Subjects
Apostle
ማርቆስ፡
Mārqos
Mark
Mark
Malkəʾ
-
- ቀዳሚሁ፡ ለወንጌለ፡ ኢየሱስ፡ ክርስቶስ፨
- በርእሰ፡ መጽሐፍ፡ ዘትቤ፡ ማርቆስ፡ ቅዱስ፨
- ውዳሴከ፡ አባ፡ ለዘአኅሥሥ፨
- ከመ፡ እፈጽም፡ ወጢንየ፡ ዘእንበለ፡ ሀኬት፡ ወባእስ፨
- በሐመረ፡ ሰላም፡ አብጽሐኒ፡ ኀበ፡ ዛሕን፡ ወመርስ፨
-
- ሰላም፡ ለልደትከ፡ እምከርሠ፡ ኔኒም፡ ወተርቡን፨
- ማርቆስ፡ ዮሐንስ፡ ዘተሰመይከ፡ መቅለሌ፡ ዓፀባ፡ ወኀዘን፨
- እምቅድመ፡ ትጽንስከ፡ ትቤ፡ እምከ፡ መካን፨
- እምአርባዕቱ፡ ብርሃናት፡ ወንጌላዊያን፨
- ተውሀበኒ፡ በሕልምየ፡ አሐዱ፡ ብርሃን፨
-
- ሰላም፡ ለዝክረ፡ ስምከ፡ ምሉአ፡ ሞገስ፡ ወግርማ፨
- አንበሳ፡ ነባቢ፡ ለግብጽ፡ በአድያማ፨
- እጼውዐከ፡ ማርቆስ፡ ተሰጠወኒ፡ እምራማ፨
- ወተናገረኒ፡ በመልክእከ፡ ሰላማ፨
- በሐዋዝ፡ ቃል፡ በጥዑም፡ ዜማ፨
-
- ሰላም፡ ለዋካ፡ ፍጽምከ፡ እምእግረ፡ ፀሓይ፡ ዘይትባረጽ፨
- ማርቆስ፡ አቡየ፡ መምህር፡ ወመገሥፅ፨
- ለሰቢከ፡ ወንጌል፡ ዘትጢህር፡ በአድየመ፡ ግብጽ፨
- ነዓ፡ ነዓ፡ አንበሳየ፡ መደንግጽ፨
- ለተናጽሮ፡ ምስሌየ፡ ገጸ፡ በገጽ፨
-
- ሰላም፡ ለምልአ፡ ሥጋከ፡ ዘሠናይ፡ ኵለንታሁ፨
- ለሥጋከ፡ ወደምከ፡ ወለአፅምከ፡ በበ፡ ጾታሁ፨
- ታቦተ፡ ባሕረይ፡ ማርቆስ፡ ለመንፈስ፡ ቅዱስ፡ ማኅደረ፡ ጸጋሁ፨
- እምርስሓት፡ ለመልክእየ፡ አንጽሖ፡ ናሁ፨
- እለ፡ ለምጽኒ፡ በቃልከ፡ ነጽሑ፨
-
- እንዘ፡ እግዚአብሔር፡ ይረድእ፡ ወቃሎ፡ ያጸንዕ፡ በትእምርት፡ ዘይተሉ፨
- በከመ፡ ትቤ፡ ማርቆስ፡ በፍጻሜ፡ ዜናከ፡ ኵሉ፨
- አማኅኩከ፡ ወንጌላዊ፡ ዐሥበ፡ ቅኔየ፡ ይደሉ፨
- በረከትከ፡ ምስሌየ፡ የሀሉ፨