Subjects
Prophet
ሐና፡
Ḥannā
Hanna
Hanna
Malkəʾ
-
- በስመ፡ እግዚአብሔር፡ ዘይቤ፡ እግዚአብሔር፡ አነ፨
- ማእከለ፡ ጽልመት፡ ጽፉቅ፡ ጊዜ፡ ፈጠረ፡ ብርሃነ፨
- ናሁ፡ ወጠንኩ፡ እንዘ፡ እቄድስ፡ አሚነ፨
- ከመ፡ እንብብ፡ እስከ፡ ፍጻሜ፡ ዘውዳሴኪ፡ ድርሳነ፨
- ጸግውኒ፡ ሐና፡ ሐዲሰ፡ ልሳነ፨
-
- ሰላም፡ ለፅንሰትኪ፡ ውስተ፡ ከርሠ፡ ሥርዓት፡ ወሕግ፨
- ወለልደትኪ፡ ፀሓይ፡ ሰዳዴ፡ ጽልመት፡ ጸዋግ፨
- ጽጌ፡ በትረ፡ አሮን፡ ሐና፡ ወዘወይነ፡ ሙሴ፡ ሐረግ፨
- ይሰፍሑ፡ አዕጹቅኪ፡ በድረ፡ ሴዎን፡ ወአግ፨
- ወለሥረዊሆሙ፡ ይሠቅዮ፡ ዘኤዶም፡ ፈለግ፨
-
- ሰላም፡ ለዝክረ፡ ስምኪ፡ እንተ፡ ይደምፅ፡ በቃል፨
- ቅድመ፡ ጥንተ፡ ሠኑይ፡ ፊደል፨
- ዘመዐዛ፡ ጽድቅኪ፡ ሐና፡ ጽድቀ፡ ፋሲለደስ፡ ኮል፨
- ጥበብ፡ ግብተ፡ መሠጠቶ፡ ለገላውዴዎስ፡ ድንግል፨
- ወአብጽሐቶ፡ ኀበ፡ ስምዕ፡ ወገድል፨
-
- ሰላም፡ ለትንሣኤኪ፡ ለአዳም፡ ትንሣኤሁ፨
- ለሔዋንኒ፡ እንተ፡ ይእቲ፡ ዐጽመ፡ ገቦሁ፨
- በቃልኪ፡ ሐና፡ ይትባረክ፡ ለለ፡ ጊዜሁ፨
- ፋሲለደስ፡ ሰማዕት፡ ለእግዚአብሔር፡ መሲሑ፨
- ከመ፡ ለይሁዳ፡ ባረኮ፡ ያዕቆብ፡ አቡሁ፨
-
- ስብሐት፡ ለእግዚአብሔር፡ እግዚአ፡ ኵሉ፡ አእምሮ፨
- ህየንተ፡ ፈጸምኩ፡ ሐና፡ ወጢነ፡ መልክእኪ፡ በተባድሮ፨
- ፋሲለደስ፡ ገብርኪ፡ ኅሊናኪ፡ ዘያፈቅሮ፨
- ዕቀቢ፡ ንግሦ፡ አግርሪ፡ ፀሮ፨
- ላዕለ፡ ኪዳንኪ፡ ይቀድስ፡ መንበሮ፨
-
- ተማሕፀንኩ፡ ሐና፡ በረድኤትኪ፡ ቀዋሚ፨
- ከመ፡ አማሕፀኖሙ፡ ዮሴፍ፡ ያምጽእዎ፡ ለብንያሚ፨
- ላዕለ፡ ይሁዳ፡ ወሮቤል፡ ደቂቀ፡ ያዕቆብ፡ ዘቀዳሚ፨
- አመ፡ ዕለተ፡ ቅስት፡ ምስሌየ፡ ትቁሚ፨
- ወበአፈ፡ ሰይጣን፡ ፀርየ፡ ማዕፆ፡ ትሢሚ፨