Subjects
Righteous
ዮሴፍ፡
Yosef
Joseph
Joseph
Malkəʾ
-
- ሰላም፡ ለፊደለ፡ ስምከ፡ ዘይሤለስ፡ በጽዋዔ፨
- እንዘ፡ እምአርባዕ፡ የሐፅፅ፡ ወይፈደፍድ፡ እምክልኤ፨
- ጻድቅ፡ ዮሴፍ፡ ዘታስተኀፍር፡ ጸላኤ፨
- አእራረ፡ ሃይማኖት፡ ላዕሌነ፡ አመ፡ አንሥኡ፡ ውዋዔ፨
- ረድኤትከ፡ ዝንቱ፡ ይኩነነ፡ ረዳኤ፨
-
- ሰላም፡ ለዝክረ፡ ስምከ፡ ዘትርጓሜሁ፡ መድኅን፨
- ዘበዕብራይስጢ፡ ልሳን፨
- ሕፃኔ፡ ወልደ፡ አብ፡ ዮሴፍ፡ ወወልደ፡ ዳዊት፡ ምእመን፨
- ሥመር፡ እግዚኦ፡ መቅደሰ፡ ዛቲ፡ መካን፨
- ማኅደረ፡ ስምከ፡ ትኩን፡ በኵሉ፡ ዘመን፨
-
- ሰላም፡ ለጽዋዔ፡ ስምከ፡ እንተ፡ አዕበዮ፡ በግብር፨
- ሕፃነ፡ ድንግል፡ አምላክ፡ ዕጉሠ፡ ሕማም፡ ወጻዕር፨
- ከመ፡ እንግር፡ ዮሴፍ፡ ሥቃያቲከ፡ ዘምድር፨
- አስትየኒ፡ ጽዋዐ፡ ነድ፡ እምቀሱትከ፡ ምሥጢር፨
- ከመ፡ አስተዮ፡ ኡራኤል፡ ለዕዝራ፡ መምህር፨
-
- ሰላም፡ ለክሣድከ፡ ዘተሐንቀ፡ በቀዳሙ፨
- እንዘ፡ የኀሥሥ፡ ዕረፍተ፡ እምተግሣጸ፡ ድንግል፡ ጊዜ፡ ድካሙ፨
- በማእከሌከ፡ ዮሴፍ፡ ወማእከለ፡ ድንግል፡ ዘቆሙ፨
- ባሕቱ፡ ገብርኤል፡ ወሰሎሜ፡ እስመ፡ ብፁዓን፡ ነዮሙ፨
- አስተሳለሙ፡ ኪያከ፡ ምስለ፡ ወልድ፡ ወእሙ፨
-
- ሰላም፡ ለክሣድከ፡ እንተ፡ አነቀ፡ በዛኅን፨
- ባዝግና፡ ሕፃናት፡ አንብዐ፡ ዘወሀበቶ፡ ኀዘን፨
- አመ፡ ተዋንዮተከ፡ ዮሴፍ፡ ዘምስለ፡ ንኡስ፡ ሕፃን፨
- ጸውዐኒ፡ ሊተ፡ አረጋዊ፡ እምድኅረ፡ ጕንዱይ፡ ዘመን፨
- ተውኔተ፡ ክልኤክሙ፡ እስማዕ፡ በዘብየ፡ እዝን፨
-
- ሰላም፡ ለመቃብሪከ፡ ውስተ፡ መካኑ፡ ወዐጸዱ፨
- ለዳዊት፡ አቡከ፡ እስመ፡ ከመዝ፡ ልማዱ፨
- አፅራረ፡ ወልድከ፡ ዮሴፍ፡ እምድኅረ፡ በሞት፡ ውሕዱ፨
- ኀደረ፡ ምስለ፡ እሙ፡ ውስተ፡ ምድረ፡ ናዝሬት፡ ሙላዱ፨
- ከመ፡ ናዝራዊ፡ ይሰመይ፡ ወልድከ፡ አሐዱ፨
-
- ለሄሮድስ፡ ብእሴ፡ ዐመፃ፡ እምድኅረ፡ ተዐውቀ፡ ሞቱ፨
- ቦአ፡ ቃል፡ ውስተ፡ ምድረ፡ ሳሌም፡ ርስቱ፨
- ምስለ፡ ዮሴፍ፡ ሐፃኒሁ፡ ወምስለ፡ ማርያም፡ ወላዲቱ፨
- ከመ፡ ይትፈጸም፡ ዘይቤ፡ ቃለ፡ ነቢየ፡ ጽድቅ፡ ቦቱ፨
- እምግብጽ፡ ጸዋዕክዎ፡ ለወልድየ፡ ዝንቱ፨
-
- ናሁ፡ ተፈጸመ፡ ስብሐተ፡ መልክእከ፡ ኵሉ፨
- እስመ፡ በጊዜሁ፡ ይከውን፡ ለእግዚአብሔር፡ ሣህሉ፨
- አብሐኒ፡ ዮሴፍ፡ ውስተ፡ ቤተ፡ ምንግሥት፡ ዘላዕሉ፨
- ምስለ፡ ማርያም፡ ወሰሎሜ፡ ከመ፡ ኅቡረ፡ አሀሉ፨
- ወዐሠረ፡ ዚአከ፡ በትፍሥት፡ እትሉ፨
-
- ለስግደተ፡ አምላክ፡ ዘመጽኡ፡ አናብስተ፡ ገዳም፡ ስድስቱ፨
- ድኅረ፡ አጕየዩከ፡ ዮሴፍ፡ እምገጸ፡ ሕፃን፡ ወወላዲቱ፨
- ጻማ፡ ጸዊሮትከ፡ ወልደ፡ ከመ፡ ኢይትርፍ፡ በከንቱ፨
- ተበዋሕከ፡ ትኪድ፡ አንበሳ፡ ሐቅል፡ ወከመ፡ ትጸዐን፡ ቦቱ፨
- እስመ፡ ነገረ፡ ሰብእ፡ ዘኢልማድ፡ ሰማዕከ፡ እምዝንቱ፨
-
- በዐሥርቱ፡ ወትስዐቱ፡ ምእት፡ ወአሐዱ፨
- ዓመተ፡ ምሕረቱ፡ ለወልድ፡ እለ፡ ሕንጻ፡ መቅደስ፡ ፈቀዱ፨
- ስብሐተ፡ መልክእከ፡ ዮሴፍ፡ ውስተ፡ ሰሌዳ፡ ክብር፡ አለዱ፨
- ምኒልክ፡ ዘነግሠ፡ አሜሃ፡ በኢትዮጵያ፡ ዐጸዱ፨
- እስመ፡ አዘዞሙ፡ ስሙዓቲከ፡ ለኵሉ፡ ያግህዱ፨