Subjects
Martyr
ፊቅጦር፡
Fiqṭor
Victor
Victor
Malkəʾ
-
- ሰላም፡ ለፅንሰትከ፡ ለማርታ፡ በማሕፀና፨
- ሶበ፡ ጸለየት፡ ተአሚና፨
- ሥዕለ፡ ማርያም፡ አመረታ፡ ርእሳ፡ አጽኒና፨
- እምክርሠ፡ እምከ፡ ዘተውህበከ፡ ብፅዕና፨
- አማኅኩከ፡ ፊቅጦር፡ አውሥአኒ፡ ዳኅና፨
-
- ሰላም፡ ለልደትከ፡ ሕፃነ፡ ማርታ፡ ኅሩይ፨
- ዘወረደ፡ ለከ፡ ልብሰ፡ ወርቅ፡ እምሰማይ፨
- ሶበ፡ ትልህቅ፡ ዘይልህቅ፡ በአካለ፡ ቆምከ፡ ዕሩይ፨
- ፊቅጦር፡ ቅዱስ፡ አማኅኩከ፡ ነዳይ፨
- አክሊለ፡ ሰላም፡ በርእስየ፡ ደይ፨
-
- ሰላም፡ ለሥዕርተ፡ ርእስከ፡ ዱላሌሁ፡ ዘአደመ፨
- በቀብዐ፡ ጸጋ፡ ዘተሐትመ፨
- ፊቅጦር፡ ዘሞእከ፡ ጽልመታዌ፡ ዓለመ፨
- እምላዕለ፡ ርእስየ፡ ላጺ፡ ፍጹመ፨
- ሥዕርተ፡ ጌጋይ፡ ኢያብቍል፡ ዳግመ፨
-
- ሰላም፡ ለመቃብሪከ፡ ለበድነ፡ ሥጋከ፡ መዝገባ፨
- ጸጋ፡ ወፈውሰ፡ እንተ፡ ተውህባ፨
- ፊቅጦር፡ ሰማዕት፡ ለአንጾኪያ፡ ኮከባ፨
- ተአምኅ፡ አፉየ፡ ኀበ፡ ዝኍርከ፡ ቀሪባ፨
- በቅድመ፡ ገጽከ፡ ሞገሰ፡ ረኪባ፨
-
- መሐለ፡ እግዚአብሔር፡ ወኢይሔሱ፡ ቃሎ፨
- ለፊቅጦር፡ ወይቤሎ፨
- ህየንተ፡ አቡከ፡ አነ፡ በእንተ፡ ዘአጥባዕከ፡ ለተጋድሎ፨
- ገነተ፡ ትፍሥሕት፡ ህየንተ፡ አብያቲከ፡ ሕኑጽ፡ ሀሎ፨
- ፊቅጦር፡ በህየ፡ አመ፡ ትዴሎ፨
- ክፍለኒ፡ በተሣህሎ፡ ምስሌከ፡ አጽልሎ፨