Subjects
Righteous
ኤዎስጣቴዎስ፡
ʾEwosṭātewos
ʾEwosṭātewos
ʾEwosṭātewos
ʾEwosṭātewos
Malkəʾ
-
- እስመ፡ ብዙኃን፡ አኃው፡ እለ፡ ጸንዑ፡ ወተኀየሉ፨
- ሰላመ፡ መልክእከ፡ ክቡር፡ ከመ፡ ይጽሐፉ፡ ወይበሉ፨
- ኤዎስጣቴዎስ፡ አዳም፡ ለእግዚአብሔር፡ አምሳሉ፨
- ሊተኒ፡ ረትዐኒ፡ እትሉ፨
- ጽሒፈ፡ ውዳሴከ፡ ሕግ፡ ለአምላክ፡ ወንጌሉ፨
-
- ሰላም፡ ለዝክረ፡ ስምከ፡ ዘተሰብከ፡ ዜናሁ፨
- ለርኅበ፡ ዓለም፡ በህላዊሁ፨
- ኤዎስጣቴዎስ፡ አቤል፡ ለነገረ፡ ግፍዕ፡ ወጣኔሁ፨
- ኀጢአትየ፡ ብዙኀ፡ እመ፡ ደለወ፡ ምስሌሁ፨
- ሣህለ፡ ዚአከ፡ ይማዕ፡ ለአምላክ፡ ቅድሜሁ፨
-
- ሰላም፡ ለሥዕርተ፡ ርእስከ፡ ነፍኒፈ፡ ሌሊት፡ ምሉእ፨
- ወለርእስከ፡ ሰላም፡ ዘኢዐርገ፡ በቅብዕ፨
- ኤዎስጣቴዎስ፡ ሄኖክ፡ እምነ፡ አዳም፡ ሳብእ፨
- አፉከ፡ ሚካኤል፡ ሊቀ፡ መላእክት፡ ጽኑዕ፨
- ፀረ፡ ዚአየ፡ ይበል፡ ይሔስከ፡ እግዚእ፨
-
- ሰላም፡ ለገጽከ፡ ወለቀራንብቲከ፡ ምጽላላ፨
- ለብርሃነ፡ ዐይንከ፡ ብርሃነ፡ እብላ፨
- ኤዎስጣቴዎስ፡ ኖኅ፡ ለጽድቀ፡ አሚን፡ ወራሴ፡ ብዕላ፨
- ለውሉድከ፡ አእላፍ፡ ከመ፡ ይጸግዎሙ፡ ተድላ፨
- ምስለ፡ ፈጣሪ፡ ተካየድ፡ ወዐቅም፡ መሐላ፨
-
- ሰላም፡ ለአዕይንቲከ፡ ለአካለ፡ ሥጋ፡ ማኅቶቱ፨
- ወለአእዛኒከ፡ ዕፅዋት፡ እምሰሚዐ፡ ነገር፡ ከንቱ፨
- ኤዎስጣቴዎስ፡ አብርሃም፡ ለሃይማኖት፡ መሠረቱ፨
- ለሕሊናየ፡ ሎጥ፡ ተራኅራኅ፡ ሎቱ፨
- እስመ፡ ፄወውዎ፡ ዮም፡ ነገሥታት፡ ፭ዩ፨
-
- ሰላም፡ ለመላትሒከ፡ እለ፡ መጽለዋ፡ በጾም፨
- ወለአእናፊከ፡ ዘተመልአ፡ መዐዛ፡ አርያም፨
- ኤዎስጣቴዎስ፡ ሎጥ፡ እኅወ፡ አብርሃም፨
- ልብከ፡ ማርያም፡ ወላዲተ፡ አምላክ፡ ግሩም፨
- ትትራኅራኅ፡ ሊተ፡ ለብእሲ፡ ድኩም፨
-
- ሰላም፡ ለከናፍሪከ፡ ወለአፉከ፡ ካልኡ፨
- ከመ፡ አፈ፡ መልአክ፡ ዘኮነ፡ ኅብስተ፡ ቅዳሴ፡ መብልዑ፨
- ኤዎስጣቴዎስ፡ ብሩህ፡ እምነ፡ ከዋክብት፡ ሳብኡ፨
- ትካዘ፡ ልብየ፡ ታይድእ፡ ለንጉሠ፡ ነገሥት፡ እግዚኡ፨
- አመሐልኩከ፡ በገዳም፡ በኀይሉ፡ ወጽንዑ፨
-
- ሰላም፡ ለአስናኒከ፡ ወለልሳንከ፡ ቀዳሲ፨
- ዕበየ፡ ክርስቶስ፡ አምላክ፡ እንተ፡ ለዓለም፡ ነጋሢ፨
- ኤዎስጣቴዎስ፡ ይስሐቅ፡ ቢተ፡ አብርሃም፡ ወራሲ፨
- ተግሣፅከ፡ ናታን፡ ወምዕዳንከ፡ ኵሲ፨
- ያለብዉኒ፡ ምክረ፡ ለአብድ፡ ብእሲ፨
-
- ሰላም፡ ለቃልከ፡ ወንጌለ፡ መለኮት፡ ዘአንጐድጐደ፨
- ወለእስትንፋስከ፡ እፍረት፡ ዘመዐዛሁ፡ ተንዕደ፨
- ኤዎስጣቴዎስ፡ ያዕቆብ፡ እንተ፡ ወለድከ፡ አንጋደ፨
- ኤፍሬም፡ ትባርከኒ፡ ገሀደ፨
- በከተማ፡ በትርከ፡ ስግድ፡ ወአማዕትብ፡ እደ፨
-
- ሰላም፡ ለጕርዔከ፡ በወይነ፡ ጥበብ፡ ሰካሪ፨
- ወለክሳድከ፡ ዕሡር፡ በሀብለ፡ ዓለም፡ ደኃሪ፨
- ኤዎስጣቴዎስ፡ ኢዮብ፡ ክበደ፡ ሕማም፡ ጸዋሪ፨
- ላዕለ፡ ሥጋየ፡ ኤልፋዝ፡ እመ፡ ተምዐ፡ ፈጣሪ፨
- በመሥዋዕት፡ ንጹሕ፡ ጌጋዮ፡ አስተስሪ፨
-
- ሰላም፡ ለመትከፍትከ፡ መጾረ፡ ክቡድ፡ መስቀል፨
- ወለገቦከ፡ ዕጉሥ፡ መቅሠፍተ፡ ጥብጣቤ፡ ዘሀብል፨
- ኤዎስጣቴዎስ፡ ካህኑ፡ ለእግዚአብሔር፡ ልዑል፨
- አስተርእዮ፡ አስተርኢ፡ እምብሔር፡ ጥሉል፨
-
- ሰላም፡ ለእንግድዐከ፡ ወለሕጽንከ፡ ምስካብ፨
- ዘይጼጉ፡ ናህየ፡ ለነፍሰ፡ ኵሉ፡ ምንዱብ፨
- ኤዎስጣቴዎስ፡ ዮሴፍ፡ ብእሴ፡ ጥበብ፨
- ኂሩትከ፡ ኖኅ፡ ወትእግሥትከ፡ ኢዮብ፨
- ይቁሙ፡ ሊተ፡ ቅድሜሁ፡ ለአብ፨
-
- ሰላም፡ ለአእዳዊከ፡ ወለመዛርኢከ፡ ኅቡረ፨
- እምእደ፡ አምላክ፡ ልዑል፡ እለ፡ ተወክፉ፡ ምሥጢረ፨
- ኤዎስጣቴዎስ፡ ሙሴ፡ እንተ፡ አርአይከ፡ መንክረ፨
- ለአሕጕሎትየ፡ እመ፡ መከረ፡ ምክረ፨
- ለክርስቶስ፡ አስተብቍዖ፡ ዐሪገከ፡ ደብረ፨
-
- ሰላም፡ ለኵርናዕከ፡ ወለእመትከ፡ በአዕብዮ፨
- በቃለ፡ ስብሐት፡ ወተጋንዮ፨
- ኤዎስጣቴዎስ፡ አሮን፡ ዘልማድከ፡ አስተርእዮ፨
- በዕጣን፡ ንጹሕ፡ ወበብኁዝ፡ ጸልዮ፨
- ለሰብእናየ፡ ሮቤል፡ አስተሥሪ፡ ጌጋዮ፨
-
- ሰላም፡ ለእራኅከ፡ ወለአጻብኢከ፡ ዐሥር
- እለ፡ ስፉሐት፡ እማንቱ፡ ለውሂበ፡ ኅብስት፡ ክቡር፨
- ኤዎስጣቴዎስ፡ አውሴ፡ ወራሲሃ፡ ለምድር፨
- አብአኒ፡ ለተዋርሶ፡ ውስተ፡ ቅድስት፡ ሀገር፨
- እንተ፡ እምኒሃ፡ ይውኅዝ፡ ሀሊብ፡ ወመዐር፨
-
- ሰላም፡ ለአጽፋረ፡ እዴከ፡ ወለገቦከ፡ ዘወግዖ፨
- ጋጋ፡ ትሩፋት፡ ወአስተብቍዖ፨
- ኤዎስጣቴዎስ፡ ፊንሐስ፡ እንተ፡ አድማዕከ፡ ተበፅዖ፨
- ለማኅበርነ፡ ለእመ፡ ብድብድ፡ አጥፍኦ፨
- ለአድኅኖትነ፡ ቅንጽ፡ ወአፍጥን፡ ተንሥኦ፨
-
- ሰላም፡ ለከርሥከ፡ በከውረ፡ ረኃብ፡ ዘተፈትነ፨
- ወለልብከ፡ ምስሌሁ፡ ዘተገልበበ፡ ብርሃነ፨
- ኤዎስጣቴዎስ፡ ሳሙኤል፡ ሊቀ፡ ማኅበርነ፨
- ሢም፡ ለነ፡ ሠራኢ፡ መስፍነ፨
- ወቅዳሴ፡ ንጹሕ፡ ከዊነ፨
-
- ሰላም፡ ለኵልያቲከ፡ ወለሕሊናከ፡ ወዓሊ፨
- ዘይቀውም፡ ዘልፈ፡ ቅድመ፡ እግዚእ፡ ከሃሊ፨
- ኤዎስጣቴዎስ፡ ዳዊት፡ አርከ፡ ናታን፡ ወቤርዜሊ፨
- ለፍውሶትየ፡ እምነ፡ ሕማም፡ ቀታሊ፨
- በቃለ፡ ሐዋዝ፡ መዝሙር፡ ማኅሌተ፡ ኅሊ፨
-
- ሰላም፡ ለአማዑቲከ፡ ምስለ፡ ጥሪቱ፡ ወንዋዩ፨
- በውሳጤ፡ ከርሥ፡ እለ፡ ይትዋነዩ፨
- ኤዎስጣቴዎስ፡ ኤልያስ፡ መምህረ፡ ኤልሳዕ፡ ወአብድዩ፨
- ለብእሲ፡ ናቡቴ፡ ዘኅብስተ፡ ግጽዕ፡ ጌጋዩ፨
- በቀለ፡ ዚአሁ፡ ከሠተ፡ ሥልጣንከ፡ ኢዩ፨
-
- ሰላም፡ ለኅንብርትከ፡ ወለሐቌከ፡ ቀናቲ፨
- መክፌ፡ ሃይማኖት፡ አሐቲ፨
- ኤዎስጣቴዎስ፡ ኤልሳዕ፡ ኅብስተ፡ ሕይወት፡ ፈታቲ፨
- ለነፍስየ፡ መበለት፡ ዘሲሳየ፡ ዕለት፡ አልባቲ፨
- ንዴተ፡ ዚአሃ፡ ነጽር፡ ወተራኅራኅ፡ ላቲ፨
-
- ሰላም፡ ለአቍያጺከ፡ ወለአብራኪከ፡ ዘይሰግዳ፨
- ለንጉሥ፡ ዐቢይ፡ ቅድመ፡ መንበሩ፡ ጸዐዳ፨
- ኤዎስጣቴዎስ፡ ሰሎሞን፡ ለወለተ፡ ጽዮን፡ ምክሐ፡ ነገዳ፨
- ኀያላኒከ፡ ፷ምሁራነ፡ ቀትል፡ ወፍዳ፨
- ለነፍሰ፡ ዚአየ፡ ይቁሙ፡ በዐውዳ፨
-
- ሰላም፡ ለአእጋሪከ፡ ወለሰኰናከ፡ ዘሖራ፨
- ለፍኖተ፡ ጥበብ፡ በዐሠራ፨
- ኤዎስጣቴዎስ፡ ሱቱኤል፡ ዘተሰመይከ፡ ዕዝራ፨
- ፍቅርከ፡ መሰንቆ፡ ወጣዕምከ፡ እንዚራ፨
- ለዘማዊት፡ ዓለም፡ ዘያረስዕ፡ ፍቅራ፨
-
- ሰላም፡ ለመከየድከ፡ ወለአጻብኢከ፡ አዝማዱ፨
- በበይናቲሆን፡ እለ፡ ይትወሐዱ፨
- ኤዎስጣቴዎስ፡ ዳንኤል፡ እምነ፡ ጠቢባን፡ አሐዱ፨
- ለጸላኢየ፡ አማሌቅ፡ እስከ፡ የሐልቅ፡ ነገዱ፨
- ለሰብእናከ፡ ሙሴ፡ ኢይትጋባእ፡ እዱ፨
-
- ሰላም፡ ለአጽፋረ፡ እግርከ፡ ዘኢያጥረያ፡ ልህቀተ፨
- ወለቆምከ፡ አዳም፡ ዘተመሰለ፡ በቀልተ፨
- ኤዎስጣቴዎስ፡ ዮሴዕ፡ ዘአልበሱከ፡ ሜላተ፨
- አንስት፡ ክልኤ፡ እለ፡ ይጸውራ፡ መስፈርተ፨
- በምድረ፡ ፀርየ፡ ይሕንጻ፡ ቤተ፨
-
- ሰላም፡ ለመልኳከ፡ ምሉአ፡ ሞገስ፡ ወግርማ፨
- ወለፀአተ፡ ነፍስከ፡ በክብር፡ እምዓለመ፡ ጻማ፨
- ኤዎስጣቴዎስ፡ ካልዑ፡ ለመርደክዮስ፡ ዘሐማ፨
- ለሕዝበ፡ ርስትየ፡ አመ፡ ሰከዮሙ፡ መላቲ፡ ፌማ፨
- ምክረ፡ ዚአሁ፡ ይዘርዝር፡ ለነፍስየ፡ ፃማ፨
-
- ሰላም፡ እብል፡ ለበድነ፡ ሥጋከ፡ ቅድመ፨
- ወለግንዘትከ፡ ካዕበ፡ በልብሰ፡ መዐዛ፡ ፍጹመ፨
- ኤዎስጣቴዎስ፡ ነቢይ፡ አንተ፡ ነጸርከ፡ ተቅዋመ፨
- ቃልከ፡ መልአክ፡ ማእከለ፡ አዕዋም፡ ዘቆመ፨
- ለእዝንየ፡ ዮሴዕ፡ ያስምዓ፡ ሰላመ፨
-
- ሰላም፡ ሰላም፡ ለመቃብሪከ፡ አርማንያ፨
- ወለመንበርከ፡ ኢትዮጵያ፨
- ኤዎስጣቴዎስ፡ ረድኡ፡ ለእግዚአብሔር፡ ኬንያ፨
- ዐይንከ፡ ማርያ፡ ምስለ፡ እኅታ፡ ማርያ፨
- በእንቲሁ፡ ወትረ፡ ቅድሜሁ፡ ይብክያ፨
-
- ሰላም፡ ለቆብዐ፡ ርእስከ፡ ወለአስኬማከ፡ ፍትው፨
- ለቀሚስከ፡ ዓዲ፡ ዘአርአያሁ፡ ቅድው፨
- ኤዎስጣቴዎስ፡ መቅደስ፡ በወርቀ፡ ምግባር፡ ሥርግው፨
- ለእመ፡ ኮነ፡ ልሱሐ፡ ማዕደ፡ አፉየ፡ ድልው፨
- ለሥሐተ፡ ዚአሁ፡ ቅስም፡ በጣዕምከ፡ ጼው፨
-
- ናሁ፡ አቅረብኩ፡ ለዕበይከ፡ አምላክ፨
- መሥዋዕተ፡ ጽባሕ፡ ወሰርክ፨
- ኤዎስጣቴዎስ፡ ጳውሎስ፡ ሠዓሬ፡ ጽልዕ፡ ወሐከክ፨
- በለኒ፡ ተወከፍኩ፡ ቍርባነ፡ ተወክፎተ፡ መሥዋዕተ፡ ቡሩክ፨
- ዘአብጽሐ፡ ሊተ፡ ልሳኑ፡ ለላእክ፨