Subject
Malkəʾ
-
- [The beginning of the text is lost.]
-
- ሰላም፡ ለጕርዔከ፡ ወለክሳድከ፡ ምጡቅ፨
- በንብረ፡ አሐዱ፡ መልክእ፡ እስመ፡ ከመ፡ መልአክ፡ ረቂቅ፨
- ዘወልደ፡ ማርያም፡ ዜናዊ፡ መምህረ፡ የዋሃን፡ ደቂቅ፨
- ታሰግድ፡ በጸሎትከ፡ አራዊተ፡ ገዳም፡ ርኁቅ፨
- ወአናብስተ፡ ትጼዐን፡ በጽድቅ፨
-
- ሰላም፡ ለመትከፍትከ፡ አነዳ፡ ዘተዐጽፈ፨
- ወለዘባንከ፡ ሰላም፡ በአምሳለ፡ ክርስቶስ፡ ተቀሥፈ፨
- ዘወልደ፡ ማርያም፡ መጥምቅ፡ ከመ፡ ዮሐንስ፡ አእላፈ፨
- ግድፍ፡ ሐሜለተከ፡ በዘኮንከነ፡ ሐዳፈ፨
- ከመ፡ ሐሜለቶ፡ ኤልያስ፡ ለኤልሳዕ፡ ገደፈ፨
-
- ሰላም፡ ለመዛርዒከ፡ ወለኵርናዕከ፡ እሙንቱ፨
- ለእመትከ፡ መጣኒ፡ ለነዳይ፡ ሠርጐ፡ ትርሲቱ፨
- ዘወልደ፡ ማርያም፡ ትገብር፡ ማሕሌተ፡ ስምከ፡ ዝንቱ፨
- ዲማ፡ ዲማ፡ ለተክለ፡ አልፋ፡ ምኔቱ፨
- ዲማ፡ ዲማ፡ ለማትያስ፡ ዕፃሁ፡ ወርስቱ፨
-
- ሰላም፡ ለእራኅከ፡ በውሂብ፡ እለ፡ ተፈትኑ፨
- እንዘ፡ ይመልእ፡ ወርቀ፡ ለነዳይ፡ በውስተ፡ ሕፍኑ፨
- ለተክለ፡ አልፋ፡ ፀሓይ፡ ዘወልደ፡ ማርያም፡ ብርሃኑ፨
- ዐቀብተ፡ ነፍስከ፡ መላእክተ፡ ሰማይ፡ ኮኑ፨
- ዐውደከ፡ አባ፡ ተዐየኑ፡ ቦኑ፨
-
- ሰላም፡ ለሰኰናከ፡ በፍኖተ፡ ወንጌል፡ ረዋጺ፨
- ወለመከየድከ፡ ሰላም፡ ድዉያነ፡ ሥጋ፡ ሐዋጺ፨
- ዘወልደ፡ ማርያም፡ ለቤተ፡ ክርስቲያን፡ ተሐነጺ፨
- ወኢይግድፍ፡ አናቅጸኪ፡ ነፋሰ፡ ልዮን፡ ዐማጺ፨
- ወነፋሰ፡ ምክሩ፡ ለልዮን፡ ገሣጼ፨
-
- ሰላም፡ ለቆምከ፡ ዘነዊኅ፡ አካሉ፨
- ዓዲ፡ ሰላም፡ ለመልክእከ፡ ኵሉ፨
- ለኀረገ፡ ወይን፡ ተክለ፡ አልፋ፡ ዘወልደ፡ ማርያም፡ አስካሉ፨
- አባ፡ አባ፡ ለውሉደ፡ ጸጋከ፡ እሉ፨
- እንበለ፡ ተፈልጦ፡ ኅቡረ፡ ምስሌሆሙ፡ ሀሉ፨
-
- ሰላም፡ ለግንዘተ፡ ሥጋከ፡ በልማደ፡ ቀሲስ፡ ኬፋ፨
- ወለመቃብሪከ፡ ዘኮነ፡ በምኔተ፡ ጻድቅ፡ ተክለ፡ አልፋ፨
- ዘወልደ፡ ማርያም፡ ተስፋከ፡ ዘይኄይስ፡ እምነ፡ ተስፋ፨
- አባ፡ አባ፡ ለምረረ፡ ሕማም፡ ግድፋ፨
- አባ፡ ለእግረ፡ ደዌ፡ በጸሎት፡ አኅልፋ፨
-
- ህየንተ፡ ጸሪቅ፡ ዘነፍስ፡ መበለት፡ አጽደቀ፨
- እንበለ፡ ትሁብ፡ ሰላመ፡ አምኃ፡ ሰላምከ፡ ወርቀ፨
- ዘወልደ፡ ማርያም፡ ተወከፍ፡ እንዘ፡ ኢትጐነዲ፡ ጥቀ፨
- ክርስቶስኒ፡ እንበለ፡ ኢይበል፡ ሕቀ፨
- እምእደ፡ መበለት፡ ተወክፈ፡ ወነሥአ፡ ጸሪቀ፨
-
- ኦዘትትዐጸፍ፡ ብሉየ፡ አነዳ፨
- በከመ፡ ቀዳሚ፡ ተዐጽፈ፡ ክርስቶስ፡ ከለሜዳ፨
- ዘወልደ፡ ማርያም፡ አብርሃም፡ ተወካፌ፡ ምጽዋት፡ እንግዳ፨
- አዝናም፡ መና፡ ሩጸት፡ በአምሳለ፡ ወይጠል፡ ተቅዳ፨
- ለእግረ፡ መጻጕዕ፡ ብንያም፡ ወሐንካስ፡ ይሁዳ፨