Subjects
Martyr
ጊዮርጊስ፡
Giyorgis
George
George
Malkəʾ
-
- [The beginning of the text is lost.]
- ተቤዘው፡ በጻማከ፡ ኪያየ፡ ኃጥአ፨
- እስመ፡ ኢይትኀፈር፡ ኵሉ፡ ኀቤከ፡ ዘመጽአ፨
-
- ሰላም፡ ለሐቌከ፡ እንተ፡ ቀነት፡ ድንግልና፨
- ምስለ፡ ቅድስና፨
- ጊዮርጊስ፡ ማር፡ ለሕይወትየ፡ ምእመና፨
- ጽንዐ፡ ሐቌከ፡ ለሐቌየ፡ መጽንዔ፡ ይኩና፨
- ከመ፡ ኢያጕህቋ፡ ዘዓለም፡ ሙስና፨
-
- ሰላም፡ ሰላም፡ ለአቍያጺከ፡ ርቱዓን፨
- በኀጢአት፡ ዘኢጕህቋ፨
- ጊዮርጊስ፡ ክቡር፡ ለቤተ፡ ክርስቲያን፡ ዕንቋ፨
- በከመ፡ ብዝኀ፡ ኂሩትከ፡ አድኅነኒ፡ በተአምሪከ፨
- እምኆፃ፡ ቀለይ፡ ዘይፈደፍድ፡ ኈልቋ፨
-
- ሰላም፡ ለአብራኪከ፡ ሰጊደ፡ ለአጵሎን፡ እለ፡ አበያ፨
- ለእግዚአብሔር፡ ባሕቲቱ፡ በሰጊደ፡ ዘኀረያ፨
- ጊዮርጊስ፡ ክሉል፡ በሠርቀ፡ ወርኀ፡ ኒሳን፡ ሃሌ፡ ሉያ፨
- በእንተ፡ አብራኪከ፡ አብራክየ፡ ይጥዐያ፨
- በዝብጠተ፡ ሰይጣን፡ መሕመሚ፡ ኢይድወያ፨
-
- ሰላም፡ ለመቃብሪከ፡ ዘእምርት፡ በልድያ፨
- ኀበ፡ ትከሥት፡ ጥዩቀ፡ ለረድኤትከ፡ ዕበያ፨
- እምፈተውኩ፡ አንሰ፡ ከመ፡ እርአያ፨
- ለተምኔትየ፡ ብጽሐታ፡ ጊዮርጊስ፡ ረስያ፨
- እስመ፡ ለፍቅርከ፡ ነፍስየ፡ ጽምእት፡ ነያ፨
-
- ሰላም፡ ለእማኄከ፡ አሠርገወኒ፡ በማሕተማ፨
- ሰላም፡ ለሰላምከ፡ ዕቀበኒ፡ በሰላማ፨
- ሰላም፡ ለፍቅርከ፡ አንብረኒ፡ ውስተ፡ ምስያማ፨
- ሰላም፡ ለዝኅርከ፡ አብሐኒ፡ እስዐማ፨
- ለተምኔትየ፡ ፍጡነ፡ ጊዮርጊስ፡ ፈጽማ፨
-
- ተወከፍ፡ ሰላምየ፡ ወዘንተ፡ ስብሐተ፡ ወይባቤ፨
- ከመ፡ ጼና፡ ስኂን፡ ወመዐዛ፡ ከርቤ፨
- ጊዮርጊስ፡ ኩነኒ፡ ኪዳንከ፡ ዓቃቤ፨
- አንተ፡ ምስካይየ፡ በጊዜ፡ ምንዳቤ፨
- ተሰጠው፡ ቃልየ፡ ወሠልጥ፡ ዘእቤ፨