Subjects
Righteous
ወለተ፡ ጴጥሮስ፡
Walatta Ṗeṭros
Walatta Ṗeṭros
Walatta Ṗeṭros
Walatta Ṗeṭros
Malkəʾ
-
- ናሁ፡ ተወጥነ፡ ለመልክእኪ፡ ውዳሴሁ፨
- እንዘ፡ ይረድአኒ፡ ክርስቶስ፡ ዘዋሕድ፡ ህላዌሁ፨
- ወለተ፡ ጴጥሮስ፡ ቅድስት፡ ለኂሩት፡ ማኅደረ፡ ጸርሑ፨
- ትውልደ፡ ትውልድ፡ ያስተበፅዑኪ፡ ናሁ፨
- በቃለ፡ አሚን፡ ርቱዕ፡ ወሐዋዝ፡ ዜማሁ፨
-
- ሰላም፡ ለዝክረ፡ ስምኪ፡ በልሳነ፡ ኵሉ፡ ዘተሥዕለ፨
- ወለሥዕርትኪ፡ ካዕበ፡ ዘአክሊለ፡ ክርስቶስ፡ ተቀጸለ፨
- ወለተ፡ ጴጥሮስ፡ እምነ፡ ይስእሉኪ፡ ስኢለ፨
- ደቂቅኪ፡ በሃይማኖት፡ ኀበ፡ ረሰዩ፡ መድበለ፨
- እምጸጋ፡ ዚአኪ፡ ትፈንዊ፡ ሣህለ፨
-
- ሰላም፡ ለመቃብርኪ፡ ኀበ፡ እዴኪ፡ ዘሐነጻ፨
- በደሴተ፡ ሰላሞ፡ ሬማ፡ እንተ፡ ትጸልእ፡ ግብረ፡ ዐመፃ፨
- ወለተ፡ ጴጥሮስ፡ ርስትየ፡ ዘነሣእክዋ፡ በዕፃ፨
- ከመ፡ ይኩነኒ፡ በቋዔ፡ ቱሱሐ፡ ርኅራኄ፡ ተግሣጻ፨
- ወጊዜ፡ ጽምዕየ፡ ከመ፡ ማየ፡ ያርውየኒ፡ ገጻ፨
-
- ናስተበፅዓ፡ ለማርያም፡ እስመ፡ ከፈለተኒ፡ ቃለ፨
- ከመ፡ እወድስኪ፡ ቦቱ፡ ወእስእለኪ፡ ስኢለ፨
- ወለተ፡ ጴጥሮስ፡ ገድልኪ፡ እምገድለ፡ ቅዱሳን፡ ተልዕለ፨
- ሲሳይኪ፡ ሐመደ፡ እክል፡ እንዘ፡ ትሜንኒ፡ እክለ፨
- እስከ፡ በዝንቱ፡ አጥረይኪ፡ ምሕረተ፡ ወሣህለ፨