Subjects
Martyr
ቂርቆስ፡
Qirqos
Cyricus
Cyricus
Malkəʾ
-
- ጰራቅሊጦስ፡ መንፈሰ፡ ጸጋ፡ እምልሳነ፡ ዓለም፡ ሐዲስ፨
- ጰራቅሊጦስ፡ ብርሃን፡ ጸዳለ፡ ልቡና፡ ወነፍስ፨
- መልክአ፡ ሕፃን፡ ቂርቆስ፡ ሰማዕተ፡ ኢየሱስ፡ ክርስቶስ፨
- ሀበኒ፡ እንብብ፡ ለፍጻሜ፡ እንበለ፡ ተሀውኮ፡ ወባእስ፨
- ከመ፡ ኢይስሐቁኒ፡ ፀር፡ ዘቀለይ፡ ወየብስ፨
-
- ሰላም፡ ለዝክረ፡ ስምከ፡ ወለሥዕርትከ፡ ጸሊም፨
- ለገጽከ፡ ሰላም፡ እምገጸ፡ አንበሳ፡ ግሩም፨
- ቂርቆስ፡ ሕፃን፡ ዘጥበብከ፡ ፍጹም፨
- ትቤላ፡ ለእምከ፡ በንባብከ፡ ጥዑም፨
- እምዋዕየ፡ እሳት፡ ወነድ፡ ኢትፍርሂ፡ እም፨
-
- ሰላም፡ ለቀራንብቲከ፡ እለ፡ ኢቀጸባሁ፡ ለነጽሮ፨
- ለዐይነ፡ ሕሊናሁ፡ ዘውስጥ፡ መባልዕተ፡ ሥቃይ፡ ወተፅዕሮ፨
- ቂርቆስ፡ ሕፃን፡ ወፍጹም፡ በአእምሮ፨
- ናስተበጽዓ፡ ለእምከ፡ ዘጾረተከ፡ ለምህሮ፨
- ሥጋክሙ፡ በሕማም፡ እስከ፡ ይፌጽም፡ በድሮ፨
-
- ሰላም፡ ለመቃብሪከ፡ ምስለ፡ እምከ፡ ኢየሉጣ፨
- በሥምረተ፡ ዋሕድ፡ አልፋ፡ ወበፈቃዱ፡ ለየውጣ፨
- ሊቀ፡ ካህናት፡ ቂርቆስ፡ ለመጽሐፈ፡ ጌጋይ፡ ዘትሰጥጣ፨
- ለነፍስየ፡ ምክረ፡ መስቴማ፡ እምፍኖተ፡ ሕይወት፡ ዘሜጣ፨
- በደመ፡ ስምዕከ፡ አንጽሕ፡ አፍአሃ፡ ወውስጣ፨
-
- ኦሕፃን፡ ምስለ፡ ሕፃናት፡ ዘትሄሉ፨
- እለ፡ ቀተሎሙ፡ ሄሮድስ፡ በግፍዕ፡ በመዋዕሉ፨
- ማኅበራነ፡ መላእክት፡ ኵሎሙ፡ ወጉባኤ፡ ካህናት፡ ይብሉ፨
- ሰአል፡ ለነ፡ ኀበ፡ አብ፡ ወኀበ፡ ሕይወቱ፡ ወቃሉ፨
- አሠረ፡ መስቀል፡ ከማከ፡ በትዕግሥት፡ ንትሉ፨
-
- ስብሐት፡ ለከ፡ አምላኪየ፡ ዘወሀብኮሙ፡ ክሂለ፨
- ለሰማዕታት፡ ወቂርቆስ፡ ከመ፡ ይጹሩ፡ መስቀለ፨
- እንዘ፡ ይትዔገሡ፡ ዘልፈ፡ ወይለብሱ፡ ወንጌለ፨
- ሊተሰ፡ በፍቅሮሙ፡ አቅመ፡ ልብየ፡ ተልዕለ፨
- እምጸጋ፡ ብዕሎሙ፡ ጸግወኒ፡ ብዕለ፨