Subjects
Martyr
ዲዮስቆሮስ፡
Diyosqoros
Dioscorus
Dioscorus
Malkəʾ
-
- ጥንተ፡ ገድል፡ ወስምዕ፡ ዘዲዮስቆሮስ፡ ሐዲስ፡ ሐዋርያ፨
- ሊቀ፡ ጳጳሳት፡ ዘእለስክንድርያ፨
- ዲዮስቆሮስ፡ ሞኦ፡ ለአበ፡ ሐሰት፡ ጕሕልያ፨
- ለሐመርየ፡ ውስተ፡ መርሶ፡ ድኂን፡ ያርስያ፨
- እምባሕረ፡ ዓለም፡ መሥጥም፡ ዘሎቱ፡ ጌልያ፨
-
- ሰላም፡ ወሣህል፡ ለዲዮስቆሮስ፡ እብሎ፨
- እንተ፡ ዘፈጸመ፡ ገድሎ፨
- ዲዮስቆሮስ፡ ሞአ፡ ማኅበረ፡ ዕልዋን፡ ኵሎ፨
- በበ፡ ወርኀ፡ ኤሎል፡ አድምዐ፡ አክሊሎ፨
- በእንቲአየ፡ ይተንብል፡ ተንብሎ፨
-
- ሰላም፡ ወፍቅር፡ ለዲዮስቆሮስ፡ ሠዋዒ፨
- ማኅበረ፡ ዕልዋን፡ መዋኢ፨
- ዲዮስቆሮስ፡ ስምዕ፡ ለእግዚአብሔር፡ ቀናኢ፨
- ኂሩተ፡ ገድልከ፡ በላዕሌየ፡ ያስተርኢ፨
- ቅድመ፡ ገጽየ፡ ኢይቁም፡ ጸላኢ፨
-
- ሰላም፡ ለሥዕርተ፡ ርእስከ፡ ዘጠለለ፡ በቅብዑ፨
- ለወንጌላዊ፡ በግዑ፨
- ዲዮስቆሮስ፡ ዕንቍ፡ ለወልደ፡ ማርያም፡ ሥንኡ፨
- በሰይፈ፡ ቃልከ፡ ማኅበረ፡ ዕልዋን፡ ተሞኡ፨
- ሥርዓተ፡ ዕልዋት፡ ፈጠራ፡ ዘሠርዑ፨
-
- ሰላም፡ እብሎሙ፡ ለመልክእከ፡ ኵሎሙ፨
- እለ፡ ጻመዉ፡ ወደክሙ፨
- ዲዮስቆሮስ፡ ሙቁሕ፡ ለክርስቶስ፡ በእንተ፡ ስሙ፨
- ኀይለ፡ መልክእከ፡ ለመልክእየ፡ ይባልሖሙ፨
- እምቀዳማዊ፡ ኮከብ፡ ዘወድቀ፡ ቀዲሙ፨
-
- ይትኀፈራ፡ ወይኅሠራ፡ ለኬልቄዶን፡ አሕማራ፨
- ኢሳይያስ፡ ይቤ፡ ለትንቢት፡ ምንሃራ፨
- በእንተ፡ ማኅበር፡ እላ፡ ዐሊወ፡ ትእዛዝ፡ ዘኀብራ፨
- ዲዮስቆሮስ፡ በሰይፈ፡ ቃሉ፡ እንተ፡ ዘረሰዮን፡ ይሑራ፨
- ይሑራ፡ ይሑራ፡ እንበለ፡ አሣእን፡ ለግሙራ፨
- በብካይ፡ ወላሕ፡ ወወይሌ፡ ይነብራ፨