመ፡ ተአዘዘ፨
- ዘተሐብር፡ ሉቃስ፡ ዘጳውሎስ፡ ግዕዘ፨
- ሥነ፡ ምግባሪከ፡ ያከፍእ፡ ቤዘ፨
- ርትዐተ፡ ልብከ፡ ይመስል፡ በለዘ፨
-
- ሰላም፡ ለመቃብሪከ፡ ለሥጋከ፡ መዝገቡ፨
- እስከ፡ ይበጽሕ፡ ሰዐ፡ ከብከቡ፨
- ለእግዚአብሔር፡ ሉቃስ፡ እምነ፡ ኅሩያን፡ ሕዝቡ፨
- እምቃለ፡ ትምህርትከ፡ ስቴ፡ ጽሙዓነ፡ ረከቡ፨
- ለማየ፡ ወንጌል፡ አንተ፡ ምንሐቡ፡ ወርሰርቡ፨
-
- ሰላም፡ ለመልክእከ፡ ወለአባላቲከ፡ በኆልቍ፨
- ጽዱላን፡ አዕናቍ፨
- መዐዛከኒ፡ ጽጌ፡ ሰንሰሪቍ፨
- በዐጸደ፡ ንጉሥ፡ ቀዋሚ፡ እንተ፡ ኢትንህል፡ ዕጥቍ፨
- ወሥዕርቲነ፡ ሉቃስ፡ ዘሕቍ፨
-
- ዜና፡ ውዳሴከ፡ ጥንቁቀ፡ ዘኢያሠነይኩ፡ ተናግሮ፨
- በተሐብሎትየ፡ አላ፡ መጠነ፡ ክህልኩ፡ ዘእፌጽሮ፨
- አልቦ፡ ፍርሀት፡ ውስተ፡ ተፋቅሮ፨
- ዘገደፍኩ፡ ወዘወሰኩ፡ በዘአልብየ፡ አእምሮ፨
- ለቃለ፡ ማሕሌትየ፡ አርቲአከ፡ ለዓለም፡ ሥመሮ፨